Siaredni čas u čarzie — 18 hadzin. Što adbyvajecca na vyjeździe z Polščy ŭ Biełaruś pierad Vialikadniem?
Pierad Vialikadniem mnohija biełarusy, jakija žyvuć i pracujuć u Polščy, imknucca pryjechać na radzimu. Aficyjna ŭ Polščy dadajecca tolki adzin niepracoŭny dzień — paniadziełak paśla Vialikadnia. U hetym hodzie jon vypadaje na 21 krasavika. Ale ŭžo z čaćviarha, 17 krasavika, u polskich škołach pačynajucca kanikuły, i mnohija biaruć vychodnyja dni. Vydańnie Most vyvučyła pamiežnyja čaty i daviedałasia, jakija ciapier čerhi na vyjeździe z Polščy ŭ Biełaruś.
Biełarusy, jakija pryjechali na miažu aŭtamabilem 15-ha i ranicaj 16 krasavika, raskazvajuć, što ŭ siarednim prachodžańnie miažy pa zialonym kalidory (čakańnie i kantrol z abodvuch bakoŭ) zaniało ŭ ich kala 18 hadzin. U bolšaści vypadkaŭ u siemjaŭ z maleńkimi dziećmi času išło prykładna stolki ž.
Na detalovy dahlad ź biełaruskaha boku skardziacca adzinki. Čaściej biełarusy pišuć, što dahlad rečaŭ byŭ albo paviarchoŭnym, albo dbajnym, ale biez nakiravańnia na renthien.
«Išła napierad i błakavała ŭjezd»
Jak zaŭsiody, kali čas čakańnia pavialičvajecca, źjaŭlajucca ludzi, jakija sprabujuć uklinicca biez čarhi. Tamu tyja, chto čakaje ŭ čarzie, imknucca samaarhanizoŭvacca, kab nie puskać takija mašyny.
«Vielmi šmat mašyn, jakija ŭłaziać. Ja dumaju, usie chočuć jak maha chutčej prajści miažu. Davajcie arhanizujemsia i pačniem niešta rabić», — napisała ŭ telehram-čacie «HranicaVU Biełaruś-ES» udzielnica abmierkavańnia Vieranika.
Zvyčajna na baraćbu z tymi, chto sprabuje prajechać biez čarhi, vychodziać pasažyry: kiroŭcy zastajucca za rulom.
Supraćstajańnie, jak praviła, zaklučajecca ŭ tym, kab stać u zazory pamiž mašynami — tak u inšych mašyn nie atrymajecca ŭbudavacca ŭ čarhu. Pa načach niekatoryja budziać zasnułych kiroŭcaŭ, kab jany nie zabyvalisia prasoŭvacca napierad.
«Ja rabiła tak. Išła napierad i błakavała ŭjezd tym, chto sprabavaŭ uleźci. Nie biez ryzyki dla zdaroŭja. Dziakujučy hetamu, pakul ja stajała, naša čarha chutka padyšła, bo nichto nie ŭlez. […] Tamu biarycie niekalki čałaviek z čarhi i idzicie napierad. Kali, viadoma, chočacie skaracić hadzin na piać svajo stajańnie. I rychtujciesia i ŭ palicyju telefanavać. A hałoŭnaje — [na] videa zdymajcie ŭsie ich [parušalnikaŭ] dziejańni, — napisała Julija.
Bolš za 40 aŭtobusaŭ
Tyja, chto pierasiakaje miažu aŭtobusam, paviedamlajuć, što ŭ bok Biełarusi ŭ čarzie staić bolš za 40 aŭtobusaŭ. Niekatoryja karystalniki skardziacca na zatrymki rejsaŭ. Tyja, chto choča skaracić čas čakańnia, pierasadžvajucca ŭ aŭtobusy, jakija stajac upieradzie. Canu nazyvajuć 100 złotych (kala 26,5 dalara) z čałavieka dla rejsaŭ da Bresta.
Kaleha pamierłaha vykładčyka Ščukina: Jaho kinuła žonka ź dziećmi, pačałasia depresija. U vyniku zvolnili za prahuły9
Kamientary