Demakratyčnaja lidarka raspaŭsiudziła zvarot da Mižnarodnaha dnia abarony dziaciej, jaki adznačajecca 1 červienia.
Fota z telehram-kanała Śviatłany Cichanoŭskaj
«Dla baćkoŭ niama ničoha daražejšaha za dziaciej. Časta amal usio, što my robim, my robim z dumkaj pra ich. Kab jany mahli raści, pamylacca, maryć. Kab u ich atrymałasia toje, što nie atrymałasia ŭ nas. Ja mama dvuch dziaciej. I ja viedaju adčuvańnie, kali hladziš na dziaciej i dumaješ: chaj u vas budzie lepšaje žyćcio.
Chaj u vas budzie bolš mahčymaściaŭ. Niachaj vy budziecie ščaśliviejšyja za nas. Heta, napeŭna, samaje naturalnaje baćkoŭskaje žadańnie», — piša Śviatłana Cichanoŭskaja.
Na jaje dumku, jano zdajecca takim prostym, ale rečaisnaść u Biełarusi zaraz zusim inšaja.
«Dziacinstva ŭsio čaściej aznačaje, što treba vučycca maŭčać padparadkoŭvacca, bo režym bačyć u dzieciach nie asobaŭ sa svaim charaktaram i marami. Jon bačyć budučych «pravilnych» hramadzianaŭ.
Ale ž ci hetaha my chočam dla našych dziaciej? Miarkuju, što kožnaja mama sa mnoj pahadzicca — dzieci majuć prava raści inakš. Vučycca dumać krytyčna i samastojna, zadavać pytańni, spračacca, rabić svoj, niachaj i niapravilny vybar.
Biełaruskim dzieciam časta byvaje vielmi składana.
Maje dzieci byli maleńkimi, kali my źjechali ź Biełarusi, ale jany dobra viedajuć, što ŭ našaj krainie dyktatura i my nie možam viarnucca dadomu. Jość tyja, čyi baćki ŭ turmie i nie mohuć być pobač. Jość tyja, chto raście daloka ad domu, i tyja, chto zanadta rana navučyŭsia być aściarožnym: što možna skazać u škole, a pra što lepš maŭčać. Za ŭsim hetym — žyćcio dziciaci, jakomu vielmi patrebnaja mahčymaść prosta być dziciom.
Abarona dziaciej — heta nie tolki pra biaśpieku. Heta pra prava žyć doma, być pobač z baćkami i rodnymi. Prava na svabodu zadavać niazručnyja pytańni, spračacca, pamylacca i maryć. Na toje, kab raści ŭ krainie, dzie sapraŭdy možna nasałodžvacca dziacinstvam i nie bajacca. I heta mienavita toje, za što my zmahajemsia — za lepšuju budučyniu dla našych dziaciej», — miarkuje Śviatłana Cichanoŭskaja.
Kamientary