Hučnaja historyja ŭ maskoŭskim mietro: mužčyna ciskaŭ 13‑hadovuju školnicu va ŭsich na vačach. U sacsietkach jaho vyličyli
Sam jon kazaŭ, što jamu 17, ale nasamreč 29. Vypadak užo niekalki dzion abmiarkoŭvajuć u sacsietkach.
Historyja pačałasia z taho, što juryst Kirył źviarnuŭ uvahu na dziŭnyja pavodziny mužčyny ŭ maskoŭskim mietro (heta było 27 maja).
«Učora ŭ mietro darosły chłopiec ciskaŭ i całavaŭ u vahonie dziaŭčynku, ja sumniavajusia, što joj jość 14. Uvieś vahon maŭčaŭ. Jak zaŭsiody, mnie bolš za ŭsich treba, ź imi zahavaryŭ. Chłopiec skazaŭ, jamu 17, dziaŭčyncy 15, na nastupnaj stancyi vyskačyli z vahona».
U sacsietkach chutka vyśvietlili, što mužčynu dakładna nie 17, a kala 30 i jon maje kaviarniu ŭ pasiołku Kamunarka ŭ Padmaskoŭi. Juryst, jaki staŭ vidavočcam sceny ŭ mietro, napisaŭ zajavu ŭ palicyju. Sama historyja razyšłasia pa sacsietkach.
Jak pisaŭ telehram-kanał «Ostorožno, novosti», u toj kaviarni ŭ Kamunarcy ŭ asnoŭnym pracujuć i źbirajucca padletki. 29‑hadovy Illa Š., jakoha źniali ź dziaŭčynkaj u mietro, raniej zajmaŭsia videapradakšenam. Dla zdymak filma jon pravodziŭ kastynh ź niepaŭnaletnimi.
Taksama ŭ rasparadžeńni kanała apynulisia skrynšoty pierapiski Illi z 15‑hadovaj dziaŭčynkaj. Jon vyprošvaŭ u jaje intymnyja fota i sprabavaŭ prymusić da pałavoha aktu. Pa słovach paciarpiełaj, heta adbyłosia ŭ 2021 hodzie, u toj momant Illa žyŭ na Bali. Dziaŭčyna dumała, što ŭ ich adnosiny. Kali mužčyna pryjechaŭ u Maskvu, to staŭ nastojvać na intymnaj blizkaści. Nieŭzabavie Illa pačaŭ novyja stasunki, dziaŭčynie taksama było 15 hadoŭ. U pierapiskach Illa taksama vychvalaŭsia svaimi znosinami z 14‑hadovymi dziaŭčatkami, dasyłaŭ fota maleńkich himnastak z kamientarami ab ich fihurach.
Sam Illa tłumačyŭ, što školnica jaho dobraja znajomaja, nie raz była ŭ jaho kaviarni, a jechała ŭ jaho na kaleniach, bo nibyta ŭ vahonie nie było miescaŭ. A nakiroŭvalisia jany nibyta piačy novaje piečyva ŭ kaviarniu jaho maci. Pierapisku z małaletnimi Illa nazvaŭ fejkam. Barysta raskazaŭ, što ŭ jaho była najlepšaja siabroŭka, ź jakoj jon vykładvaŭ fota, ale jany daŭno nie kamunikujuć, i joj užo spoŭniłasia 18. Pry hetym telehram-kanał «112» znajšoŭ mahčymyja kamientary Illi, dzie jon pryznajecca niepaŭnaletnim u kachańni i nazyvaje ich svaimi čaroŭnymi dziaŭčatkami.
29 maja Illu Š. zatrymali. Jamu vystavili abvinavačvańni. Pavodle viersii śledstva, jon ździejśniŭ raspusnyja dziejańni ŭ dačynieńni da 13‑hadovaj dziaŭčynki ŭ rajonie stancyi Baravickaja. Praviarajuć datyčnaść mužčyny i da inšych anałahičnych złačynstvaŭ.
Kamientary