У Новалукомлі Тадэвуш Кандрусевіч асвяціў абраз, створаны штучным інтэлектам
Такое ўпершыню адбылося ў Беларусі, а магчыма, і ў свеце.
На абразе — Карла Акуціс — італьянскі падлетак, які распаўсюджваў каталіцкую веру праз інтэрнэт і стаў першым святым міленіялам.
11 кастрычніка ў касцёле святой Марыі Магдалены ў Новалукомлі арцыбіскуп-эмерыт Тадэвуш Кандрусевіч благаславіў новы абраз святога Карла Акуціса, паведамляе Katolik.life.
Пра тое, што выяву спецыяльна стварылі з дапамогай штучнага інтэлекту, падчас анлайн-трансляцыі імшы расказаў пробашч парафіі ксёндз Мікалай Ліпскі.
Абраз размясцілі ў бакавым алтары. Ён будзе служыць заслонай для абраза галоўнай апякункі парафіі — святой Марыі Магдалены.
Паводле пробашча, выявы гэтых двух святых злучаюць евангельскую гісторыю І стагоддзя з патрэбамі сучаснага лічбавага свету.
Карла Акуціс стварыў інтэрнэт-каталог эўхарыстычных цудаў і выкарыстоўваў сеціва для распаўсюджвання каталіцкай веры. Ён памёр ва ўзросце 15 гадоў, а ў 2025 годзе быў кананізаваны. Яго называюць апекуном моладзі і інтэрнэту.
Як піша Katolik.life, у сацсетках частка вернікаў раскрытыкавала ініцыятыву парафіі. Яны сцвярджаюць, што згенераваную штучным інтэлектам выяву нельга лічыць абразом і перад ёй не варта маліцца.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2828
Каментары