Сярэдні час у чарзе — 18 гадзін. Што адбываецца на выездзе з Польшчы ў Беларусь перад Вялікаднем?
Перад Вялікаднем многія беларусы, якія жывуць і працуюць у Польшчы, імкнуцца прыехаць на радзіму. Афіцыйна ў Польшчы дадаецца толькі адзін непрацоўны дзень — панядзелак пасля Вялікадня. У гэтым годзе ён выпадае на 21 красавіка. Але ўжо з чацвярга, 17 красавіка, у польскіх школах пачынаюцца канікулы, і многія бяруць выходныя дні. Выданне Most вывучыла памежныя чаты і даведалася, якія цяпер чэргі на выездзе з Польшчы ў Беларусь.
Беларусы, якія прыехалі на мяжу аўтамабілем 15-га і раніцай 16 красавіка, расказваюць, што ў сярэднім праходжанне мяжы па зялёным калідоры (чаканне і кантроль з абодвух бакоў) заняло ў іх каля 18 гадзін. У большасці выпадкаў у сем'яў з маленькімі дзецьмі часу ішло прыкладна столькі ж.
На дэталёвы дагляд з беларускага боку скардзяцца адзінкі. Часцей беларусы пішуць, што дагляд рэчаў быў альбо павярхоўным, альбо дбайным, але без накіравання на рэнтген.
«Ішла наперад і блакавала ўезд»
Як заўсёды, калі час чакання павялічваецца, з'яўляюцца людзі, якія спрабуюць уклініцца без чаргі. Таму тыя, хто чакае ў чарзе, імкнуцца самаарганізоўвацца, каб не пускаць такія машыны.
«Вельмі шмат машын, якія ўлазяць. Я думаю, усе хочуць як мага хутчэй прайсці мяжу. Давайце арганізуемся і пачнем нешта рабіць», — напісала ў тэлеграм-чаце «ГраницаВУ Беларусь-ЕС» удзельніца абмеркавання Вераніка.
Звычайна на барацьбу з тымі, хто спрабуе праехаць без чаргі, выходзяць пасажыры: кіроўцы застаюцца за рулём.
Супрацьстаянне, як правіла, заключаецца ў тым, каб стаць у зазоры паміж машынамі — так у іншых машын не атрымаецца ўбудавацца ў чаргу. Па начах некаторыя будзяць заснулых кіроўцаў, каб яны не забываліся прасоўвацца наперад.
«Я рабіла так. Ішла наперад і блакавала ўезд тым, хто спрабаваў улезці. Не без рызыкі для здароўя. Дзякуючы гэтаму, пакуль я стаяла, наша чарга хутка падышла, бо ніхто не ўлез. […] Таму бярыце некалькі чалавек з чаргі і ідзіце наперад. Калі, вядома, хочаце скараціць гадзін на пяць сваё стаянне. І рыхтуйцеся і ў паліцыю тэлефанаваць. А галоўнае — [на] відэа здымайце ўсе іх [парушальнікаў] дзеянні, — напісала Юлія.
Больш за 40 аўтобусаў
Тыя, хто перасякае мяжу аўтобусам, паведамляюць, што ў бок Беларусі ў чарзе стаіць больш за 40 аўтобусаў. Некаторыя карыстальнікі скардзяцца на затрымкі рэйсаў. Тыя, хто хоча скараціць час чакання, перасаджваюцца ў аўтобусы, якія стаяц уперадзе. Цану называюць 100 злотых (каля 26,5 даляра) з чалавека для рэйсаў да Брэста.
За падпіску на каналы трэш-блогера Мэлстроя цяпер будуць караць8
Каментары