U Polščy biełaruska zdymała hrošy ŭ bankamacie, a jaje raptam akružyli troje mužčyn

Paśla naviny pra toje, što ŭ Varšavie abrabavali i sprabavali skraści biełarusa, kali jon unosiŭ hrošy na rachunak praz bankamat, z Most źviazałasia biełaruska Vieranika, jakaja raniej apynułasia ŭ anałahičnaj situacyi. Jaje historyja skončyłasia dobra, bo ŭ situacyju ŭmiašalisia inkasatary. Dziaŭčyna raskazała padrabiaznaści.

«Pabajałasia zabirać hrošy z bankamata»

Było kala druhoj hadziny dnia, kali Vieranika padyšła da bankamata, raźmieščanaha ŭ centry horada, pobač z adździaleńniem banka, praduktovymi kramami i aptekaj, kab źniać 2 tysiačy złotych sa svajho rachunku (kala 460 jeŭra). Pavodle słoŭ dziaŭčyny, prykładna za 200 mietraŭ ad bankamata znachodzilisia «troje mužčyn niesłavianskaj źniešnaści va ŭzroście ad 40 da 50 hadoŭ».

Kali Vieranika pačała zdymać hrošy, mužčyny niečakana nablizilisia da jaje amal uščylnuju — na adlehłaść mienš za mietr. Pavodle adčuvańniaŭ biełaruski, jany nibyta akružyli jaje z troch bakoŭ.

Hrošy dziaŭčyna zdymała z dapamohaj sistemy Blik, jakaja nie patrabuje bankaŭskaj karty. U mabilnym dadatku dastatkova zhienieravać šaściznačny kod, uvieści jaho na ekranie bankamata i paćvierdzić apieracyju ŭ dadatku. Paśla hetaha bankamat vydaje zapytanuju sumu.

— Ja pabajałasia zabirać hrošy z bankamata. Praihnaravała heta paćviardžeńnie — i bankamat admianiŭ [apieracyju]. Zrabiła vyhlad, što nie viedaju, jak źniać hrošy, i pačała nanova naciskać knopki, — raskazvaje dziaŭčyna.

U hety momant da bankamata padyšli inkasatary. Zaŭvažyŭšy, što mužčyny stajać ad dziaŭčyny praktyčna ŭščylnuju, jany zrabili im zaŭvahu.

— Skazali, što, kali čałaviek zdymaje hrošy ŭ bankamacie, nielha stajać tak blizka, — uspaminaje biełaruska.

Mužčyny nie stali spračacca abo tłumačyć, što prosta čakajuć svajoj čarhi. Zamiest hetaha jany moŭčki raźviarnulisia i pajšli.

— Heta było vielmi dziŭna. Bo kali b ja, naprykład, stajała ŭ čarzie, to ja b paprasiła prabačeńnia i prosta adyšła dalej, — razvažaje dziaŭčyna.

Vieranika padziakavała supracoŭnikam inkasacyi i spakojna zaviaršyła apieracyju.

Jak biaśpiečna zdymać hatoŭku abo papaŭniać rachunak u bankamacie

Polskaja palicyja pryvodzić pieralik mier zaściarohi, jakija dapamohuć paźbiehnuć niepryjemnaściaŭ padčas apieracyj u bankamacie.

Rekamiendujecca chadzić da bankamata ŭ supravadžeńni inšaha čałavieka, naprykład siamiejnika, siabra abo dobraha znajomaha.

Taksama varta vybirać pryłady, jakija znachodziacca ŭnutry adździaleńniaŭ bankaŭ. U niepracoŭnyja hadziny i vychodnyja dni dostup da takich bankamataŭ zvyčajna ažyćciaŭlajecca z dapamohaj bankaŭskaj karty, što pavyšaje biaśpieku. Kali treba źniać bujnuju sumu, lepš zrabić heta niepasredna ŭ supracoŭnika banka ŭ adździaleńni.

Pierad zdymańniem najaŭnych abo papaŭnieńniem rachunku varta azirnucca i pierakanacca, što pobač niama ludziej, jakija padazrona nazirajuć za bankamatam. Kali jość takaja padazronaść, varta adkłaści apieracyju.

Kali padčas apieracyi spatrebicca dapamoha, nie varta źviartacca da vypadkovych minakoŭ. Lepš źviazacca sa słužbaj padtrymki banka abo źviarnucca pa dapamohu da supracoŭnika adździaleńnia.

Abaviazkova varta źviarnuć uvahu i na źniešni vyhlad bankamata. Kali niešta vyklikaje padazreńni, naprykład adčuvajucca nakładki na kłavijatury abo kartrydary, lepš skarystacca inšaj pryładaj.

Pry źniaćci hrošaj varta stać tak, kab zakryć ad starońnich pohladaŭ uvod PIN-koda i sumu apieracyi. Pry ŭvodzie koda rekamiendujecca prykryvać kłavijaturu rukoj, kab mahčymaja schavanaja kamiera nie zmahła jaho zafiksavać.

Paśla źniaćcia najaŭnych nie varta pieraličvać hrošy na vačach u inšych — lepš adrazu prybrać ich u kašalok.

• 3
• 0
• 0
• 2
• 4
• 0
• 2
• 0