«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?

«Ja dumaju, što vidavočna budzie lepš, čym raniej. Nu abo jak minimum lepš, čym mahło b być. Ja nie sustrakaŭ nivodnaha vajskoŭca, chto b nie pavažaŭ Drapataha. Z Syrskim roŭna naadvarot», — tak adkazaŭ Cimuru ŭviečary 21 lipienia znajomy, jaki vajuje ŭ Desantna-šturmavych.

«I tak dumaje nie adzin jon. Miarkujučy pa kanałach vajskoŭcaŭ (jakija ŭ armii da 2022 hoda), jany daŭno chacieli Drapataha. Drapaty maje idejnaść. U hetym jon blizki da ludziej typu Bileckaha, Redzisa [Prakapienki], Fiodarava, Fłeša [Biaskresnava]», — kaža Cimur.

Voś što jašče patłumačyŭ nam Cimur.

Mitynhi padčas vajny

Upieršyniu z časoŭ pratestaŭ vakoł NABU i SAP ukrainskija harady znoŭ ubačyli masavyja mitynhi — i nie suprać akupanta, a praz unutrypalityčnaje rašeńnie ŭłady. Farmalna kraina žyvie ŭ režymie vajennaha stanovišča, pry jakim masavyja akcyi abmiežavanyja zakonam. Ale ŭžo amal tydzień ludzi vychodziać na płoščy — i ich nichto nie razhaniaje. Dla dziaržavy ŭ stanie vajny heta redkaja i krasamoŭnaja karcina, i mienavita ź jaje varta pačynać, kab zrazumieć maštab padziej.

Usio pačałosia sa zvalnieńnia Uładzimiram Zielenskim ministra abarony Michaiła Fiodarava. Rašeńnie vyklikała šyroki rezanans nasampierš tamu, što nie supravadžałasia nijakaj publičnaj kamunikacyjaj: hramadstvu nie patłumačyli, čamu tak stałasia. Pra podbiŭku — sistemny kanflikt ministra z hałoŭnakamandujučym USU Alaksandram Syrskim — stała viadoma ŭžo paźniej, u značnaj stupieni dziakujučy žurnalistam.

Pavodle danych vydańnia The Economist, Fiodaraŭ damahaŭsia adchileńnia ad pasady Syrskaha, a praviedzieny ministerstvam aŭdyt nibyta vyjaviŭ miljardnyja pieravytraty ŭ abaronnym viedamstvie.

16 lipienia Fiodaraŭ vyjšaŭ da žurnalistaŭ i faktyčna pieravioŭ schavanaje supraćstajańnie ŭ adkrytuju płoskaść. Jon paćvierdziŭ kanflikt, zajaviŭ, što Syrski staviŭ jamu ŭltymatumy i błakavaŭ inicyjatyvy ministerstva, — i adnačasova pryznaŭ, što hałoŭkam «uratavaŭ krainu» padčas abarony Kijeva ŭ 2022 hodzie. Razam ź ministram u adstaŭku pajšli i jaho miedyjnyja daradcy — Siarhiej Ściarnienka i Siarhiej Biaskresnaŭ («Fłeš»).

Reakcyju hramadstva spravakavała mienavita hetaja zajava. Užo 17 lipienia ŭ Kijevie na padtrymku Fiodarava sabralisia dziasiatak tysiač ludziej, a pratesty achapili bolš čym paŭtara dziasiatka haradoŭ.

Arhanizataram vystupiŭ vieteran rasijska-ukrainskaj vajny Dźmitryj Kaziacinski, jaki abvinavaciŭ Syrskaha ŭ tym, što toj «zajmajecca palitykaj zamiest frontu», demaralizuje armiju i sabatuje reformy.

Pakazalna, što spačatku mitynhi byli depiersanalizavanymi. Ludzi vychodzili nie «za kankretnaha ministra» — pra heta kazaŭ i sam Fiodaraŭ, — a za ideju: za reformy, technałohii, za inšuju jakaść viadzieńnia vajny. I tolki paźniej pratest sfakusavaŭsia ŭ łozunh, jaki pačali skandavać na płoščach ad Kijeva da Ivana-Frankoŭska: «Fiodaraŭ — ministr, Drapaty — hałoŭkam».

