Індыйскія «тараканы» масавымі пратэстамі дабіліся адстаўкі міністра адукацыі
Міністр адукацыі Індыі Дхармендра Прадхан падаў у адстаўку пасля маштабных пратэстаў моладзі, якія сталі найбуйнейшымі ў краіне за апошнія гады. Прычынай незадаволенасці стала чарговая ўцечка адказаў да ўступнага экзамену ў медыцынскія вышэйшыя навучальныя ўстановы. Пра адстаўку міністра ўдзельнікі акцый даведаліся падчас мітынгу і сустрэлі гэтую навіну апладысментамі і святкаваннем, паведамляе Reuters.
Пра сваё рашэнне Прадхан паведаміў у сацыяльных сетках. Ён заявіў, што пакідае пасаду, каб, паводле яго слоў, «антынацыянальныя сілы» не змаглі выкарыстаць сітуацыю ў сваіх інтарэсах. Міністр таксама адзначыў, што паважае імкненні, пачуцці і законныя чаканні моладзі краіны.
Вядомы індыйскі актывіст і інжынер Санам Вангчук, які на працягу 26 дзён трымаў галадоўку ў падтрымку пратэстоўцаў, назваў адстаўку міністра перамогай міру, цярпення і настойлівасці.
Пасля абвяшчэння аб адстаўцы ўдзельнікі акцый пачалі святкаваць. Яны скандавалі патрыятычны лозунг «Джай Гінд», што азначае «Перамога Індыі», слухалі дзяржаўны гімн, а ў натоўпе раздавалі прысмакі. Адзін з удзельнікаў пратэсту, Тлуанга Ралтэ, заявіў, што гэта перамога Канстытуцыі і доказ таго, што маладое пакаленне гатова змагацца за свае правы.
Паводле паведамленняў журналістаў, падчас акцый у Нью-Дэлі знаходзілася не менш за тысячу супрацоўнікаў паліцыі. За некалькі гадзін да паведамлення пра адстаўку міністра сілавікі ўжылі супраць пратэстоўцаў слёзатачывы газ, спрабуючы разагнаць дэманстрацыю перад чарговай сустрэчай прадстаўнікоў пратэстнага руху з членамі ўрада.
Прычынай масавых выступленняў стаў скандал вакол уступных экзаменаў у медыцынскія ВНУ. У маі 2026 года ўлады адмянілі вынікі экзаменаў для двух мільёнаў абітурыентаў пасля чарговых падазрэнняў ва ўцечцы экзаменацыйных матэрыялаў. Для многіх індыйскіх сем'яў паступленне ў медыцынскую ВНУ лічыцца адной з галоўных магчымасцяў выбрацца з беднасці, таму да іспытаў рыхтуюцца гадамі. Аднак у краіне ўжо неаднаразова выяўлялі выпадкі продажу адказаў, што давала перавагу тым, хто мог за іх заплаціць.
У чэрвені арганізатарам акцый стала моладзевая арганізацыя Cockroach Janta Party («Тараканавая народная партыя»). Такая назва з'явілася пасля таго, як адзін з суддзяў абразліва параўнаў маладых беспрацоўных індыйцаў з тараканамі.
Заснавальнік арганізацыі, 30‑гадовы актывіст, распачаў сядзячы пратэст, а пазней да яго далучыўся Санам Вангчук, які абвясціў галадоўку. Пазней улады прымусова шпіталізавалі яго.
Паступова патрабаванні ўдзельнікаў пратэстаў выйшлі далёка за межы толькі адстаўкі міністра адукацыі. Людзі пачалі выказваць абурэнне высокім узроўнем карупцыі, недахопам працоўных месцаў для моладзі і адсутнасцю адказнасці з боку ўлады.
Асабліва моцнае абурэнне выклікалі падзеі 20 ліпеня, калі паліцыя не дапусціла дэманстрантаў да будынка парламента, ужыўшы дубінкі і слёзатачывы газ. У выніку дзясяткі студэнтаў атрымалі траўмы.
Спрабуючы стрымаць далейшае развіццё пратэстаў у сталіцы, улады часова абмежавалі доступ да інтэрнэту і закрылі 18 станцый метро. Нягледзячы на гэта, пратэсны рух атрымаў падтрымку апазіцыйных палітыкаў, якія ў знак салідарнасці сарвалі працу парламента.
Студэнцкія пратэсты ў Індыі сталі праблемай для прэм'ера Модзі. Адкуль узяўся рух «тараканаў»?
Статкевіч аб пратэстах ва Украіне: Калі вы абралі з такой перавагай прэзідэнта і адначасова Вярхоўнага галоўнакамандуючага, то дайце яму кіраваць
У султана Брунея каля 7000 аўтамабіляў за 5 мільярдаў даляраў пыляцца ў сховішчах
Цяпер чытаюць
У Беларусі знайшлі копію швейцарскіх Альпаў — але турыстаў там не чакаюць2
Каментары