Praz Sankt-Pieciarburh u Vialikabrytaniju chacieli vyvieźci kavałak mietearyta vahoj u 2,5 tony. U Rasiju jaho pryvieźli ź Biełarusi
Rasijskija mytniki ŭ porcie Sankt-Pieciarburha spynili sprobu niezakonnaha vyvazu z Rasii bujnoha frahmienta niabiesnaha cieła. Padčas skanavańnia marskoha kantejniera 5 lutaha jany znajšli askołak mietearyta Aletaj vahoj bolš za 2,5 tony, jaki płanavali adpravić u Vialikabrytaniju. Pavodle acenak ekśpiertaŭ, jaho košt moža składać kala 323 miljonaŭ rasijskich rubloŭ (kala 4,19 miljona dalaraŭ), piša «Kommiersant».
Kaśmičny abjekt sprabavali pravieźci praź miažu, zadekłaravaŭšy jaho jak «skulpturu dla łandšaftnaha dyzajnu». Adnak pry detalovaj praviercy vyśvietliłasia, što sapraŭdnaje pachodžańnie i vartaść hruzu nie adpaviadajuć paznačanym u dakumientach źviestkam. U suviazi z hetym była zaviedziena kryminalnaja sprava pa artykule ab kantrabandzie stratehična važnych tavaraŭ abo kulturnych kaštoŭnaściaŭ, jakaja praduhledžvaje da piaci hadoŭ pazbaŭleńnia voli.
Pavodle infarmacyi ŚMI, da vyvazu mietearyta moh być datyčny pradprymalnik Alaksiej Varaniecki. Sam frahmient dastavili ŭ Sankt-Pieciarburh ź Biełarusi aŭtamabilnym transpartam. Jak jon apynuŭsia ŭ našaj krainie, nie paviedamlajecca.
Mietearyt Aletaj — heta askołak jadra staražytnaj protapłaniety ŭzrostam kala 4,5 miljarda hadoŭ. Jaho ŭpieršyniu znajšli ŭ 1898 hodzie na terytoryi sučasnaha Kitaja. Za doŭhi čas było sabrana bolš za 50 ton jaho frahmientaŭ, a ŭ 2021 hodzie navukoŭcy znajšli jašče kala 23 ton.
Ekśpierty adznačajuć, što asnoŭnaja kaštoŭnaść mietearytaŭ — nie pramysłovaja, a navukovaja i muziejnaja. Jany dapamahajuć vyvučać skład i pachodžańnie Soniečnaj sistemy i ŭnutranuju budovu płaniet. Choć mietearyty nie ličacca stratehična važnymi materyjałami, asobnyja ŭzory z bahataj historyjaj mohuć mieć značnuju kulturnuju vartaść i cikavaść dla kalekcyjanieraŭ.
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary
____________________________________
Navina tak napisana byccam by hety mietearyt biełaruski. U sapraudnasci hety mietearyt snojdzieny u Kitai u 19-m stahoddzi. Chtosci u Kitai kavałak jaho skrau i vioz na prodaž u JEZ, skarystaušysia dapamohaj rasijskaj i biełaruskaj darožnaj mafii. Nijakaj siensacyi tut niama.