Novy hihant Halivuda: Miniust ZŠA ŭchvaliŭ źlićcio Warner Bros. i Paramount koštam 110 miljardaŭ

Ministerstva justycyi ZŠA (DOJ) aficyjna zakončyła vaśmimiesiačnuju antymanapolnuju pravierku i ŭchvaliła ździełku, u vyniku jakoj, jak my pisali raniej, Paramount u žorstkaj baraćbie pieramoh Netflix. Jak paviedamlaje ahienctva Reuters, viedamstva nie zapatrabavała ni prodažu aktyvaŭ, ni inšych abmiežavańniaŭ, pryjšoŭšy da vysnovy, što źlićcio nie paškodzić kankurencyi.

Arhumienty rehulatara i suviazi z Trampam

Pavodle aficyjnaj zajavy Ministerstva justycyi, «šyrokija vyniki rasśledavańnia śviedčać, što ŭpłyŭ tranzakcyj budzie zaklučacca ŭ pavyšeńni kankurencyi va ŭsioj ekasistemie miedyja i zabaŭ, što pryniasie karyść amierykanskim spažyŭcam i rabotnikam». Rehulatar adchiliŭ paraŭnańni sa źlićciom Disney i Twenty-First Century Fox u 2019 hodzie, zaznačyŭšy, što z taho času Disney tolki istotna pavialičyŭ vydatki na kantent. Hałoŭnym arhumientam Paramount, jaki, vidavočna, i pierakanaŭ viedamstva, byŭ tezis, što abjadnanaja kampanija zmoža bolš efiektyŭna kankuryravać z hłabalnymi płatformami, paviedamlaje partał IXBT.com.

Rašeńnie DOJ było davoli čakanym u kantekście palityčnaha klimatu: administracyja Donalda Trampa redka błakavała bujnyja ździełki. Pry hetym hienieralny dyrektar Paramount Devid Elisan źjaŭlajecca synam suzasnavalnika karparacyi Oracle Łarry Elisana, jaki padtrymlivaje ščylnyja suviazi z prezidentam, a sama kampanija aktyŭna najmała na pracu byłych uradavych čynoŭnikaŭ.

Pratesty Halivudu i pahroza z boku štataŭ

Adnak fiederalnaje ŭchvaleńnie — heta jašče nie finał historyi. Ździełka sustrakaje žorstki supraciŭ u samoj kinaindustryi. Jašče viasnoj bolš za tysiaču čałaviek — akciory, režysiory, scenarysty i pradziusary — vystupili z adkrytym listom suprać źlićcia studyj, aścierahajučysia masavych skaračeńniaŭ, rostu vytvorčych vydatkaŭ i źbiadnieńnia raznastajnaści siužetaŭ na ekranach.

Ich pazicyju padzialajuć hienieralnyja prakurory šerahu štataŭ, siarod jakich Kalifornija i Ńju-Jork, jakija rychtujuć supolny pazoŭ z patrabavańniem zabłakavać ździełku. Jak piša Reuters, hienieralny prakuror Kalifornii Rob Bonta ŭžo paćvierdziŭ u sacsietkach, što jaho ofis praciahvaje aktyŭnaje rasśledavańnie, i rašeńnie Vašynhtona nie źjaŭlajecca dla ich kropkaj u spravie. Apanienty źlićcia na miescach namieranyja dakazvać u sudach, što stvareńnie takoha miehahihanta abmiažuje kankurencyju za tvorčyja kadry i zvuzić vybar dla aŭdytoryi.

Arabskija hrošy i finansavy cisk

Dadatkovaj intryhi dadaje pytańnie zamiežnaha finansavańnia. Demakratyčnyja sienatary vykazali surjoznuju zaniepakojenaść tym, što suvierennyja fondy Saudaŭskaj Aravii, Katara i Abu-Dabi, a taksama, mahčyma, kitajskaja karparacyja Tencent mohuć atrymać doli ŭ kampanii, jakaja budzie kantralavać ahulnanacyjanalnyja navinavyja resursy, takija jak CBS i CNN. U adkaz na heta pradstaŭniki Paramount zajavili, što siamja Elisanaŭ zachavaje za saboj kantrol nad akcyjami z pravam hołasu, a zamiežnyja inviestary atrymajuć vyklučna nieŭładarnyja akcyi biez mahčymaści ŭpłyvać na redakcyjnuju palityku.

Pakul iduć jurydyčnyja sprečki, čas hulaje suprać Paramount. Kali źlićcio nie budzie kančatkova zakončana da kastryčnika, kampanija sutykniecca z štodzionnym štrafam sumaj kala 6,9 miljona dalaraŭ na karyść akcyjanieraŭ Warner Bros. Hetaja historyja pieratvarajecca nie prosta ŭ najbujniejšuju kansalidacyju miedyjaaktyvaŭ, a ŭ sapraŭdny test dla amierykanskaj sistemy rehulavańnia, dzie fiederalny centr sutyknuŭsia z supracivam mahutnych štataŭ.

• 0
• 0
• 0
• 0
• 0
• 0
• 0
• 0