Удар па Запарожжы: гарэлі дамы, гандлёвы цэнтр і найстарэйшы корпус універсітэта
У ноч супраць 21 верасня расійскія войскі атакавалі Запарожжа ўдарнымі беспілотнікамі. У горадзе прагрымелі выбухі, ёсць трапленні і пацярпелыя, піша Бі-бі-сі — Украіна.
Паводле звестак Дзяржаўнай службы па надзвычайных сітуацыях, у выніку атакі былі пашкоджаныя два жылыя дзевяціпавярховыя дамы. У іх успыхнулі пажары.
Таксама загарэўся гандлёвы цэнтр. На месцах трапленняў працуюць ратавальнікі і іншыя экстранныя службы, якія ліквідуюць наступствы абстрэлу.
У выніку атакі пацярпелі пяць чалавек. Спачатку было вядома пра аднаго траўмаванага, аднак пазней колькасць пацярпелых павялічылася.
Чатыры чалавекі атрымалі траўмы ў выніку траплення ў адзін з шматпавярховікаў, яшчэ адзін чалавек пацярпеў у іншым доме.
Сярод траўмаваных — трое мужчын і дзве жанчыны.
Пашкоджаны гістарычны корпус універсітэта
Асобна расійскі ўдар пашкодзіў адзін з карпусоў Запарожскага нацыянальнага ўніверсітэта. Пасля траплення там узнік маштабны пажар.
Паводле звестак мясцовых крыніц, гаворка ідзе пра трэці навучальны корпус ЗНУ ў Аляксандраўскім раёне. Гэта гістарычны будынак, узведзены ў 1902 годзе, дзе раней знаходзілася жаночая гімназія.
Уначы выбухі таксама прагрымелі ў Кіеве і вобласці на фоне пагрозы атакі ўдарнымі беспілотнікамі. У Баярцы ўзнік маштабны пажар на складах.
Расійскія войскі таксама атакавалі Сумы.
Паводле слоў кіраўніка абласной ваеннай адміністрацыі Алега Грыгорава, два варожыя дроны ўдарылі побач з шматкватэрным жылым домам.
Пашкоджаныя дом і пяць аўтамабіляў.
Загінула 38‑гадовая жанчына. Яе 41‑гадовага мужа са шматлікімі аскепкавымі раненнямі шпіталізавалі.
Пазней расійскія войскі нанеслі ўдар кіраванымі авіябомбамі па тэрыторыі аднаго з універсітэтаў у Зарэчным раёне Сумаў. Будынак зазнаў значныя разбурэнні. Паводле папярэдніх звестак, абышлося без пацярпелых.
Каментары