Mieniedžarskaja viłka Zialenskaha

Rašeńnie było składanym, treba pryznać. Kali dvoje klučavych ludziej nie mohuć pracavać razam, a ad ich supracoŭnictva zaležyć supolnaja sprava, kłasičnaje mieniedžarskaje rašeńnie — zvolnić adnaho. I tut była viłka: cyvilny ministr, jaki adkazvaje za łahistyku, zakupki i prasoŭvańnie technałahičnych prajektaŭ, — ci hałoŭnakamandujučy sa sfarmavanaj vajennaj stratehijaj, zamiena jakoha aznačaje łamańnie hetaj stratehii i doŭhuju adaptacyju.

Cana času ciapier nadzvyčaj vysokaja. Šmat chto ličyć, što va Ukrainy adkryłasia akno mahčymaściej — pierachapić inicyjatyvu da parłamienckich vybaraŭ u Rasii, jakija adbuducca 18—20 vieraśnia. Ukrainskaje kiraŭnictva publična nie vyklučaje, što adrazu paśla vybaraŭ Maskva moža abviaścić novuju chvalu mabilizacyi, jakuju dahetul adkładvała. To-bok rachunak idzie na tydni.

Kastynh doŭžyŭsia tolki niekalki dzion

Dalej prezident demanstratyŭna sustrakaŭsia z vajskoŭcami — siarod ich byli Michaił Drapaty, Apostał, Harbaciuk, Bilecki, Abalenski, Prakapienka. Heta byŭ «kastynh» novaha hałoŭkama: ci to Drapaty, ci to Apostał jak kampramisnaja, nabližanaja da Syrskaha fihura.

Drapaty, da słova, publična padtrymaŭ Fiodarava, skazaŭšy, što šmat rašeńniaŭ eks-ministru davodziłasia pravodzić nasupierak sistemie, a nie dziakujučy joj.

Pavialičyć

Padčas hetaha pracesu kraina atrymała kałonku samoha Syrskaha — «Maja praca — vajna». I tut važna być dakładnym: Syrski kanflikt adprečvaje. Jon raźmiažoŭvaje adkaznaść — ministerstva heta zabieśpiačeńnie, zakupki i cyvilny kantrol, a stratehija i płanavańnie apieracyj, pavodle zakona, lažać na im. Patrabavańnie publična «prezientavać stratehiju» jon nazvaŭ patrabavańniem prezientavać jaje vorahu. I asobna padkreśliŭ, što budzie supracoŭničać ź lubym ministram, jakoha pryznačyć dziaržava.

Arhumienty byłoha hałoŭkama byli nie biespadstaŭnyja. Prablema chutčej u tym, što kałonka nie adkazała na čullivyja pytańni, jakija staviać i hramadstva, i častka vajskoŭcaŭ. A pytańniaŭ šmat. Syrskaha ceniać jak žorstkaha antykryzisnaha mieniedžara, zdolnaha «razrulić» najskładaniejšyja situacyi, — ale krytykujuć za mikramieniedžmient i schilnaść vyrašać zadačy chutčej kolkaściu, niž jakaściu. Jaho padychod vyklikaje ŭ kamandziraŭ chłuśniu ŭ svaich dakładach. Mienavita hety dakor — «maleńkaja savieckaja armija nie pieramoža vialikaj savieckaj armii» — i jość niervam pratestu.

Trochi infarmacyjnaj vajny ŭ pracesie

Zamiest jasnaha adkazu kraina atrymała spabornictva naratyvaŭ. Kamandavańnie Sił łahistyki USU napisała pra toje, što łahistyka pry Fiodaravie nibyta pahoršała. Adnak za paŭhoda skarhaŭ na zabieśpiačeńnie ad vajskoŭcaŭ nie było, a takija prablemy zvyčajna zaŭvažajuć chutka. Post chutka byŭ vydaleny.

Najbolš balučy epizod — historyja pałka «Skiela» (425‑y asobny šturmavy połk) u Kanstancinaŭcy. 18 lipienia padraździaleńnie pakazała videa, jak jaho bajcy ŭstaloŭvajuć ukrainski ściah — na jakim byli vyjavy prezidenta i hałoŭkama. Nastupnaha dnia rasijskaja prapahanda raspaŭsiudziła kadry tych samych vajskoŭcaŭ užo nibyta ŭ pałonie, na toj samaj łakacyi. Sam połk nazvaŭ heta manipulacyjaj — sprobaj vydać łakalny epizod boju za pravał usioj apieracyi; adnačasova aficyjna fakt pałonu pabracimaŭ u «Skieli» nazvali «nadzvyčaj balučaj viestkaj». Heta historyja — vostry prykład taho, jak miedyjnaja demanstracyja na froncie moža abiarnucca realnaj ryzykaj dla žyćcia bajcoŭ.

