Ртутны тэрмометр прабыў у целе жанчыны восем гадоў. Неймаверная гісторыя ва Украіне
Жанчына звярнулася да медыкаў са скаргамі на боль унізе жывата.
У Львове ўролагі выдалілі з арганізма 42‑гадовай жанчыны ртутны тэрмометр. Пацыентка пражыла з ім восем гадоў. Пра незвычайную знаходку расказалі ў бальніцы Львоўскага медыцынскага ўніверсітэта імя Данілы Галіцкага, піша Бі-бі-сі — Украіна.
Жанчына звярнулася да медыкаў са скаргамі на боль унізе жывата, частыя пазывы да мачавыпускання.
«Падчас ультрагукавога даследавання мы ўбачылі ў мачавым пузыры ўтварэнне, падобнае да вялікага каменя са стрыжнем унутры», — патлумачыў уролаг Васіль Матвіїў.
Каб дакладна высветліць, што гэта, жанчыну накіравалі на камп’ютарную тамаграфію.
«Менавіта КТ дала дакладны адказ: у мачавым пузыры знаходзіўся ртутны тэрмометр, які за гады цалкам інкруставаўся каменем», — расказаў доктар.
У каментары Бі-бі-сі — Украіна прадстаўніца бальніцы ўдакладніла, што гэта першы такі выпадак у гісторыі клінікі.
Якім чынам ртутны тэрмометр прабыў столькі гадоў у целе жанчыны і не разбіўся — «для нас загадка», сказалі ў бальніцы.
З-за каменя ўтварыўся пролежань сценкі мачавога пузыра, што прывяло да фармавання мачапузырова-похвавага свішча. Праз гэта, кажуць дактары, пацыентку чакае яшчэ адна аперацыя — пасля таго як рана загоіцца і інфекцыйны працэс спыніцца, жанчыне будуць выдаляць свішч, які ўтварыўся ў яе мачавым пузыры.
Магчыма, гэта не апошняя аперацыя, якая чакае жанчыну. Аднаўленне будзе працяглым, кажуць у бальніцы.
Як менавіта тэрмометр трапіў унутр жанчыны — у бальніцы не расказваюць. Там удакладнілі, што пацыентка родам са Львоўшчыны і з меркаванняў прыватнасці вырашыла не расказваць пра прычыну захворвання.
Па гэтых жа прычынах у бальніцы адмовіліся расказваць пра тое, як менавіта тэрмометр можа трапляць унутр у такіх выпадках.
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй40
Каментары