Chakiery paviedamili pra ŭzłom sajta FBR i atrymańnie źviestak pra supracoŭnikaŭ

Chakiery śćviardžajuć, što atakavali FBR u adkaz na paviedamleńnie, apublikavanaje viedamstvam u mai 2026 hoda. U im apisvalisia mietady pracy hrupoŭki i ŭtrymlivaŭsia zaklik nie płacić vymahalnikam.

Pradstaŭniki ShinyHunters zajavili, što atrymali danyja «amal usich ahientaŭ FBR i ludziej, jakija padavali zajavy na pracu» ŭ biuro. U jakaści dokazu jany apublikavali skrynšot, nibyta zrobleny na źmienienym chakierami sajcie FBIjobs.gov, a taksama infarmacyju prykładna pra 5 tysiač ahientaŭ.

Ahienctva Reuters nie zmahło paćvierdzić sapraŭdnaść skrynšota, ale adznačyła, što sajt dla kandydataŭ na pracu ŭ FBR, vierahodna, sapraŭdy niadaŭna pracavaŭ sa zbojami. U paviedamleńni viedamstva ad 22 vieraśnia havaryłasia, što sajt i partał dla kandydataŭ na pasadu śpiecyjalnaha ahienta časova niedastupnyja.

U vystaŭlenym chakierami frahmiencie bazy źmiaščalisia imiony ahientaŭ, ich chatnija adrasy, numary sacyjalnaha strachavańnia, słužbovyja pasady, a ŭ niekatorych vypadkach i imiony členaŭ siemjaŭ.

Žurnalistam Reuters udałosia častkova paćvierdzić sapraŭdnaść niekatorych źviestak. Jany supastavili infarmacyju, u tym liku numary sacyjalnaha strachavańnia, z danymi kredytnych biuro i raniej skradzienymi źviestkami, jakija zachoŭvajucca ŭ kampanii District 4 Labs, što analizuje infarmacyju z darknetu.

Prynamsi ŭ dziesiaci vypadkach, u tym liku ŭ dačynieńni da dyrektara FBR Keša Pateła, žurnalisty znajšli źviestki, jakija, vidavočna, supadali. Krynica Reuters, znajomaja ź situacyjaj, taksama paviedamiła, što ŭ niekatorych vypadkach supadali apisańni słužbovych pasad.

Adnak Reuters nie zmoh vyśvietlić, adkul pachodziać hetyja danyja i ci byli jany sapraŭdy skradzienyja z unutranych sistem FBR, jak śćviardžajuć chakiery. Źviazacca ź ludźmi, čyje źviestki ŭvajšli ŭ apublikavany frahmient, žurnalistam nie ŭdałosia.

Byłaja supracoŭnica FBR Sincija Kajzier, jakaja ciapier zajmaje pasadu staršaj vice-prezidentki ŭ kampanii pa kibierbiaśpiecy Halcyon, zajaviła, što padobnyja ŭciečki ŭjaŭlajuć nadzvyčajnuju niebiaśpieku. Pavodle jaje słoŭ, złačyncy mohuć vykarystoŭvać skradzienyja danyja dla raskryćcia asobaŭ supracoŭnikaŭ, jakija rasśledujuć ich dziejnaść, i akazańnia na ich cisku.

Kajzier nahadała, što infarmacyja, vykradzienaja padčas uciečki ŭ 2016 hodzie, dahetul vykarystoŭvajecca dla pieraśledu supracoŭnikaŭ FBR. Jana padkreśliła, što paśla kradziažu takija źviestki mohuć vykarystoŭvacca biaskonca.

ShinyHunters ličycca adnoj z najbolš viadomych chakierskich hrupovak u śviecie. Siarod jaje niadaŭnich atak nazyvajuć mierkavany kradziež miljonaŭ biznes-zapisaŭ raspracoŭščyka videahulniaŭ Rockstar Games, stvaralnika Grand Theft Auto, a taksama travieńskuju ataku na adukacyjny instrumient Canvas, jakaja vyklikała maštabnyja zboi ŭ škołach ZŠA.

Raniej u vieraśni kampanija Anthropic, jakaja zajmajecca štučnym intelektam, paviedamiła pra vyjaŭleńnie chakieraŭ, źviazanych z ShinyHunters, jakija sprabavali vykarystoŭvać jaje instrumienty.

20 vieraśnia hrupoŭka zajaviła Reuters, što pačała supraćstajańnie ź inšaj viadomaj kibierzłačynnaj arhanizacyjaj cl0p. Publičnyja kanflikty pamiž chakierskimi hrupoŭkami sustrakajucca redka.

• 0
• 0
• 0
• 0
• 1
• 0
• 1
• 0