«Цяжка начамі не спаць». Фермеры паляць вогнішчы, каб уратаваць буякі ад замаразкаў

З-за начных замаразкаў пакутуюць не толькі звычайныя людзі, што хаваюцца пад некалькімі коўдрамі, але і фермеры, піша Onliner.by.

Так, у Баранавіцкім раёне ўжо пачалі паліць вогнішчы, каб уратаваць ураджай буякоў. Адна з такіх відэа падзялілася ў TikTok карыстальніца з нікам ruslana_10_10.

— Зноў ратуемся ад замаразкаў сёння. Буякі ў нас зацвілі, таму трэба нешта рабіць. Зараз салому будзем падкідваць мокрую, каб дым быў, — гаворыць аўтарка роліка.

Такія начныя дзяжурствы, на жаль, не рэдкасць. У мінулым годзе дзяўчыне давялося распальваць вогнішчы на сваёй тэрыторыі тры ночы запар. Але нават гэта не дапамагло.

— Потым нашу вёску накрыў град, і 80% ураджаю мы страцілі. Спадзяёмся, гэтай вясной такіх непрыемных сюрпрызаў ужо не будзе.

— Гэтым кустам прыкладна 10 гадоў, гэтым — чатыры гады. Мы ратуем вось гэтыя кветачкі. Ёсць ужо нават падмарожаныя — гэта бачна. Цяжка начамі не спаць, яшчэ ж асноўная праца ёсць. Але трэба нешта рабіць.

У каментарыях меркаванні падзяліліся: нехта пашкадаваў гаспадыню, а нехта, наадварот, зларадстваваў, намякаючы, што замаразкі — гэта карма за высокія цэны на ягады на рынку. Былі сярод каментатараў і прагматыкі, якія цікавіліся, ці зменіцца кошт буякоў з-за такіх непрадбачаных сітуацый.

— Цана трымаецца адна, няважна, ёсць яны ці няма. Яна будзе стандартная, ну можа, на рубель больш. Не перажывайце. Ягада будзе, і ўсім па кішэні, — адказала аўтарка відэа.

Onlíner удалося звязацца з аўтаркай роліка. Руслана прызналася: вырошчванне буякоў— гэта не асноўны заробак, а ўкладанне ў будучыню, «каб было чым на пенсіі займацца».

— Пакуль толькі ўкладваюся, а не зарабляю.

На ўчастку ў мясцовай жыхаркі — тысяча кустоў. Палова з іх ужо цвіце, другая палова — маладняк, якому замаразкі не страшныя. А вось квітнеючыя расліны — уразлівыя.

— Самі кусты вытрымліваюць да мінус пяці, максімум падмярзаюць верхавіны. Але самае ўразлівае — гэта кветкі. Мы ўжо трэці год ратуем ураджай вогнішчамі. Працуе гэта ці не — залежыць ад таго, які менавіта мароз і на якой стадыі бутон. Калі ён толькі набрак, то можа перажыць да мінус чатырох. А калі вяночак ужо раскрыўся — гіне пры мінус двух.

Паводле слоў Русланы, у вогнішчы галоўнае — дым. Калі ён распаўзаецца па градках, ён можа дадаць да тэмпературы плюс два градусы. Часам гэтага дастаткова, каб уратаваць ягады.

— Учора наспех накрывалі — збівалі дошкі, нацягвалі плёнку. Але гэта ўсё часовае. Насамрэч трэба рабіць сістэму тунэляў. А ў нас тут метраў семдзесят — даўжыня кожнага рада, а ўсяго іх сем! Уявіце, колькі трэба плёнкі або спанбонду. За дзень не справішся.

Ці дапамог такі своеасаблівы метад ратавання ў гэтым годзе, пакажа ўраджай.

— Сёння ўначы мы не ездзілі на ўчастак — не было сіл. Але затое кожную гадзіну ўставалі, правяралі тэмпературу: у нашай вёсцы марозу не было.

Побач з вёскай, кажа суразмоўца, ёсць вялікая фермерская гаспадарка, у якой 70 гектараў буякоў. І там таксама паляць вогнішчы.

— Мы пажарных папярэдзілі, ды і самі стараемся ўсё кантраляваць. Нам жа не агонь патрэбны, а дым!

• 2
• 0
• 1
• 0
• 0
• 6
• 0
• 0