Cień Jermaka

Andrej Jarmak farmalna — usiaho tolki były kiraŭnik Ofisa prezidenta. Ciapierašni kiraŭnik OP — Kiryła Budanaŭ, a sam Jermak fihuruje ŭ karupcyjnaj spravie pra lehalizacyju srodkaŭ. Ale mienavita toje, što čałaviek bieź dziaržaŭnaj pasady paśla zvalnieńnia i dalej pravodzić čas z vajskoŭcami i, sudziačy pa ŭsim, zachoŭvaje značny ŭpłyŭ na najbolš čullivyja dla krainy temy, daje pratestam novaje dychańnie.

Paviedamleńni pra toje, što Jarmak paśla adstaŭki Fiodarava naviedaŭ punkt kiravańnia Syrskaha i kamunikuje z hienierałami, varta ŭsprymać amal jak fakt — prosta nie daviedzieny da kanca. Pramych dokazaŭ niama, ale niepramych — jaho častych i blizkich kantaktaŭ z vajskovaj viarchoŭkaj — užo dastatkova, kab kazać pra heta adkryta. I składajecca ŭražańnie, što mienavita hety pazasistemny ŭpłyŭ zavodzić krainu ŭ ciomnuju zonu — kali rašeńni ŭ najvažniejšych pytańniach naradžajucca pa-za pasadami, pa-za pracedurami i pa-za adkaznaściu.

Čamu heta adbyvajecca mienavita zaraz

Najbolš prykra, što kryzis vybuchnuŭ u momant, kali Ukraina maje pośpiechi na froncie. Sam Syrski raniej pryznavaŭ, što rasijski nastup «zdźmuŭsia», choć i zaścierahaŭ: radavacca zarana, pra pierałom kazać zaŭčasna. Paralelna tryvała izalacyja Kryma. Udary pa paŭdniovaj łahistycy hrupoŭki «Dniapro» vyklikali na paŭvostravie deficyt paliva i pieraboi sa śviatłom i vadoj. A ŭ noč na 18 lipienia drony parazili łahistyčnyja chaby Wildberries i Ozon u Katoŭsku i Elektrastali.

Budanaŭ źviazvaje rost intensiŭnaści ŭdaraŭ pa łahistycy RF z praryvam u vytvorčaści ŭkrainskich srodkaŭ paražeńnia.

I voś u čym sutnaść hramadskaha zapytu: ludzi chočuć asimietryi, technałohij, raźvićcia, a nie «biaśpiečnaj hulni» pa sistemie, jakaja, chaj i pracuje, ale ciahnie za saboj vialikuju kolkaść strat. Łohika prostaja i davoli žorstkaja: kali paśla vieraśnioŭskich vybaraŭ Rasija abvieścić mabilizacyju, spaborničać ź joj u kolkaści ludziej Ukraina nie zmoža. U pieravazie masy pieramoža vorah — i heta razumiejuć usie. Tamu i hatoŭnaść ryzykavać, iści ŭ refarmavańnie i technałahizacyju, navat kali heta ryzykoŭna ŭ momancie.

Ukrainskaje hramadstva zastajecca subjektam

Inšy važny aśpiekt hetaj historyi: u krainie, dzie zakon vajennaha času abmiažoŭvaje masavyja akcyi, ludzi ŭsio adno vychodziać na płoščy, staviać uładzie składanyja pytańni — i da ich prysłuchoŭvajucca. Dla susiedziaŭ, jakija nazirajuć za Ukrainaj zvonku, heta, mahčyma, najvažniejšy sihnał: navat na piatym hodzie poŭnamaštabnaj vajny ŭkrainskaje hramadstva zastajecca subjektam, a nie fonam. I pakul hety hołas hučyć, u krainy jość zaścierahalnik suprać najhoršaha.

Što viadoma pra Michaiła Drapataha

Hienierał-major Michaił Drapaty naradziŭsia 21 listapada 1982 hoda ŭ Kamiancy-Padolskim, u 2004‑m skončyŭ Charkaŭski instytut tankavych vojskaŭ i pačaŭ słužbu ŭ 72‑j asobnaj miechanizavanaj bryhadzie.

