Stała viadoma pra vyzvaleńnie Alaksandra Aranoviča — kiroŭcy aŭtadoma «Krainy dla žyćcia», jakoha aryštavali razam ź Cichanoŭskim

Alaksandr Aranovič. Fota: Viasna

Vyjšaŭ na svabodu 43‑hadovy Alaksandr Aranovič. Jamu prysudzili 6 hadoŭ kałonii za «arhanizacyju dziejańniaŭ, što hruba parušajuć hramadski paradak» (č. 1 art. 342 KK), a taksama za «padrychtoŭku da ŭdziełu ŭ masavych biesparadkach» (č. 2 art. 13, art. 293 KK). Adzinym «dokazam» apošniaha abvinavačańnia stała staraja dymavaja šaška, jakuju nibyta znajšli na haryščy baćkoŭskaj chaty ŭ Starych Darohach padčas užo treciaha pieratrusu.

Aranovič — uradženiec Starych Daroh, čałaviek, daloki ad palityki ŭ zvykłym sensie. Skončyŭ Babrujskaje vučylišča alimpijskaha reziervu, da 2015 hoda byŭ indyvidualnym pradprymalnikam, zajmaŭsia hruzapieravozkami, jeździŭ na zarobki ŭ Rasiju.

Viasnoj 2020 hoda Aranovič dałučyŭsia da kamandy jutub-kanała «Kraina dla žyćcia» Siarhieja Cichanoŭskaha i sieŭ za rul taho samaha aŭtadoma, na jakim błohiery abjazdžali rehijony i źbirali ludziej na sustrečy. Mienavita jon vioŭ mašynu — i mienavita jaho pieršym sprabavali dastać siłaviki.

Upieršyniu imia Aranoviča prahučała 5 maja 2020 hoda ŭ Mahilovie, kudy kamanda pryjechała na sustreču z padpisčykami. DAI spyniła aŭtadom i pasprabavała zatrymać kiroŭcu — ale ludzi abstupili mašynu z usich bakoŭ i prosta nie padpuścili da jaje milicyju. Praŭda, praź niekalki sutak Aranoviča ŭsio ž zatrymali. Dali 6 sutak, ale paśla adbyćcia vyzvalili.

Pavialičyć

Doŭha heta nie ciahnułasia. 29 maja 2020 hoda ŭ Hrodnie Aranoviča zatrymali razam ź Siarhiejem Cichanoŭskim i inšymi ŭdzielnikami kamandy padčas pikieta pa zbory podpisaŭ. Z taho dnia jon bolš nie vychodziŭ na svabodu.

Aranoviča abvinavačvali ŭ tym liku ŭ tym, što jon nibyta apranuŭsia ŭ adzieńnie, padobnaje da taho, u jakim byŭ Cichanoŭski, kab zabiaśpiečyć jahonuju abaronu na mierapryjemstvie i ŭ budučyni dapamahčy jamu schavacca.

Sudździa Leninskaha rajona Hrodna Alena Piatrova ahučyła prysud 27 krasavika 2021 hoda — 6 hadoŭ źniavoleńnia. U spravie nie było nivodnaha pakazańnia samoha Aranoviča — na śledstvie i ŭ sudzie jon admoviŭsia davać pakazańni i vinu nie pryznaŭ.

Padčas adbyćcia pakarańnia palitviaźniu dadali jašče paŭhoda — za «niepadparadkavańnie».

Aranoviča trymali ŭ Voŭčych Norach, u Vaŭkavysku, a taksama na turemnych umovach u Mahilovie.

U vyniku palitviazień całkam adsiedzieŭ pryznačany jamu termin. Jon vyjšaŭ na svabodu ŭ mai 2026 hoda.

• 0
• 0
• 0
• 0
• 0
• 0
• 0
• 0