Epatažny śpiavak Oliver Tree i jašče piać čałaviek zahinuli ŭ Brazilii paśla sutyknieńnia viertalotaŭ
Papularny amierykanski muzyka i režysior Olivier Try nie dažyŭ da svajho 33‑hodździa ŭsiaho dva tydni. Avijakatastrofa, u jakoj zahinuli jašče piać čałaviek, zdaryłasia na paŭdniovym zachadzie Rya-de-Žanejra.
Infarmacyju pra śmierć muzyki paviedamiła brazilskaje vydańnie CNN Brasil, paźniej jaje paćvierdziła miascovaja palicyja.
Viadoma, što Olivier Try znachodziŭsia ŭ Brazilii ŭ miežach svajho suśvietnaha turne — u pačatku červienia jon vystupiŭ u San-Paŭłu, a ŭ lipieni pavinna była pačacca jeŭrapiejskaja častka hastrolaŭ. Siarod achviar taksama papularny arhiencinski jutubier Haspar Prym.
Šlach ad ska-panka da suśvietnaj słavy
Olivier Try Nikieł naradziŭsia ŭ kalifarnijskim horadzie Santa-Kruz. Jaho šlach u muzyku byŭ niezvyčajnym i raznastajnym: z troch hadoŭ jon braŭ uroki fartepijana, a ŭžo ŭ padletkavym uzroście paśpieŭ pajhrać u ska-pank-hurcie i vystupić na razahrevie ŭ takich zorak, jak Tyler, the Creator i Frank Ocean.
Sapraŭdny praryŭ adbyŭsia ŭ 2017 hodzie, kali jaho pieśnia «When I'm Down» stała virusnaj u internecie. Paśla hetaha ź im padpisaŭ kantrakt bujny łejbł Atlantic Records. Šyrokuju viadomaść prynieśli supierchity «Life Goes On» i «Miss You», a taksama debiutny albom Ugly Is Beautiful, jaki vyjšaŭ u 2020 hodzie. Na Spotify u jaho było bolš za 11 miljonaŭ słuchačoŭ štomiesiac, a niekatoryja treki źbirali bolš za 700 miljonaŭ prasłuchoŭvańniaŭ.
Olivier Try vyznačyŭsia nie tolki muzykaj, ale i jarkim epatažnym vobrazam. Jaho firmovymi rysami stali charakternaja pryčoska-«harščok», džynsy-kloš i viatroŭki kryklivych koleraŭ z 90-ch. Akramia muzyki, jon aktyŭna zajmaŭsia režysuraj, zdymajučy ŭłasnyja klipy i kamiedyjnyja skietčy. Naprykład, dla zdymak videa na pieśniu «Hurt» jon pajechaŭ va Ukrainu i vydatkavaŭ na pradakšn miljon dalaraŭ.
U 2021 hodzie jon vypuściŭ sumiesny mini-albom Welcome to the Internet z rasijskim rejv-hurtom Little Big, zapisaŭšy adzin z trekaŭ razam z epatažnym estonskim repieram Tommy Cash. Za svaju karjeru jon paśpieŭ vypuścić try studyjnyja albomy, a jaho muzyka vykarystoŭvałasia navat u rekłamie iPhone X.
Kamientary