Charvi Vajnštejna asudzili jašče na 15 hadoŭ turmy za seksualny napad na asistentku

Upłyvovy ŭ minułym kinapradziusar Charvi Vajnštejn, raniej asudžany na praciahłyja terminy źniavoleńnia za niekalki seksualnych złačynstvaŭ, u sieradu pa vynikach novaha razhladu adnoj z kryminalnych spraŭ byŭ asudžany na 15 hadoŭ turmy, paviedamlaje Bi-bi-si.

Hety prysud u sudzie Ńju-Jorka vyniesieny pa abvinavačańni ŭ tym, što ciapier 74‑hadovy Vajnštejn u 2006 hodzie prymusiŭ da aralnaha seksu asistentku telepradziusara Mirjam Chejli.

Pieršy prysud pa hetym i jašče adnym punkcie abvinavačańnia — 23 hady turmy — Vajnštejn atrymaŭ u Ńju-Jorku jašče ŭ 2020 hodzie. Jon abskardziŭ prysud, i ŭ 2024 hodzie apielacyjny sud nakiravaŭ spravu na novy razhlad, zajaviŭšy, što sudździa dapuściŭ surjoznyja pamyłki.

Bolš za hod tamu, u červieni 2025 hoda, prysiažnyja apraŭdali Vajnštejna pa adnym epizodzie, ale pryznali vinavatym pa inšym, jaki tyčyŭsia Mirjam Chejli. I tolki ciapier sudździa pryznačyŭ jamu novy termin. Prakuror patrabavaŭ pakarać jaho 20 hadami, a abarona nahadvała, što pažyły Vajnštejn moža pamierci ŭ turmie.

Akramia turmy ŭ Ńju-Jorku, 74‑hadovaha Vajnštejna, jaki chvareje na rak i dyjabiet, čakaje jašče i turma ŭ Kalifornii.

U 2021 hodzie sud u Łos-Andželesie pryznaŭ jaho vinavatym pa troch z 11 vystaŭlenych jamu epizodaŭ zhvałtavańniaŭ i inšych seksualnych złačynstvaŭ i prysudziŭ da 16 hadoŭ źniavoleńnia.

Hety prysud Vajnštejn taksama abskardziŭ.

U sieradu, u pierapoŭnienaj zale suda, jon zaklikaŭ sudździu prajavić miłasernaść. «Ja nie schilny da hvałtu čałaviek, paškadujcie mianie! Ja ščyra prašu prabačeńnia va ŭsich, kamu pryčyniŭ bol», — skazaŭ jon.

Mirjam Chejli, jak pieradaje ahienctva AFP, zajaviła ŭ sudzie, što paśla taho, što Vajnštejn ź joj zrabiŭ, jana sama pieražyvaje dośvied, supastaŭny z pažyćciovym źniavoleńniem, i pakutuje ad posttraŭmatyčnaha stresavaha rasstrojstva.

Jana znoŭ zajaviła, što Vajnštejn złoŭžyŭ svajoj uładaj, prymusiŭšy jaje da seksu, i što jaje hłyboka ŭzrušyła toje, što jon ličyŭ jaje małavažnaj asobaj, ź jakoj možna tak pastupić.

Sutnaść bolšaści abvinavačańniaŭ suprać Vajnštejna ŭ tym, što jon prymušaŭ da seksu maładych žančyn, jakija raźličvali na jaho zastupnictva i dapamohu ŭ karjery ŭ kinaśviecie.

Abarona Vajnštejna nastojvaje, što jaho mierkavanyja achviary ŭstupali ź im u seksualnyja adnosiny pa ŭzajemnaj zhodzie, a abhavaryli jaho tamu, što ich karjera, niahledziačy na heta, nie skłałasia tak, jak jany spadziavalisia.

U prymusie da seksu Vajnštejna publična abvinavacili dziasiatki žančyn, ale bolšaść hetych abvinavačańniaŭ nie dajšła da suda i nie skončyłasia prysudami.

• 0
• 0
• 1
• 3
• 0
• 0
• 0
• 0