Rasija sutyknułasia z vostrym deficytam pracoŭnaj siły i sałdat — CNN
Niahledziačy na šalonyja finansavyja bonusy dla navabrancaŭ, Rasii ŭsio ciažej papaŭniać svaje vajennyja straty va Ukrainie. Na piatym hodzie vajny demahrafičny kryzis i militaryzacyja ekanomiki pryviali da taho, što krainie paprostu nie staje ludziej jak na froncie, tak i na zavodach. Kali tendencyja zachavajecca, Pucin chutka paŭstanie pierad vybaram: pačać druhuju chvalu niepapularnaj mabilizacyi abo admovicca ad pieršapačatkovych metaŭ vajny.
Što b vy zrabili z bonusam na 80 000 dalaraŭ abo sa śpisańniem daŭhoŭ na sumu da 140 000 dalaraŭ? Mienavita takija pytańni ciapier staviać pierad rasijskimi mužčynami na rekłamnych ščytach i ŭ sacyjalnych sietkach, prapanoŭvajučy za hetyja hrošy padpisać kantrakt ź Minabarony i adpravicca vajavać va Ukrainu. Hetyja sumy ŭ čatyry razy pieravyšajuć siaredni hadavy zarobak pa krainie, adnak navat jany pačynajuć stračvać svaju pryvabnaść.
Jak paviedamlaje CNN sa spasyłkaj na ekśpiertaŭ, u pieršym kvartale hetaha hoda viarboŭka ŭ rasijskuju armiju źniziłasia na 20% u paraŭnańni z anałahičnym pieryjadam 2025-ha.
«Rubli nie vajujuć, — zaznačaje Najdžeł Hoŭłd-Devis, staršy navukovy supracoŭnik Mižnarodnaha instytuta stratehičnych daśledavańniaŭ (IISS). — Heta pieršaja vajna ŭ historyi Rasii, kali dziaržava mienavita płacić hramadzianam za toje, kab jany išli vajavać, a nie prosta prymušaje ich. Heta stvaraje vielizarny ekanamičny cisk i kadravyja prablemy».
Pracoŭny kryzis i miežy vytvorčaści
Vajna va Ukrainie, jakaja ciahniecca piaty hod, vysmoktvaje z krainy pracazdolnych mužčyn. Pavodle acenak zachodnich raźviedak, z pačatku kanfliktu zahinuła amal 500 tysiač rasijskich vajskoŭcaŭ, jašče sotni tysiač pakinuli krainu, ratujučysia ad pryzyvu. Heta pryviało da najciažejšaha ŭ historyi Rasii deficytu pracoŭnaj siły.
Abaronnaja pramysłovaść pracuje na miažy svaich mahčymaściaŭ. Zavody pierajšli na kruhłasutačny režym, adnak pavialičyć vytvorčaść zbroi jašče bolš fizična niemahčyma mienavita z-za niedachopu rabočych ruk.
«Urad moža pabudavać novy zavod abo znajści finansavańnie, ale dziaržava nie zdolnaja dyktavać uzrovień naradžalnaści», — padkreślivaje Hoŭłd-Devis.
Deficyt kadraŭ spryjaje rostu zarobkaŭ u hramadzianskim siektary, što ŭ svaju čarhu razhaniaje inflacyju. Ceny na pradukty charčavańnia vyraśli bolš čym na 18% u paraŭnańni sa studzieniem 2024 hoda, a niadaŭniaje pavyšeńnie padatkaŭ i kamunalnych płaciažoŭ tolki paharšaje situacyju.
Technałahičnaja pieravaha Ukrainy i straty Rasii
Na fonie rasijskich kadravych prablem Ukraina robić staŭku na inavacyi. Pavodle danych Instytuta vyvučeńnia vajny (ISW), ukrainskija siły demanstrujuć značnuju technałahičnuju pieravahu, asabliva ŭ vykarystańni taktyčnych bieśpiłotnikaŭ i robataŭ.
Tolki za pieršyja try miesiacy 2026 hoda Ukraina praviała bolš za 22 tysiačy bieśpiłotnych naziemnych misij. Hałoŭnakamandujučy USU Alaksandr Syrski śćviardžaje, što ŭ traŭni ŭkrainskija apieratary dronaŭ zabili abo paranili bolš rasijskich sałdat, čym Rasija zdoleła mabilizavać za toj ža pieryjad. Zachodnija acenki taksama pakazvajuć vysoki ŭzrovień strat rasijskaha vojska — kala 30—35 tysiač čałaviek štomiesiac.
Rasijskaje vojska stanovicca ŭsio mienš prafiesijnym, bo na pieradavuju praciahvajuć adpraŭlać byłych źniavolenych i słaba padrychtavanych navabrancaŭ. Sproby pryciahnuć da kiravańnia dronami studentaŭ techničnych VNU pravalilisia paśla taho, jak stała viadoma, što Minabarony RF pieryjadyčna kidała apierataraŭ bieśpiłotnikaŭ u zvyčajnyja piachotnyja šturmy, što vyklikała davier da takich kantraktaŭ.
Ciažki vybar dla Kramla
Kab kampiensavać deficyt navabrancaŭ, Rasija ŭžo vykarystała dziasiatki tysiač źniavolenych, pryciahnuła na front niekalki chval paŭnočnakarejskich vajskoŭcaŭ i pačała vierbavać pracoŭnych mihrantaŭ. Adnak hetych zachadaŭ stanovicca niedastatkova.
Ekśpierty sychodziacca ŭ mierkavańni, što Kreml nieŭzabavie apyniecca pierad fundamientalnym vybaram: albo radykalna ŭzmacnić cisk na ekanomiku i hramadstva (praz novuju chvalu prymusovaj mabilizacyi i zabaronu na vyjezd z krainy), albo maštabavać svaje vajennyja mety ŭ bok ich pamianšeńnia.
Chacia niekatoryja analityki ličać, što rasijskaja ekanomika zdolnaja jašče niejki čas vytrymlivać hety ciažar za košt pryciahnieńnia zamiežnaj pracoŭnaj siły ź Indyi, Paŭnočnaj Karei i Afryki, fiskalnaja nahruzka na biudžet stanovicca ŭsio bolš adčuvalnaj. Na siońnia vydatki na vojska i viarboŭku aceńvajucca na dziasiatki miljardaŭ dalaraŭ štohod, što składaje amal 10% ad usiaho fiederalnaha biudžetu.
«Hetyja tendencyi mohuć asłabić padtrymku vajny i pavialičyć sacyjalnuju niezadavolenaść. Adnak Kreml tradycyjna schilny padvojvać staŭki, a nie adstupać», — papiaredžvaje Maryja Śniehavaja, ekśpiertka Centra stratehičnych i mižnarodnych daśledavańniaŭ.
Kamientary