Indyjskija «tarakany» masavymi pratestami dabilisia adstaŭki ministra adukacyi

Pra svajo rašeńnie Pradchan paviedamiŭ u sacyjalnych sietkach. Jon zajaviŭ, što pakidaje pasadu, kab, pavodle jaho słoŭ, «antynacyjanalnyja siły» nie zmahli vykarystać situacyju ŭ svaich intaresach. Ministr taksama adznačyŭ, što pavažaje imknieńni, pačućci i zakonnyja čakańni moładzi krainy.

Viadomy indyjski aktyvist i inžynier Sanam Vanhčuk, jaki na praciahu 26 dzion trymaŭ haładoŭku ŭ padtrymku pratestoŭcaŭ, nazvaŭ adstaŭku ministra pieramohaj miru, ciarpieńnia i nastojlivaści.

Paśla abviaščeńnia ab adstaŭcy ŭdzielniki akcyj pačali śviatkavać. Jany skandavali patryjatyčny łozunh «Džaj Hind», što aznačaje «Pieramoha Indyi», słuchali dziaržaŭny himn, a ŭ natoŭpie razdavali prysmaki. Adzin z udzielnikaŭ pratestu, Tłuanha Rałte, zajaviŭ, što heta pieramoha Kanstytucyi i dokaz taho, što maładoje pakaleńnie hatova zmahacca za svaje pravy.

Pavodle paviedamleńniaŭ žurnalistaŭ, padčas akcyj u Ńju-Deli znachodziłasia nie mienš za tysiaču supracoŭnikaŭ palicyi. Za niekalki hadzin da paviedamleńnia pra adstaŭku ministra siłaviki ŭžyli suprać pratestoŭcaŭ ślozatačyvy haz, sprabujučy razahnać demanstracyju pierad čarhovaj sustrečaj pradstaŭnikoŭ pratestnaha ruchu z členami ŭrada.

Pryčynaj masavych vystupleńniaŭ staŭ skandał vakoł ustupnych ekzamienaŭ u miedycynskija VNU. U mai 2026 hoda ŭłady admianili vyniki ekzamienaŭ dla dvuch miljonaŭ abituryjentaŭ paśla čarhovych padazreńniaŭ va ŭciečcy ekzamienacyjnych materyjałaŭ. Dla mnohich indyjskich siemjaŭ pastupleńnie ŭ miedycynskuju VNU ličycca adnoj z hałoŭnych mahčymaściaŭ vybracca ź biednaści, tamu da ispytaŭ rychtujucca hadami. Adnak u krainie ŭžo nieadnarazova vyjaŭlali vypadki prodažu adkazaŭ, što davała pieravahu tym, chto moh za ich zapłacić.

U červieni arhanizataram akcyj stała moładzievaja arhanizacyja Cockroach Janta Party («Tarakanavaja narodnaja partyja»). Takaja nazva źjaviłasia paśla taho, jak adzin z sudździaŭ abraźliva paraŭnaŭ maładych biespracoŭnych indyjcaŭ z tarakanami.

Zasnavalnik arhanizacyi, 30‑hadovy aktyvist, raspačaŭ siadziačy pratest, a paźniej da jaho dałučyŭsia Sanam Vanhčuk, jaki abviaściŭ haładoŭku. Paźniej ułady prymusova špitalizavali jaho.

Pastupova patrabavańni ŭdzielnikaŭ pratestaŭ vyjšli daloka za miežy tolki adstaŭki ministra adukacyi. Ludzi pačali vykazvać abureńnie vysokim uzroŭniem karupcyi, niedachopam pracoŭnych miescaŭ dla moładzi i adsutnaściu adkaznaści z boku ŭłady.

Asabliva mocnaje abureńnie vyklikali padziei 20 lipienia, kali palicyja nie dapuściła demanstrantaŭ da budynka parłamienta, užyŭšy dubinki i ślozatačyvy haz. U vyniku dziasiatki studentaŭ atrymali traŭmy.

Sprabujučy strymać dalejšaje raźvićcio pratestaŭ u stalicy, ułady časova abmiežavali dostup da internetu i zakryli 18 stancyj mietro. Niahledziačy na heta, pratesny ruch atrymaŭ padtrymku apazicyjnych palitykaŭ, jakija ŭ znak salidarnaści sarvali pracu parłamienta.

• 9
• 0
• 1
• 0
• 0
• 0
• 0
• 0