Азербайджанскі «Нефтчы» разглядае кандыдатуру Віктара Ганчарэнкі на пасаду галоўнага трэнера, піша football.by.
Раней галоўным кандыдатам быў украінец і былы трэнер салігорскага «Шахцёра» Юрый Вернідуб, аднак перамовы з ім застапарыліся. На дадзены момант абавязкі галоўнага трэнера пасля звальнення Саміра Абасава 24 лістапада выконвае Санан Гурбанаў.
Пасля 13 тураў «нафтавікі» займаюць 7‑е месца ў чэмпіянаце Азербайджана (з 12) з 16 баламі, а адставанне ад лідыруючага «Карабаха» складае ўжо 13 ачкоў.
Ганчарэнка застаецца без працы з 12 чэрвеня гэтага года, калі пакінуў «Пары НН».
Самым паспяховым этапам Віктара Ганчарэнкі быў барысаўскі БАТЭ, які пры ім шэсць разоў станавіўся чэмпіёнам краіны, ён упершыню вывеў клуб у групавы турнір Лігі чэмпіёнаў.
Потым працаваў у Расіі з «Кубанню», ЦСКА, «Краснадарам», «Уфой», «Уралам», «Пары НН». З ЦСКА станавіўся сярэбраным прызёрам чэмпіянату суседняй краіны, але апошнія гады трэнерская кар'ера не задалася.
Спачатку ён не здолеў захаваць «Урал» у прэм'ер-лізе, а потым яго пазвалі ў «Пары НН», каб ён пакінуў клуб у вышэйшым дывізіёне, клуб фінішаваў 13-м, прайграў у стыкавых матчах «Сочы», і беларуса звольнілі. Але «Пары НН» застаўся ў прэм'ер-лізе, бо «Хімкі», што фінішавалі ў мінулым сезоне 12-я, не атрымалі ліцэнзію.
Ганчарэнка пасля сыходу з БАТЭ не працаваў па-за межамі Расіі, але апошнім часам казаў, што не выключае варыянт усходняга вектара, напрыклад Казахстан і Сярэднюю Азію.
Цяпер чытаюць
У рэстаране «Мак.бай» на загад Лукашэнкі перайменавалі амерыкана. Як назвалі?20
Каментары