У Беларусі абмяркоўваюць праект указа, які прадугледжвае абавязковую сертыфікацыю гасцініц паводле сістэмы зорак. Пра гэта паведаміла начальніца аддзела сертыфікацыі паслуг Беларускага дзяржаўнага інстытута стандартызацыі і сертыфікацыі Таццяна Смірнова ў эфіры тэлеканала «Першы інфармацыйны».
Паводле слоў чыноўніцы, праект указа ўжо прайшоў этапы ўзгаднення і цяпер знаходзіцца ва ўрадзе. Канчатковае рашэнне яшчэ не прынятае.
Пры распрацоўцы новай сістэмы ўлічваюць досвед Расіі, дзе сертыфікацыя сродкаў размяшчэння з’яўляецца абавязковай. Калі гатэль не адпавядае неабходным патрабаванням, орган па сертыфікацыі вызначае недахопы і тлумачыць, што трэба зрабіць для атрымання адпаведнай катэгорыі.
Прадугледжваецца паэтапнае ўвядзенне новых правіл. Да 1 студзеня 2028 года сертыфікацыю павінны будуць прайсці буйныя гатэлі, у якіх больш за 70 нумароў. Да 1 студзеня 2029 года гэтае патрабаванне плануюць распаўсюдзіць на гатэлі з менш чым 70 нумарамі.
Смірнова адзначыла, што працэс, як чакаецца, пройдзе без істотных цяжкасцяў, бо да ўвядзення абавязковай сертыфікацыі рыхтаваліся не першы год.
Цяпер у Беларусі працуе каля 600 гатэляў, але афіцыйныя сертыфікаты адпаведнасці пэўнай катэгорыі атрымалі толькі 90 з іх. Пяць гатэляў маюць пяць зорак, дзесяць — чатыры зоркі, 44 — тры зоркі, дзесяць — дзве зоркі. Яшчэ 12 устаноў маюць катэгорыю «без зорак». Акрамя таго, сертыфікацыю прайшлі дзевяць хостэлаў.
Інфармацыю пра афіцыйную сертыфікацыю гатэляў можна знайсці на сайце «Качество.бел» у раздзеле «Сертыфікаваныя гатэлі Беларусі». Там пазначаныя катэгорыі гатэляў і тэрміны дзеяння іх сертыфікатаў.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары