Kadebešniki telefanujuć biełarusam u emihracyi praź ich siabroŭ — čaho chočuć?
Siabroŭ Antona (imia źmienienaje pa prośbie hieroja) pa čarzie pačali vyklikać supracoŭniki KDB. Pryčym sustrečy pryznačalisia chitrym šlacham — ich apieratyŭna vyklikali ci ŭ DAI, ci ŭ padatkovuju, ci ŭ pašpartny stoł, ale na miescy ich sustrakali supracoŭniki KDB.
Anton nie žyvie ŭ Biełarusi z 2022 hoda. Pieršy raz siłaviki vyjšli na jaho paru miesiacaŭ tamu, akurat praź siabra.
«Jany pazvanili mnie z telefona siabra, kab ja dakładna padniaŭ słuchaŭku. Jak ja zrazumieŭ, jany ž raniej datelefanoŭvalisia da mianie ź biełaruskaha numara sami, ale ja ihnaravaŭ», — raskazvaje mužčyna.
«Tavaryš adrazu skazaŭ mnie, što jon znachodzicca ŭ atačeńni supracoŭnikaŭ orhanaŭ i sa mnoj chočuć parazmaŭlać. Kadebist nazvaŭ imia i bolš nijakaj infy pra siabie nie daŭ, skazaŭ: «Nielha». Adrazu abaznačyŭ, što baćkoŭ jon nibyta śpiecyjalna nie turbavaŭ, bo jany ŭ hadach».
Najpierš surazmoŭcu cikavili danaty na Połk Kalinoŭskaha i najaŭnaść žadańnia papoŭnić jaho šerahi ci znajomyja, jakija ŭžo słužać tam.
«Jon adrazu abaznačyŭ, što ŭ ich jość usie śpisy danacioraŭ, i ja siarod hetych šerahaŭ».
Dalej supracoŭnik pačaŭ raspytvać pra dyjasparu, chto arhanizatar mitynhaŭ za miažoj, ale Anton abaznačyŭ, što pra inšych ludziej razmaŭlać nie źbirajecca, tolki pra siabie.
«Jon zapytaŭ mianie, ci chaču ja viarnucca ŭ Biełaruś, i skazaŭ, što moža z hetym dapamahčy. Try razy paŭtaryŭ «davaj pracavać, i ja tabie dapamahu viarnucca na radzimu». Ale jasna, što ŭsio heta chłuśnia. Na supracoŭnictva ź siłavikami moža pahadzicca tolki toj, chto žyvie ŭ tanku».
Pa infarmacyi surazmoŭcy, supracoŭniki KDB taksama dapytali inšych jaho siabroŭ. Paśla hetaha tyja pierastali vychodzić ź im na suviaź i padtrymlivać choć jakuju kamunikacyju.
Taksama Anton raspavioŭ, što niechta ciaham amal dvuch hadoŭ metanakiravana i niaspynna sprabuje ŭzłamać jaho biełaruski telehram.
Raniej my raskazvali, jak kadebešniki sprabujuć vierbavać biełarusaŭ-emihrantaŭ praź ich baćkoŭ.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie17
Kamientary
Značyć, možna cisnuć na ich samich praź ich siabroŭ i svajakoŭ - žonak, baćkoŭ, bratoŭ, siaścior, ciotak, dziadziak, synoŭ, dačok.