Вокны павыбівала, кватэры заліло. Хто і як будзе кампенсаваць шкоду ад «фантана» на Жукоўскага ў Мінску
Работы па ліквідацыі наступстваў здарэння працягваліся ўвесь дзень.
Учора днём у раёне вуліцы Жукоўскага адбылося сапраўднае надзвычайнае здарэнне: з-пад зямлі ўдарыў фантан вышынёй з пяціпавярховы дом. Адбылося пашкоджанне квартальнай сеткі — быў пашкоджаны трубаправод дыяметрам 400 мм, нагадвае Onliner.by.
У выніку пашкоджаны пад'езд бліжэйшага дома, некалькі кватэр у ім і адзін аўтамабіль. Работы па ліквідацыі наступстваў здарэння працягваліся ўвесь дзень.
Каб высветліць, што менавіта стала прычынай аварыі, «вінаваты» трубаправод адправяць у лабараторыю на даследаванне. Гэта дапаможа прадухіліць падобныя сітуацыі ў будучыні.
Пытанне матэрыяльнай шкоды для жыхароў абяцаюць урэгуляваць у штатным парадку.
Як распавёў намеснік галоўнага інжынера па працы з персаналам філіяла «Мінскія цеплавыя сеткі» РУП «Мінскэнерга» Андрэй Мацкевіч, у «Мінскэнерга» ёсць дзеючы дагавор страхавання на выпадак няштатных сітуацый, у адпаведнасці з якім будзе праведзена ацэнка шкоды і кампенсаваныя выдаткі.
«Кожны выпадак будзе разгледжаны ў індывідуальным парадку», — падкрэсліў спецыяліст.
У перыяд правядзення аварыйна-аднаўленчых работ гарачай вады часова не будзе ў некалькіх шматпавярховых дамах на вуліцах Жукоўскага, Магілёўскай і Варанянскага.
Ужо бліжэй да апоўначы спецыялісты паведамілі, што зварачныя работы на аб'екце былі завершаныя.
«У гэты момант праводзіцца запаўненне цеплавой сеткі і яе ўключэнне — падача гарачай вады будзе адноўлена ў найбліжэйшы час», — патлумачылі ў «Мінскэнерга».
Выкід вады быў спынены ў 13:05, пра гэта паведамілі ў «Мінскэнерга». Зараз работы на ўчастку ў раёне вуліцы Жукоўскага працягваюцца.
Удакладняецца, што завершаны этап адпампоўкі вады з цеплавой камеры. Зараз энергетычныя службы філіяла «Мінскія цеплавыя сеткі» прыступілі да земляных работ — вядзецца раскопванне ўчастка для дакладнага вызначэння месца пашкоджання трубаправода.
Як сцвярджае чытачка Onliner.by, падчас фантанавання вады струмені выбілі вокны ў пад'ездзе насупраць месца здарэння:
— Выбіты вокны з 2‑га па 5— 6‑ы паверхі, затопленыя кватэры, пад'езд і сама вуліца Жукоўскага, — сцвярджае дзяўчына. — З моманту першага звароту аварыйная служба прыбыла на месца толькі праз паўгадзіны.
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы4
Каментары