U vyniku ŭdaru pa vystavie ŭzbrajeńniaŭ zahinuŭ były kiraŭnik centra «Alfa» SBU
U vyniku rasijskaha rakietnaha ŭdaru pa vystavie ŭzbrajeńniaŭ u Kijeŭskaj vobłaści 24 lipienia zahinuŭ były kiraŭnik Centra śpiecyjalnych apieracyj pa baraćbie z teraryzmam «Alfa» Słužby biaśpieki Ukrainy Eduard Sirenka, paviedamlaje Tsn.ua.
Pra śmierć Eduarda Sirenki paviedamili niekalki pradstaŭnikoŭ ukrainskaha abaronnaha siektara, byłyja supracoŭniki śpiecsłužbaŭ i žurnalisty. Aficyjnaha paćviardžeńnia ad SBU pakul što, praŭda, nie było.
Adnym ź pieršych pra hibiel Sirenki paviedamiŭ były kiraŭnik kampanii «Ukrśpiecekspart» i eks-supracoŭnik «Alfy» Siarhiej Bandarčuk. Pavodle jaho, Sirenka zahinuŭ na palihonie padčas mierapryjemstva. Žurnalist Stanisłaŭ Račynski taksama zajaviŭ, što były kiraŭnik śpiecpadraździaleńnia zahinuŭ mienavita na vystavie dronaŭ, jakaja stała cellu rakietnaha ŭdaru. Spačuvańni vykazali i inšyja viadomyja vajskoŭcy, vieterany dy hramadskija dziejačy.
Eduard Sirenka byŭ ukrainskim śpiecnazaŭcam, u roznyja hady ŭznačalvaŭ Centr śpiecyjalnych apieracyj «Alfa» SBU. U 2018 hodzie jon razam ź inšymi supracoŭnikami śpiecpadraździaleńnia znachodziŭsia ŭ Iraku, dzie ŭdzielničaŭ u achovie pasolstva Ukrainy ŭ Bahdadzie. Pavodle adkrytych źviestak, jon cikaviŭsia motatechnikaj i zbrojaj.
24 lipienia rasijskija vojski nanieśli ŭdar tryma balistyčnymi rakietami pa Kijeŭskaj vobłaści. Pavodle infarmacyi ŭkrainskich uładaŭ, adna rakieta była pierachoplena srodkami supraćpavietranaj abarony, dźvie dasiahnuli celi. Adzin z udaraŭ pryjšoŭsia pa pryvatnym palihonie ŭ Bučanskim rajonie, dzie ŭ hety čas prachodziła vystava ŭzbrajeńniaŭ z udziełam pradstaŭnikoŭ ukrainskaj abaronnaj pramysłovaści.
Pavodle apošnich aficyjnych danych, u vyniku ataki zahinuli 10 čałaviek, jašče kala 100 atrymali ranieńni. Taksama byli paškodžanyja dziasiatki žyłych damoŭ, hateli, restaran i aŭtamabili.
Paśla trahiedyi prezident Ukrainy Uładzimir Zialenski zajaviŭ, što praviadzieńnie takich mierapryjemstvaŭ padčas vajny niedapuščalnaje. Kiraŭnik jahonaj administracyi Kiryła Budanaŭ adznačyŭ, što arhanizatary pavinny nieści asabistuju adkaznaść za biaśpieku ŭdzielnikaŭ.
Hienieralny prakuror Ukrainy Rusłan Kraŭčanka paviedamiŭ pra zatrymańnie arhanizatara vystavy. Pavodle materyjałaŭ śledstva, adna z asacyjacyj vytvorcaŭ zbroi praviała maštabnaje mierapryjemstva bieź nieabchodnych uzhadnieńniaŭ z vajskovym kamandavańniem i orhanami ŭłady. U vystavie ŭdzielničali bolš za 300 čałaviek, a ŭ prahramu ŭvachodziła, u tym liku, demanstracyja srodkaŭ supraćpavietranaj abarony.
Kamientary