«Лагістыка падводзіць». Калі беларусак пачнуць бясплатна прышчапляць ад віруса папіломы чалавека?
Вакцына супраць віруса папіломы чалавека для бясплатнай вакцынацыі дзяўчат ва ўзросце 11 гадоў мусіла паступіць у арганізацыі аховы здароўя Беларусі яшчэ ў маі — тады Мінздароўя планіравала забяспечыць усіх першай дозай вакцыны, а ў кастрычніку-лістападзе 2025-га ўжо і другой. Як высветліла «Наша Ніва», праз лагістычныя затрымкі гэтыя тэрміны пасунуліся.
У Магілёўскім абласным цэнтры гігіены, эпідэміялогіі і грамадскага здароўя журналісту «Нашай Нівы» як прыватнай асобе паведамілі, што пастаўку вакцыны чакаюць у верасні.
У Мінскім і Брэсцкім цэнтрах гігіены і эпідэміялогіі таксама пацвердзілі, што бясплатная вакцынацыя, хутчэй за ўсё, пачнецца ўжо ў новым навучальным годзе.
«Калі вашай дачцэ споўнілася 11 гадоў у гэтым годзе, то яна ўжо трапіла ў ліст чакання на бясплатную вакцынацыю. Як толькі вакцыны з’явяцца, то яе прышчэпяць».
Рашэнне вакцыянаваць менавіта дзяўчат у 11 гадоў было прынятае, каб сфармаваць абарону да пачатку палавога жыцця, у пераходным узросце. Калі вашаму дзіцяці, напрыклад, ужо споўнілася 12, то яно зможа бясплатна прышчапіцца пры астатку вакцыны — напрыклад, калі нехта з бацькоў 11-гадовай дзяўчыны адмовіцца ад сваёй дозы.
Дзяўчатам іншых узроставых груп можна прышчапіцца толькі на платнай аснове — у беларускіх аптэках для гэтага даступныя прэпараты «Гардасіл» і «Цэрварыкс». Дарэчы, як распавялі медыкі, калі бясплатная вакцына будзе эфектыўная супраць двух асноўных тыпаў віруса папіломы, то той жа «Гардасіл» абараняе ўжо ад чатырох. Праўда, каштуе вакцына нятанна: каля 400-450 рублёў за адну дозу (фінішны кошт будзе залежыць ад канкрэтнай аптэкі і схемы вакцынацыі, якую прапануе ўчастковы педыятр).
Вірус папіломы чалавека — гэта агульная назва групы вірусаў, шырока распаўсюджаных ва ўсім свеце. Яны перадаюцца ў асноўным палавым шляхам. Вядома каля двухсот розных тыпаў ВПЧ, частка з іх мае высокую анкагенную рызыку.
Вакцыны супраць ВПЧ абараняюць як мінімум ад вірусаў тыпаў 16 і 18 — менавіта яны часцей за ўсё вядуць да развіцця рака шыйкі маткі. Гэтая хвароба займае чацвёртае месца сярод найбольш распаўсюджаных відаў рака ў жанчын ва ўсім свеце і другое месца сярод жаночых анкалагічных захворванняў у Беларусі. Сяргей Маўрычаў, намеснік дырэктара РНПЦ анкалогіі і медыцынскай радыялогіі імя Н.Н. Аляксандрава, прыводзіў такую статыстыку: «Кожныя два дні ў нас захворваюць на рак шыйкі маткі пяць жанчын, і амаль кожны дзень памірае адна».
У свеце вакцынацыя ад ВПЧ пачалася ў 2006 годзе. Аўстралія адной з першых укараніла нацыянальную праграму вакцынацыі супраць ВПЧ. Больш за 125 краін свету ўключылі вакцыну ад ВПЧ у свае нацыянальныя праграмы імунізацыі дзяўчынак, а 47 краін — і хлопчыкаў. Сярод іх Літва, Польшча, Грузія, Казахстан, Узбекістан, Албанія і іншыя. У некаторых з гэтых краін вакцына цалкам бясплатная ці фінансуецца з бюджэту выключна для непаўнагадовых.
У Беларусі даўно ішло абмеркаванне, каб унесці вакцынацыю ад ВПЧ у нацыянальны каляндар прышчэпак і рабіць яе бясплатна. У 2024 годзе такое рашэнне нарэшце было прынятае для 11-гадовых беларусак.
Каментары