«Leha» abviaščaje revalucyju: prezientavanaja sistema, jakaja ažyŭlaje kubiki biez smartfonaŭ. Voś jak jana pracuje i kolki kaštuje

Sercam novaj sistemy źjaŭlajecca «razumny kubik» (Smart Brick), jaki vonkava nahadvaje kłasičnuju detal 2x4, ale ŭnutry chavaje mahutnuju načynku. Inžyniery Lego raspracavali ŭłasny mikračyp, mienšy pa pamiery za adzin vystup na kubiku, i abstalavali jaho cełym naboram datčykaŭ: aksieleramietram, hiraskopam, datčykami śviatła i koleru, a taksama sintezataram huku.

Dziakujučy hetamu kubik razumieje, jak jaho trymajuć, kudy pieramiaščajuć i ź jakoj chutkaściu jon «lacić», imhnienna reahujučy adpaviednymi hukami i śvietłavymi efiektami, jakija hienierujucca ŭ realnym časie, a nie prajhrajucca ŭ zapisie.

Pavialičyć

Sistema pracuje na bazie troch uzajemaźviazanych elemientaŭ: samoha Smart Brick, śpiecyjalnych tehaŭ (Smart Tags) i razumnych mini-fihurak.

Tehi — heta nievialikija plitki, jakija «padkazvajuć» razumnamu kubiku, častkaj čaho jon zaraz źjaŭlajecca. Kali ŭstavić jaho ŭ madel z teham źniščalnika X-Wing, kubik pačnie vydavać huki ruchavikoŭ i łazieraŭ.

Razumnyja mini-fihurki taksama majuć ubudavanyja čypy: naprykład, kali pasadzić fihurku Darta Viejdera ŭ kabinu, sistema paznaje piersanaža i moža prajhrać znakamity «Impierski marš» albo charakternaje dychańnie. Voś jak heta vyhladaje:

Heta sapraŭdnaja technałahičnaja revalucyja dla kampanii, bo ŭsie elemienty ŭtvarajuć decentralizavanuju biespravadnuju sietku (BrickNet). Kubiki mohuć «razmaŭlać» adzin z adnym na adlehłaści, vyznačajučy svajo ŭzajemnaje raźmiaščeńnie bieź nieabchodnaści padklučeńnia da centralnaha chaba abo płanšeta.

Raspracoŭka viałasia bolš za 10 hadoŭ i ŭklučaje bolš za 20 zapatentavanych rašeńniaŭ, nakiravanych na toje, kab viarnuć dziaciej da fizičnych hulniaŭ, raźvivajučy ich kreatyŭnaść biez devajsaŭ z ekranami.

Pieršymi naborami, jakija atrymajuć padtrymku Smart Play, stanuć lehiendarnyja karabli z suśvietu «Zornych vojnaŭ». Zapusk budzie paetapnym, 1 sakavika 2026 hoda navinka stanie aficyjna dastupnaj tolki ŭ šaści krainach: ZŠA, Vialikabrytanii, Hiermanii, Francyi, Aŭstralii i susiedniaj z nami Polščy.

Ryłz pra novuju sistemu ad Associated Press

Košt startavych naboraŭ pačynajecca ad 40 jeŭra za nievialiki karabiel Luka da 160 jeŭra za nabor «Bitva za tron Darta Vejdara». Niekatoryja nabory sumiaščalnyja z Smart Play, a niekatoryja pradajucca jak All-in-one — to-bok tam jość usio patrebnaje dla taho, kab adrazu hrać.

Fiška ŭ tym, što kožny elemient nabora ciapier budzie «žyvym» — možna budzie imitavać bitvy karabloŭ, u jakich jość unutranaja sistema zaliku paškodžańniaŭ, dazapraŭlać ich na zapravačnych stancyjach, imitavać suviaź miž ziamloj i karablom. Dzieci mohuć sami madelavać uzajemadziejańni miž roznymi elemientami SmartPlay.

«Leha» ličyć, što hetaja płatforma vyznačyć raźvićcio industryi cacak na nastupnyja dziesiacihodździ, abjadnoŭvajučy nastalhiju pa kubikach ź pieradavymi technałohijami.

• 11
• 1
• 0
• 2
• 0
• 0
• 0
• 1