Statkievič: Nastupnaje «akno mahčymaściaŭ» moža być apošnim dla biełarusaŭ

«Niadaŭna pračytaŭ zajavu adnaho jeŭrapiejskaha palityka, što ŭ biełarusaŭ budzie «vakno mahčymaściaŭ» dla demakratyi i sapraŭdnaj niezaležnaści. Całkam zhodzien ź im, ale takija «vokny» ŭ našaj najnoŭšaj historyi zdaralisia ŭžo nieadnojčy», — piša Mikałaj Statkievič.

«Upieršyniu — paśla raspadu Savieckaha Sajuza, kali sajuznyja respubliki, i tyja, jakija zmahalisia za niezaležnaść, i tyja, jakija zusim nie zmahalisia za jaje — usie stali niezaležnymi. Ale tady, zamiest pabudovy samastojnaj krainy, tutejšyja tahačasnyja kiraŭniki stali, pry padtrymcy razhublenaj bolšaści, šukać mahčymaści viarnuć krainu ŭ zvykły stan satelita Maskvy.

«Akno mahčymaściaŭ» pabudavać niezaležnuju, demakratyčnuju paśpiachovuju dziaržavu nie było vykarystana.

Druhi raz jano źjaviłasia ŭ druhoj pałovie 90-ch, kali Biełarusi prapanavali dałučycca da Jeŭraźviazu, što dazvalała atrymać finansavańnie reform i, ŭžo ŭ siaredniaj pierśpiektyvie, pieratvaryć Biełaruś u volnuju sučasnuju i zamožnuju krainu.

Ale tahačasny kiraŭnik dziaržavy admoviŭsia ad prapanovy, navat nie paviedamiŭšy pra jaje hramadstvu.

Potym Rasija apamiatałasia ad psichałahičnaj traŭmy, atrymanaj u vyniku raspadu jaje impieryi, i, padmacavanaja rostam naftahazavych dachodaŭ, viarnułasia da tradycyjnaj praktyki padparadkavańnia susiednich narodaŭ dy ŭłučeńnia ich u skład imperyi. Sproby narodaŭ susiednich dziaržaŭ ustalavać demakratyju i ŭmacavać niezaležnaść razhladalisia i razhladajucca ŭ Kramli, jak zamach na svaje hłybinnyja intaresy. Na zachavańnie pasłuchmianych režymaŭ vydatkoŭvajucca vialikija srodki, a ŭ vypadku pahrozy ich isnavańniu z-za masavych pratestaŭ, da miežaŭ ci navat na terytoryju «miaciežnaj» krainy nakiroŭvajucca rasijskija vojski. Pa śćviardžeńniu niekatorych starejšych aficeraŭ ź sistemy MUS, u padaŭleńni masavych pratestaŭ u Biełarusi ŭ 2020 udzielničali rasiejskija siłaviki, pieraapranutyja ŭ biełaruskuju formu.

Maskva zrabiła i praciahvaje rabić usio dla kansiervacyi biełaruskaha režymu na dziesiacihodździ.

Zaraz, z-za tupikovaj situacyi na rasijska-ŭkrainskim froncie, pad pahrozaj apynułasia isnavańnie siońniašniaha palityčnaha režymu ŭ Rasii. Źmiena ŭłady ŭ Kramli, razam z mahčymymi novymi pahrozami, stvoryć i šancy dla biełaruskaj demakratyi. Ci skarystajecca Biełaruś hetym «vaknom mahčymaściaŭ» zaležyć, najpierš, ad biełaruskaha hramadstva, ad biełarusaŭ, jakija žyvuć na terytoryi svajoj krainy.

Na ŭsich nas laža vialikaja adkaznaść, bo hetaje «akno» moža być apošnim dla našaj nacyi. Pohlady bolšaści z nas vidavočnyja — demakratyja i niezaležnaść.

U isnujučych umovach ludzi nie mohuć vyjavić svaju pazicyju publična, bo lubaja forma samaarhanizacyi zaraz žorstka pieraśledujecca, ale pry źmienie situacyi heta samaarhanizacyja adbudziecca i vyjavić siabie vielmi chutka.

Mahčyma, śviet znoŭ nie paznaje biełarusaŭ. Ale heta budzie ŭžo zusim inšaje niepaznavańnie. Strach i nianaviść — strašnaja sumieś», — reziumavaŭ Mikałaj Statkievič.

• 30
• 1
• 8
• 2
• 0
• 2
• 0
• 0