U Minsku žorstka pakarali zabojcaŭ kirhizskaha kryminalnaha aŭtaryteta

Minski haradski sud 6 žniŭnia vynies prysud pa spravie ab zabojstvie kryminalnaha aŭtaryteta Ałmanbieta Anapijajeva. Hramadzianie Kyrhyzstana Hulžyhit Abiłazizaŭ i Biektursun Tarobajeŭ pryznanyja vinavatymi ŭ zabojstvie z asablivaj žorstkaściu, učynienym hrupaj asob, piša vydańnie vesti.kg.

Abiłazizaŭ asudžany na 18 hadoŭ kałonii ŭzmocnienaha režymu. Jaho zatrymali 6 žniŭnia 2024 hoda ŭ Kazachstanie, paśla čaho ekstradavali ŭ Biełaruś. Tarabajeŭ, zatrymany 15 lipienia 2025 hoda ŭ Rasii, atrymaŭ 13 hadoŭ kałonii ŭzmocnienaha režymu. Jašče adzin fihurant spravy znachodzicca ŭ mižnarodnym vyšuku.

Pry hetym imia zakazčyka zabojstva ŭ prysudzie nie nazvanaje. Rasśledavańnie ŭ dačynieńni da mierkavanych arhanizataraŭ praciahvajecca. Taksama pravaachoŭnyja orhany praviarajuć abstaviny dačy Abiłazizavym iłžyvych pakazańniaŭ kyrhyzstanskim śledčym.

Ałmanbiet Anapijajeŭ, viadomy ŭ kryminalnym asiarodździ jak Ałmanbiet Ałajski, pavodle danych MUS Kyrhyzstana, ličyŭsia lidaram złačynnaj hrupoŭki. U viedamstvie śćviardžali, što jon zabiaśpiečvaŭ jaje ŭdzielnikaŭ zbrojaj i hrašyma, atrymanymi ŭ vyniku kantrabandy narkotykaŭ.

U śniežni 2012 hoda ZŠA ŭviali finansavyja sankcyi suprać šerahu hramadzian Kyrhyzstana, jakich źviazali ź jeŭrazijskaj złačynnaj hrupoŭkaj «Braterski kruh». U śpis trapiŭ i Anapijajeŭ.

Jaho taksama nazyvali adnym z najbližejšych paplečnikaŭ Kamčy Kalbajeva. Pavodle danych HUBAZiK MUS, Anapijajeŭ nibyta zabiaśpiečyŭ zbrojaj členaŭ hrupoŭki Kalbajeva dla arhanizacyi zamachu na Ryśbieka Akmatbajeva. U milicejskaj daviedcy jaho nazyvali adnym z troch najbolš nabližanych da Kalbajeva asob i «pradstaŭnikom» u paŭdniovych rehijonach Kyrhyzstana.

Cieła Anapijajeva vyjavili ŭ bahažniku aŭtamabila na adnoj z vulic Minska ŭ noč z 16 na 17 lutaha 2015 hoda. Jano było zahornutaje ŭ niekalki koŭdraŭ, ruki źviazanyja, a na hałavie znachodziŭsia sini płastykavy pakiet. U zahinułaha było pierarezana horła, na śpinie vyjavili čatyry nažavyja ranieńni, jakija stali śmiarotnymi.

Praź niekalki dzion paśla zabojstva ŭ Kyrhyzstanie źjaviŭsia Hulžyhit Abiłazizaŭ, jaki pradstaŭlaŭsia kucharam i ciełaachoŭnikam Anapijajeva. Praz advakata jon zajaviŭ, što staŭ vypadkovym śviedkam raspravy i nibyta apaznaŭ napadnikaŭ.

Paźniej biełaruski bok nieadnarazova sprabavaŭ pravieści jaho dopyt u ramkach rasśledavańnia, adnak śledčyja dziejańni ź jaho ŭdziełam nie adbylisia. Paśla Abiłazizaŭ byŭ zatrymany ŭ Kazachstanie i ekstradavany ŭ Biełaruś.

Ciapier sud pryznaŭ jaho niepasrednym vykanaŭcam zabojstva. Pry hetym pytańnie pra toje, chto arhanizavaŭ złačynstva i stajaŭ za jaho vykanaŭcami, zastajecca adkrytym.

• 1
• 0
• 1
• 1
• 1
• 0
• 0
• 0