Francyja pryniała rašeńnie vysłać z krainy rasijskuju prapahandystku Ksieniju Fiodaravu. Pra heta paviedamiła Ministerstva ŭnutranych spraŭ Francyi, paćvierdziŭšy infarmacyju, apublikavanuju raniej hazietaj Libération, piša Euronews.
U viedamstvie zajavili, što dziejnaść Fiodaravaj nanosić škodu fundamientalnym intaresam francuzskaj dziaržavy, a jaje znachodžańnie ŭ krainie ŭjaŭlaje asabliva surjoznuju i niepasrednuju pahrozu hramadskamu paradku.
Ksienija Fiodarava raniej uznačalvała francuzskaje adździaleńnie rasijskaha dziaržaŭnaha telekanała RT France, jaki finansavaŭsia Kramlom. Paśla zakryćcia kanała jana stała adnoj z najbolš prykmietnych prarasijskich miedyjnych asob u Francyi i rehularna ŭdzielničała ŭ efirach telekanała CNews, jaki ŭvachodzić u miedyjahrupu francuzskaha biznesmiena Viensana Bałare.
Pavodle pastanovy MUS Francyi, Fiodarava raspaŭsiudžvała naratyvy, jakija adpaviadajuć infarmacyjnym kampanijam, arhanizavanym rasijskimi ŭładami. Francuzskija ŭłady ličać, što takaja dziejnaść nakiravanaja na destabilizacyju hramadskaha paradku, manipulavańnie hramadskaj dumkaj i padryŭ davieru hramadzian Francyi i Jeŭrapiejskaha sajuza da dziaržaŭnych instytutaŭ.
U dakumiencie taksama adznačajecca, što Ksienija Fiodarava sadziejničała raspaŭsiudžvańniu dezynfarmacyi i rytoryki, jakaja vykarystoŭvajecca dla ŭpłyvu na hramadskija nastroi.
U pačatku červienia frakcyja Renew Europe u Jeŭrapiejskim parłamiencie ŭžo zaklikała ŭvieści sankcyi suprać Ksienii Fiodaravaj. Jaje abvinavacili va ŭdziele ŭ raspaŭsiudžvańni prapahandysckich materyjałaŭ, źviazanych z vajnoj va Ukrainie i palitykaj Jeŭrapiejskaha sajuza.
Ciapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary