У Дзяржынску адмянілі ўсе 15 аўтобусных маршрутаў і ўвялі чатыры новыя
«Аблмінскпасажыртранс» змяніў усю маршрутную сетку аўтобусаў у Дзяржынску — горадзе-спадарожніку Мінска.
Вось так выглядала маршрутная сетка дагэтуль (інфармацыя ліпеня 2026 года). Усяго было 15 маршрутаў, піша Blizko.by.
Звярніце ўвагу на вялікую колькасць нумароў з літарнымі індэксамі: гэта значна ўскладняе ўспрыманне маршрутнай сеткі і блытае пасажыраў.
Перавозчык паведаміў, што з 5 лістапада ўносяцца значныя змены ў схемы і расклады гарадскіх маршрутаў. Замест 15 маршрутаў створаць чатыры новыя:
— № 1. Чыгуначная станцыя Койданава — Макаўчыцы (амаль цалкам супадае з цяперашнім маршрутам № 1).
— № 2. Аўтапарк № 15 — Дзягільна праз мікрараён Вясёлкавы (толькі на невялікім участку супадае з цяперашнім маршрутам № 2).
— № 3. Петкавічы — Лакафарбавы завод (не супадае ні з адным з існых маршрутаў).
—№ 4. Чыгуначная станцыя Койданава — Макаўчыцы праз вуліцы Пратасава і Кальцавую (часткова супадае з цяперашнім маршрутам № 4).
Такім чынам, замест мноства маршрутаў, якія адрозніваюцца адзін ад аднаго нязначнымі дэталямі, гараджане атрымаюць усяго чатыры, але з больш зразумелай схемай руху.
Расклад руху пакуль вывучыць немагчыма: ён, як і схемы маршрутаў, будзе даступны на сайце transport-by.app або ў мабільным дадатку «Транспорт BY» пасля ўвядзення новага раскладу — 5 лістапада.
Цяпер чытаюць
Арыштавалі прадстаўнікоў кампаніі Bayer у Беларусі10
Каментары