Федэральны суддзя пастанавіў прыбраць імя Трампа з фасада Кенэдзі-цэнтра ў Вашынгтоне
Акруговы суд у Вашынгтоне забараніў пераймяноўваць Мемарыяльны цэнтр выканальніцкіх мастацтваў імя Джона Кенэдзі ў гонар Дональда Трампа і пастанавіў прыбраць яго імя з фасада будынка, дзе яно было размешчана ў канцы мінулага года, піша Бі-бі-сі.
Суддзя абгрунтаваў сваё рашэнне тым, што перайменаванне ўстановы ў Вашынгтоне немагчыма без ухвалення Кангрэса, а таксама забараніў закрываць цэнтр на час запланаванага рамонту.
Згодна з пастановай, імя Трампа павінна быць выдалена з назвы ўстановы, з яе фасада, а таксама з любых іншых фізічных ці лічбавых шыльдаў і афіцыйных матэрыялаў цягам 14 дзён.
Трамп заявіў у сацыяльнай сетцы Truth Social, што ў такім выпадку ён спыняе ўдзел у рэканструкцыі Кенэдзі-цэнтра і даручае падрыхтаваць дакументы, каб вярнуць «гэту правальную ўстанову» пад апеку Кангрэса.
«Калі я не магу свабодна рабіць тое, што ў мяне атрымліваецца лепш, чым у каго-небудзь іншага, — вярнуць гэтую ўстанову да жыцця фізічна, фінансава і ў мастацкім плане, — я не зацікаўлены працягваць тое, што можа быць толькі безнадзейным падарожжам у «Нетландыю», — напісаў ён.
Цэнтр мастацтваў імя Кенэдзі— галоўны нацыянальны тэатральна-канцэртны комплекс ЗША, фінансаванне якога забяспечвае Кангрэс. У лютым 2025 года Дональд Трамп змяніў некалькіх апекуноў у савеце цэнтра і прызначыў апекуном самога сябе, пасля чаго быў абраны старшынёй гэтай культурнай арганізацыі.
Пазней Трамп абвясціў аб прысваенні ўстанове свайго імя. У снежні 2025 года на фасадзе цэнтра з’явілася новая шыльда з поўным імем Трампа. За гэтымі зменамі, уключаючы перайменаванне, рушыла ўслед адмена выступленняў артыстаў, якія былі заяўлены на гэтай пляцоўцы, а таксама падзенне продажаў білетаў.
У лютым Трамп абвясціў пра двухгадовае закрыццё ўстановы для правядзення капітальнага рамонту, пачатак якога быў прызначаны на 4 ліпеня 2026 года — «ў гонар 250‑годдзя нашай краіны».
Член рады дырэктараў Джойс Біці — дэмакратка і член Кангрэса ад штата Агаё, а таксама іншыя былыя апекуны аспрэчылі змены, унесеныя Трампам, заявіўшы ў пазове, што былі пазбаўленыя права голасу па пытаннях, якія разглядаліся саветам.
Пазней пазоўшчыкі ўнеслі папраўкі ў пазоў, каб таксама аспрэчыць планы закрыцця ўстановы на рамонт.
«Сённяшняе рашэнне справядліва пацвярджае, што спробы цяперашняй адміністрацыі перайменаваць і закрыць Цэнтр не маюць пад сабой ніякіх прававых падстаў», — заявіла Біці.
«Кенэдзі-цэнтр — гэта ўстанова, якая належыць амерыканскаму народу, а не Дональду Трампу. Ён апаганіў гэты святы мемарыял дзеля ўласнага самалюбства. Я ганаруся тым, што змагалася за вяршэнства права і абарону гэтай установы», — дадала яна.
Афіцыйная прадстаўніца цэнтра заявіла, што арганізацыя будзе абскарджваць пастанову акруговага суда.
«Мы ўпэўненыя, што пры разглядзе апеляцыі суд падтрымае рашэнне савета аб прызнанні гістарычнага ўкладу прэзідэнта Трампа ў культурны цэнтр нашай краіны», — заявіла прэс-сакратарка Кэнэдзі-цэнтра Рома Даравія.
Дараві таксама адзначыла, што ў цэнтры не згодныя з рашэннем аб прыпыненні рамонтных работ, паколькі ён «мае патрэбу ў тэрміновай і маштабнай рэстаўрацыі».
«Паколькі 257 мільёнаў долараў былі выдзелены прэзідэнтам Трампам і ўхвалены Кангрэсам, неабходныя рэсурсы маюцца, і мы па-ранейшаму прыхільныя выкарыстанню ўсіх законных магчымасцяў, каб забяспечыць аднаўленне Цэнтра Трампа—Кэнэдзі як нацыянальнай культурнай славутасці, якой змогуць карыстацца ўсе амерыканцы», — сказала яна.
Паводле задумы Трампа, поўная назва ўстановы павінна была гучаць як «Мемарыяльны цэнтр выканальніцкіх мастацтваў імя Дональда Дж. Трампа і Джона Ф. Кенэдзі».
Згодна з пастановай акруговага суддзі Крыстафера Купера, назва будзе вернута да ранейшага варыянту — «Мемарыяльны цэнтр выканальніцкіх мастацтваў імя Джона Ф. Кенэдзі». Менавіта так ён быў названы пры адкрыцці ў 1971 годзе ў памяць пра 35‑га прэзідэнта ЗША Джона Фітцджэральда Кенэдзі, забітага ў 1963 годзе.
«Статут Кэнэдзі-цэнтра цалкам выразна сцвярджае, што Цэнтр названы ў гонар прэзідэнта Кенэдзі і не можа быць перайменаваны або прысвечаны іншаму чалавеку на падставе аднабаковага рашэння Рады», — напісаў Купер у сваім 94‑старонкавым рашэнні, прынятым суддзёй, прызначаным пры адміністрацыі Абамы.
«Кангрэс даў Кенэдзі-цэнтру яго назву, і толькі Кангрэс можа яе змяніць», — гаворыцца ў дакуменце.
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары