Na Słonimščynie školniki znajšli 500 artefaktaŭ i manietu XVII stahodździa
Kala 500 artefaktaŭ roznych epoch, frahmienty rańnieniealityčnaj kieramiki z adbitkami staražytnaj fłory i manietu XVII stahodździa znajšli padčas archieałahičnych raskopak na bierazie raki Ščary ŭ Słonimskim rajonie. Daśledavańni pravodzili archieołahi na čale z historykam Aleham Tkačovym, a taksama ŭdzielniki dziciačaha turyscka-krajaznaŭčaha łahiera. Sioleta łahier pracuje ŭžo adzinaccaty raz, piša Hrodna.life.
Siarod znojdzienych pradmietaŭ — nukleusy, adščepy i skrabki, a taksama frahmienty staražytnaj kieramiki. Vyjaŭlenyja artefakty adnosiacca da roznych histaryčnych pieryjadaŭ — ad kamiennaha vieku da XIX stahodździa, paviedamlaje Instytut historyi NAN Biełarusi.
Dziciačy archieałahičny łahier — heta sumiesny prajekt Instytuta historyi Nacyjanalnaj akademii navuk Biełarusi i ŭpraŭleńnia adukacyi Słonimskaha rajvykankama. Sioleta ŭ im brali ŭdzieł 25 školnikaŭ.
Za čas pracy łahiera junyja daśledčyki abśledavali bolš za 50 archieałahičnych pomnikaŭ na terytoryi Słonimskaha rajona. Kala 40 ź ich raniej nie byli viadomyja śpiecyjalistam.
Za hady pracy ekśpiedycyi raskopki i abśledavańni prachodzili kala viosak Talkaŭščyna, Ryščycy, Zbočna, Žyrovičy, Rusakova, Razanaŭščyna, Parečča, Małyševičy, a taksama ahraharadka Dzieraŭnaja.
U 2018 hodzie śpiecyjalisty i školniki abśledavali ŭčastak pravaha bieraha Ščary, u 2019‑m — levabiarežža raki pamiž Žyrovičami i Rusakovam. U 2020 i 2022 hadach daśledavańni prachodzili na race Hryŭdzie, a ŭ 2021‑m — na levym bierazie Ščary pamiž Razanaŭščynaj i Pareččam.
Vyniki daśledavańniaŭ łahiera taksama ŭvajšli ŭ navukovaje vydańnie «Historyka-kulturnaja spadčyna Słonimščyny. Da 770‑hodździa Słonima», jakoje vyjšła ŭ 2024 hodzie, paviedamlaje rajonnaja hazieta «Słonimski vieśnik».
Akramia raskopak, školniki biaruć udzieł u turysckich i spartyŭnych mierapryjemstvach, naviedvajuć muziei i znajomiacca z historyjaj rodnaha kraju. Sioleta jany pabyvali ŭ vioscy Talkaŭščyna, dzie znachodziacca archieałahičnyja i histaryčnyja pomniki, a taksama daśledavali haradzišča Kuraŭskaja Hara i jašče adno raniej nieviadomaje haradzišča.
Padvodnyja archieołahi znajšli ŭ Sieńnienskim rajonie artefakty III tysiačahodździa da našaj ery
Na haradziščy pad Kareličami znajšli reštki abarončaj ściany XVI stahodździa
U Vilejskim rajonie adkapali ślady ŭzbrojenaha kanfliktu siaredziny I tysiačahodździa
U Lidzie pad ścienami zavoda raskapali krypty z sarkafahami
Kamientary