Фэйсбук у Беларусі памірае, тыкток самы масавы, VK і «Аднакласнікі» стагнуюць, а трэдсы выбухова растуць
У мінулым годзе ўпершыню за доўгі час многія сацсеткі ў Беларусі перасталі расці. Выключэннем стала выбуховая цікавасць да Threads, а вось усе астатнія, падобна, уперліся ў столь, расказалі Office Life апытаныя выданнем эксперты.
Сяргей Кузьменка, вядучы выкладчык Webcom Academy, гаворыць:
«Праблема ў тым, што з выразнай статыстыкай па сацыяльных сетках у Беларусі традыцыйна складана. У нас ёсць, па сутнасці, тры асноўныя крыніцы: Digital Data Report, унутраныя даныя Webcom Group і разлікі агенцтваў Wunder і AMDG. Але калі скласці гэтую мазаіку, карціна атрымліваецца вельмі паказальная.
Першае і галоўнае: па выніках мінулага года агульны рост аўдыторыі ў беларускіх сацсетках практычна спыніўся. Выключэннем стаў толькі Threads, які за паўгода вырас у тры разы.
Абсалютны лідар па ахопах сёння — TikTok, ён перасягнуў мяжу амаль у 9 мільёнаў карыстальнікаў. Падкрэслю: карыстальнікаў, а не насельніцтва! Многія заходзяць з некалькіх прылад, але лічба ўсё адно каласальная. TikTok «з’ядае» ўвесь свабодны час, і гэтая тэндэнцыя будзе толькі ўзмацняцца».
Алеся Чэрнік, кіраўніца SMM-напрамку Design Wunder Digital, у сваю чаргу, сцвярджае:
«За год аўдыторыя сацсетак з Беларусі вырасла на 13% (паводле DataReportal). Самая масавая пляцоўка ў нашай краіне — TikTok: ім карыстаюцца 95% інтэрнэт-карыстальнікаў. Гэта фактычна максімальны ахоп. Платформа працягвае расці, але тэмпы заканамерна запавольваюцца: патэнцыял пашырэння амаль вычарпаны».
Далей, кажа Сяргей Кузьменка, ідзе «цёмны конік» — YouTube, па якім, на жаль, няма празрыстай беларускай статыстыкі, а затым — Instagram з яго 3,9 мільёна.
«Здавалася б, менш, чым у TikTok, але тут тоіцца найважнейшы нюанс: час знаходжання! Людзі заходзяць у Instagram дзясяткі разоў на дзень, гартаюць стужку, глядзяць рылсы. Менавіта гэты фактар — ключавы для рэкламадаўцы.
Усё, што не трапляе ў топ-3, альбо стаіць на месцы, альбо падае. Напрыклад, колькасць карыстальнікаў Facebook у Беларусі знізілася прыкладна да 500 тысяч. Гэта ўжо не масавая сацсетка, а нішавая пляцоўка.
Сюрпрызам года стаў LinkedIn. Паводле ацэнак, яго месячная аўдыторыя ў Беларусі ўжо дасягнула 2 мільёнаў чалавек. Гэта дзелавая сетка, якая рэальна працуе і дае вынік. Што тычыцца «ВКонтакте» (менш за 2 мільёна) і «Одноклассников» (каля 1 мільёна), дык гэтыя сеткі стагнуюць.
Галоўная падзея гэтага года — Threads. Да лістапада 2025 года яго аўдыторыя ў Беларусі была 450 тысяч, а да сакавіка 2026‑га мы ўжо перасягнулі парог у мільён карыстальнікаў.
«Чым Threads адрозніваецца ад усяго, што мы бачылі раней? — разважае Сяргей Кузьменка. — Калі праводзіць аналогіі, то TikTok — гэта гіганцкі футбольны манеж. Там 9 мільёнаў чалавек, шум, штурханіна. Каб вас заўважылі, трэба крычаць вельмі гучна. А Threads — гэта такая невялікая курылка, дзе збіраюцца толькі свае, і навіны разносяцца імгненна».
Цяпер чытаюць
«На такую х**ню павялася». Расіянка прыехала з Сібіры ў Беларусь і цяпер з мацюкамі расказвае, як тут складана жыць27
Каментары
З часам у іх гніюць мазгі, што ператварае людзей ў жывёлу.