За адзін дзень сем авіялайнераў у Еўропе атрымалі паведамленні пра бомбу на борце
У аўторак 3 лістапада сем пасажырскіх самалётаў, якія выконвалі рэйсы над Еўропай, атрымалі паведамленні пра магчымыя выбуховыя прылады на борце. Ні ў адным з выпадкаў выбухоўку не знайшлі. Некаторым самалётам давялося змяніць маршрут або прайсці дадатковую праверку пасля прызямлення, паведамляе Бі-бі-сі.
Самалёт Boeing 737 Max польскай авіякампаніі LOT, які выконваў рэйс з лонданскага аэрапорта Хітроў у варшаўскі аэрапорт імя Шапэна, пасля паведамлення пра бомбу прызямліўся ў аэрапорце Варшава-Модлін. Яго агледзелі спецыяльныя службы, пакуль пасажыры і экіпаж чакалі ў зале прылёту. Выбуховых прылад не знайшлі, аднак аэрапорт часова закрывалі.
Паведамленне пра пагрозу выбуху атрымала і авіякампанія SAS, чый самалёт ляцеў з Капенгагена ў Варшаву. Ён прызямліўся ў аэрапорце прызначэння, пасля чаго пасажыры і экіпаж пакінулі борт. Да расследавання далучылася варшаўская паліцыя. У аэрапорце часова закрылі адну ўзлётна-пасадачную паласу. Выбухоўкі таксама не выявілі.
Яшчэ два інцыдэнты адбыліся ў Балгарыі. Паводле слоў прадстаўніка МУС краіны Любаміра Ніколава, па электроннай пошце паступілі паведамленні пра бомбы ў розных установах, а таксама на борце самалёта, які прызямліўся ў Сафіі. Спачатку мясцовыя СМІ паведамлялі, што ён прыляцеў з Ізраіля, аднак пазней удакладнілі, што рэйс выконваўся з італьянскага Бергама. Гаворка ішла пра самалёт Wizz Air, які прызямліўся а 9:10 паводле Грынвіча. Акрамя таго, пагрозу выбуху атрымалі для рэйса Ryanair з Дубліна ў Сафію. На абодвух бартах выбуховых прылад не знайшлі.
Пасля паведамлення пра магчымую бомбу праверылі і самалёт Ryanair, які ляцеў з англійскага Манчэстэра ў іспанскую Мурсію. Выбухоўкі на ім таксама не знайшлі.
Яшчэ два самалёты Ryanair, якія накіроўваліся ў рымскі аэрапорт Ф’юмічына з Лісабона і Дубліна, таксама атрымалі паведамленні пра бомбы. Паводле крыніц Бі-бі-сі, выбуховых рэчываў на борце не было. Пры гэтым рэйс з Дубліна да самага прызямлення суправаджалі італьянскія вайскова-паветраныя сілы.
Адна з пасажырак рэйса Ryanair з Манчэстэра ў Мурсію расказала Бі-бі-сі, што падчас палёту пасажырам нічога не паведамлялі. Пасля прызямлення самалёт рэзка спыніўся і каля паўгадзіны стаяў на ўзлётна-пасадачнай паласе. Яго акружылі пажарнікі, паліцэйскія і сапёры, а пасажыраў вывелі з борта ў суправаджэнні паліцыі. Іх рэчы засталіся ў самалёце, а пра пагрозу ім паведамілі пазней.
Другі дзень запар у Еўропе паведамляюць пра бомбы на самалётах. Сёння — на двух рэйсах да Варшавы
Самалёт Wizz Air саджалі ў суправаджэнні знішчальніка праз паведамленне пра бомбу на борце
Стойкі рэгістрацыі багажу на рэйсы Ryanair будуць закрывацца яшчэ раней
Непадалёк ад рэзідэнцыі Трампа ў Фларыдзе разбіўся бізнэс-джэт, загінулі дзевяць чалавек
Цяпер чытаюць
Арыштавалі прадстаўнікоў кампаніі Bayer у Беларусі7
Каментары