Упраўленне па барацьбе з арганізаванай злачыннасцю і тэрарызмам (DIICOT) затрымала былога кандыдата ў прэзідэнты Румыніі Кэліна Джарджэску. Пра гэта паведамляе Digi24.
Па інфармацыі крыніц выдання, палітыка затрымалі падчас паездкі ў аўтамабілі, пасля чаго даставілі ў ягоны дом у пасёлку каля Бухарэста. Там у прысутнасці Джарджэску павінен быў адбыцца ператрус.
У прэс-рэлізе DIICOT ад 21 верасня гаворыцца, што пракуроры праводзяць ператрусы ў межах справы аб стварэнні арганізаванай злачыннай групы і махлярстве, якое прывяло да цяжкіх наступстваў.
Паводле матэрыялаў следства, у верасні 2021 года двое грамадзян Румыніі і італьянец стварылі арганізаваную групу для падману прадпрымальнікаў. DIICOT не называе імёны падазраваных, але паведамляе, што групу ўзначальваў 64‑гадовы грамадзянін Румыніі. Джарджэску таксама 64 гады.
Следства сцвярджае, што кіраўнік групы прадстаўляў двух саўдзельнікаў як паспяховых бізнэсменаў і кіраўнікоў замежных кампаній, якія нібыта мелі значныя сродкі для выдачы крэдытаў прадпрымальнікам, што хацелі пашырыць свой бізнэс у Румыніі. Для атрымання пазыкі неабходна было ўнесці грашовае забеспячэнне.
Згодна з матэрыяламі справы, зламыснікі пераканалі аднаго з прадпрымальнікаў перавесці ім 1,1 мільёна еўра. Узамен яны абяцалі арганізаваць атрыманне буйнога крэдыту ў замежным банку.
Раней супраць Джарджэску ўжо пачыналіся расследаванні па іншых абвінавачаннях, у тым ліку ў замаху на падрыў канстытуцыйнага ладу, распаўсюджванні хлуслівай інфармацыі і стварэнні антысеміцкай арганізацыі.
Кэлін Джарджэску, якога адносяць да правых папулістаў, удзельнічаў у прэзідэнцкіх выбарах у Румыніі ў лістападзе 2024 года як незалежны кандыдат. У першым туры ён заняў першае месца, атрымаўшы 23% галасоў.
Аднак Канстытуцыйны суд Румыніі ануляваў вынікі выбараў і прызначыў новае галасаванне. Падставай сталі падазрэнні ў расійскім умяшанні ў выбарчы працэс. Румынскія спецслужбы апублікавалі дакументы, згодна з якімі каля 25 тысяч ботаў-акаўнтаў у тыктоку маглі весці агітацыю на карысць Джарджэску.
Сам палітык адмаўляў сваю сувязь з Расіяй.
Канстытуцыйны суд Румыніі падтрымаў забарону на вылучэнне Джарджэску ў прэзідэнты
Прарасійскі румынскі палітык Джарджэску прывітаў сваіх прыхільнікаў скандальным жэстам ВІДЭА
Былога кандыдата ў прэзідэнты Румыніі вызвалілі, але забаранілі выязджаць з краіны
У ахоўніка Джарджэску знайшлі 1,5 мільёна даляраў наяўнымі пад паркетам. Яшчэ 7,2 мільёны ён з братам атрымаў з Афрыкі
Той самы масажыст расказаў, навошта здымаў голых кліентак2
Каментары