Praz novy ŭkaz Łukašenki zbory hrošaj dla ciažkachvorych stali na paŭzu

U Biełarusi ŭviali praviły zboru srodkaŭ dla akazańnia miedycynskaj dapamohi ŭ ramkach dabračynnaj dziejnaści — Alaksandr Łukašenka padpisaŭ ukaz ad №304 «Ab fondach i dabračynnaj dziejnaści ŭ śfiery achovy zdaroŭja». Bolšaść norm pačała dziejničać z 12 vieraśnia 2026 hoda. 

Raspaviadajem pra toje, jak ciapier možna źbirać danaty ŭ Biełarusi.

Kažučy prostaj movaj, źbirać hrošy dla miedycynskaj dapamohi mohuć fondy (kali ich adzinaja abo adna z met dziejnaści — dabračynnaja dziejnaść u śfiery achovy zdaroŭja), hramadskija abjadnańni i fizičnyja asoby. 

Važny niuans: čałaviek moža adkryć zbor dla siabie, muža ci žonki, blizkich svajakoŭ (baćkoŭ, dziaciej, bratoŭ i siaścior, dzieda, babuli, unukaŭ), dla niepaŭnaletniaha dziciaci, kali toje znachodzicca pad jaho apiekaj.

Tamu, naprykład, nielha arhanizavać zbor dla plamieńnika ci ciotki — kali tolki jany nie znachodziacca aficyjna pad vašaj apiekaj.

Pry hetym nielha adkryvać bolš za adzin dabračynny zbor na adnu metu. To-bok tearetyčna možna dakryć adzin dla siabie, adzin dla blizkaha svajaka (kali niechta jašče maje takuju patrebu), ale nielha adkryć niekalki zboraŭ u roznych bankach dla zboraŭ na lačeńnie adnaho čałavieka.

Kali ciapier u kahości adkryta niekalki roznych dabračynnych rachunkaŭ (a tak rabili — kab ludzi pieravodzili na toj bank, jaki im zručniejšy), čałaviek abaviazany ciaham dvuch miesiacaŭ vybrać adzin i pieravieści tudy ŭsie astatnija hrošy, a astatnija rachunki zakryć.

Taksama zastaŭsia varyjant źbirać na asabisty rachunak abanienta apieratara sotavaj suviazi (kali achvotnyja prosta pierakidvajuć hrošy na telefon). Ale ciapier hrošy, jakija pastupili na taki mabilny rachunak, štodnia pavinny pieravodzicca na dabračynny rachunak u banku.

Adzin z hałoŭnych momantaŭ ukazu №304 — faktyčnaja zabarona na samastojnaje rasparadžeńnie tymi hrašyma, jakija zanadanacili vyšej za abvieščany pamier zboru. Raniej, kali čałaviek, umoŭna kažučy, prasiŭ sabrać 100 tysiač rubloŭ, a jamu zadanacili 120 tysiač, jon moh sam vyrašyć, što rabić ź liškam. Moh dobraachvotna pieraličyć na niejki inšy zbor, a moh patracić na svaje dadatkovyja patreby.

Ciapier ža, kali zbor abviaščaje prosty čałaviek, jon abaviazany adrazu vyznačyć pamier zboru. Fondy, hramadskija abjadnańni heta rabić nie abaviazany.

Kali zajaŭlenaja suma sabrana, čałaviek pavinien ciaham dvuch dzion abjavić ab zakančeńni zboru ŭ tych ža krynicach, u jakich raniej paviedamiŭ ab zapusku inicyjatyvy. Kali pijaryli zbor u tyktoku i instahramie, tam ža treba i raspavieści pra jaho zakryćcio.

Sabranyja hrošy pavinny vykarystoŭvacca vyklučna na metu, dla jakoj arhanizavali zbor. Dadatkova za košt hetych srodkaŭ dazvalajecca apłačvać: prajezd čałavieka, jaki maje patrebu ŭ miedycynskaj dapamozie, da miesca jaje akazańnia i nazad; prajezd adnaho supravadžalnika (kali heta nieabchodna); pražyvańnie pacyjenta i supravadžalnika pa miescy akazańnia miedycynskaj dapamohi.

A voś na apłatu pracy ludziej, jakija pracujuć pa pracoŭnych dahavorach, danaty tracić nielha.

Hrošy, jakija pastupili na bankaŭski rachunak zvyš limitu, na praciahu troch miesiacaŭ treba pieraličyć na dabračynnyja rachunki inšych asob, na jakija zbor jašče praciahvajecca.

Što budzie, kali niechta hetaha nie zrobić? Lišak zabiaruć dobraachvotna-prymusova: bank pieradaść infarmacyju ŭ Minfin i Minzdaroŭja, a potym pieraviadzie hrošy na dabračynny rachunak dziaržaŭnaj miedustanovy, jakuju abiaruć čynoŭniki.

Toje samoje budzie zroblena, kali ciaham šaści miesiacaŭ paśla zaviaršeńnia zboraŭ na rachunku nie budzie nijakich apieracyj.

Normy, jakija rehulujuć prymusovy pieravod «zvyšlimitnych» srodkaŭ, ustupajuć u siłu z 12 sakavika 2027 hoda.

Praz novy ŭkaz ludzi ŭžo sutyknulisia z prablemami.

Niekatoryja biełarusy, jakija ŭžo źbirali praciahły čas hrošy na nieabchodnyja leki, skardziacca, što nie mohuć atrymlivać danaty praz numar MTS — mabilny apieratar časova zabaraniŭ heta rabić, pakul nie vyrašyć usie nieabchodnyja jurydyčnyja i techničnyja pytańni. 

Volha Karniejčuk z Homiela zapisała videazvarot da Łukašenki. Jaje siamja trapiła ŭ pastku novaha zakona. Sioleta maleńkaj Emilii pastavili strašny dyjahnaz — SMA druhoha typu.

11 vieraśnia ŭ RNPC «Maci i dzicia» adbyŭsia kansilium. Aficyjnaje zaklučeńnie miedyki adpravili paśla abiedu 14 vieraśnia. U toj ža dzień maci źviartałasia ŭ roznyja banki, kab adkryć dabračynny zbor dla dački, ale ŭsiudy atrymała admovu.

«Banki spasyłajucca na časovaje prypynieńnie pracedur u suviazi z ustupleńniem u siłu ŭkaza № 304. Žyćcio dziciaci zaležyć ad taho, nakolki chutka pačniecca lačeńnie, ale z-za techničnaj i jurydyčnaj paŭzy ŭ bankach ja pazbaŭlena zakonnaha prava ratavać svaju dačku».

Tamu maci terminova šukaje kvalifikavanych jurystaŭ i pravaabaroncaŭ, a taksama sprabuje dahrukacca da Łukašenki praz sacsietki.

• 2
• 0
• 0
• 5
• 0
• 6
• 13
• 0