Suprać rasijanaŭ Drapaty vajuje ź pieršych dzion vajny, z 2014 hoda. Mienavita tady adbyŭsia epizod, jaki zrabiŭ jamu imia na ŭsiu krainu: 9 maja 2014 hoda jahony 2‑i miechanizavany bataljon 72‑j bryhady (sam Drapaty byŭ tady majoram z pazyŭnym «Rubin») uvajšoŭ u Maryupal, kab vyzvalić zakładnikaŭ, jakich rasijskija šturmaviki ŭtrymlivali va ŭpraŭleńni milicyi. Kali miechanik-vadziciel dakłaŭ pra barykady vyšynioj ź mietr i zapytaŭsia, što rabić, Drapaty zahadaŭ brać pieraškodu šturmam — i kadry, jak jaho BMP faktyčna pieralataje cieraz barykady rasijan, stali kultavymi. Hetaje videa i dahetul virusicca jak simvał ukrainskaha supracivu i bajavoj nachabnaści, ź jakoj ukraincy łomiać supraciŭleńnie voraha.

U tym ža 2014‑m byŭ i inšy, bolš dramatyčny epizod: uletku jahonaje padraździaleńnie trapiła ŭ atačeńnie na Łuhanščynie, i Drapaty ŭziaŭ na siabie adkaznaść, vyvieŭšy z «Izvarynskaha katła» 260 bajcoŭ dy bolš za 30 adzinak techniki, adoleŭšy 160 km pad ahniom.

Dalej byŭ kamandny šlach: kamandzir 58‑j asobnaj motapiachotnaj bryhady (2016—2019), kamandujučy apieratyŭnych hrupovak «Chierson», «Charkaŭ», «Łuhansk» i Suchaputnych vojskaŭ USU (2024—2025).

Pavahu pamiž vajskoŭcaŭ jon maje pieradusim za toje, što heta bajavy hienierał «z pola», a nie kabinietny: u sakaviku 2022‑ha jon uznačaliŭ hrupoŭku «Pakroŭsk» / «Poŭdzień», jakaja spyniła prasoŭvańnie rasijanaŭ. Asobnaja rysa, jakuju adznačajuć u armii, — hatoŭnaść adkazvać nie tolki za pieramohi: 1 červienia 2025 hoda, paśla trahiedyi na palihonie Suchaputnych vojskaŭ u Sumskaj vobłaści, Drapaty prademanstravaŭ, što hatovy nieści adkaznaść i za praliki: padaŭ u adstaŭku z pasady kamandujučaha Suchaputnych vojskaŭ.

Drapataha ličać kamandziram, jaki publična abaraniaje svaich ludziej i nie baicca kazać pra realnyja prablemy ŭ armii.

«Słužeńnie Ukrainie padčas vajny za niezaležnaść»

«Słužeńnie Ukrainie zaŭsiody było dla mianie honaram, a padčas vajny za niezaležnaść jano aznačaje absalutnuju adkaznaść. Udziačny Hałoŭnakamandujučamu Uzbrojenych sił Ukrainy Alaksandru Syrskamu za paśladoŭnuju pracu pa ŭmacavańni ŭkrainskaha vojska. Ja ŭ im vyras», — zajaviŭ Michaił Drapaty paśla pryznačeńnia jaho novym Hałoŭkamam USU.

Fiodaraŭ: Treba pisać novyja raździeły i vypraŭlać pamyłki

«Heta novy hłytok pavietra i novaja nadzieja ŭ baraćbie volnych ludziej za svabodu i spraviadlivaść. Hołas źmienaŭ, jaki nielha było nie pačuć.

Ciapier vysokija čakańni ŭkraincaŭ nieabchodna apraŭdać vyraznaj vizijaj zaviaršeńnia vajny za Niezaležnaść, mocnaj kamandaj i rašučymi dziejańniami, nakiravanymi na zachavańnie žyćciaŭ našych voinaŭ, rabatyzacyju frontu, naniasieńnie asimietryčnych udaraŭ i vyčarpańnie rasijskaj ekanomiki.

Patelefanavaŭ hienierału Alaksandru Syrskamu i padziakavaŭ za abaronu Kijeŭščyny, Charkaŭskuju apieracyju dy inšyja histaryčnyja bitvy.

Heta ŭžo važnaja častka historyi Ukrainy.

Ale treba ruchacca jašče chutčej i pisać novyja raździeły, vypraviŭšy ŭsie papiarednija pamyłki.

Dziakuj usim datyčnym!» — tak adhuknuŭsia na pryznačeńnie Michaiła Drapataha ŭ svaim telehram-kanale Michaił Fiodaraŭ. Apošnija słovy prahučali trochi z trampaŭskaj ironijaj, bo hałoŭny datyčny — jon sam.

• 33
• 0
• 1
• 2
• 0
• 1
• 0
• 4