Pa što biełarusy dahetul jeździać na zakupy ŭ Polšču i ci naohuł papularnyja takija pajezdki

Niama taho, što rańš było

Ličby choć i zdajucca vialikimi, ale polskaja mytnia pryznajecca, što ciapierašnija pakazčyki dalokija ad tych, što byli raniej, bo, pierš za ŭsio praz sankcyi, vyvaz šmatlikich tavaraŭ u Biełaruś zabaronieny.

U pryvatnaści, nielha vyvozić šmat elektroniki, u tym liku smartfony, televizary i kampjutary, a taksama pralnyja paraški i šmat inšaha.

Tamu kali niechta i navažvajecca ciškom vieźci z Polščy telefon abo noŭtbuk, to Tax Free nie afarmlaje, i, adpaviedna, u mytnaj statystycy takija tavary i sumy nie adlustroŭvajucca.

Taksama treba ŭličvać, što častka ludziej nie afarmlaje VAT, bo praź nievialikuju sumu nie bačyć sensu tracić dadatkovy čas na jaje afarmleńnie.

Ale ahułam, choć adkryćcio punktaŭ propusku ažyviła pryhraničny handal, efiekt akazaŭsia mienšym za čakany.

I reč tut nie tolki ŭ sankcyjach. Pa-pieršaje, atrymać vizu biełarusam ciapier značna składaniej i daražej, čym było raniej, a pa-druhoje, sam prajezd praź miažu staŭ darahim. Aŭtobus ź Minska da Biełastoka ciapier kaštuje ad 120 rubloŭ u adzin bok, maršrutka z Hrodna — ad 100 rubloŭ.

Pry vyjeździe na aŭto, aproč standartnych vydatkaŭ na paliva i strachoŭku, treba zapłacić kala 70 rubloŭ za roznyja pabory.

Adzin raz źjeździli — nie spadabałasia

Siamiejnaja para z Hrodna, jakaja ŭ krasaviku pieršy raz z 2020 hoda źjeździła ŭ Biełastok, kaža, što Polšča ŭžo nie taja.

«Ceny na ŭsio mocna vyraśli. Kali raniej možna było zakupicca ŭ Polščy i realna zekanomić, to ciapier adziny plus chiba tolki ŭ krychu bolšym vybary brendaŭ», — kaža surazmoŭca i dadaje, što paabiedać u kafe ŭ Hrodnie ciapier kaštuje našmat tańniej, čym u Biełastoku.

Pavialičyć

Siarod pryčyn, čamu pajezdka nie spadabałasia, taksama nazyvajuć sankcyi.

«Na bytavuju chimiju VATy nie aformić, a na adnoj kavie, «Nutele» i inšych słodyčach šmat nie sekanomiš. Aproč kavy, jakaja tam sapraŭdy tańniejšaja, taksama jość sens kuplać brendavaje adzieńnie, firmovyja krasoŭki, asabliva kali trapiš na dobruju źnižku», — dzielicca dośviedam haradzieniec.

Praŭda, pa słovach mužčyny, vynikovyja padliki pakazali, što sekanomić amal nie atrymałasia, bo vydatki na strachoŭku, paliva, pabory na miažy i charčavańnie amal całkam źjeli roźnicu ŭ cenach.

Pa słovach surazmoŭcy, druhi raz jechać na zakupy jany nie płanujuć. Navat z ulikam taho, što miaža adkrytaja i na darohu tudy-nazad u sumie syšło ŭsiaho 5‑6 hadzin.

Vydatki dzialili na traich

Inšaja haradzienka kaža, što paśla adkryćcia miažy ŭžo dvojčy była ŭ Biełastoku.

«Abodva razy jeździli ŭtroch na mašynie siabroŭki i darožnyja vydatki dzialili na traich. Tamu krychu sekanomić atrymlivałasia. Na rynku nabirali kavu pad VAT, taksama adzieńniem zakupilisia, zaadno źmianili abstanoŭku.

Pakolki ŭ mianie karta palaka, to vizu maju amal darmavuju, tamu miarkuju, što raz za siezon źjeździć na zakupy maje sens», — kaža žančyna i dadaje, što ŭ byłyja časy jeździła ŭ šop-tury maršrutkaj prykładna raz na miesiac.

Pavialičyć

«Pajezdki ŭ abodva baki kaštavali niejkija kapiejki pa ciapierašnich mierkach. Za 15‑20 dalaraŭ možna było tudy-nazad zhaniać, kab toj ža bytavoj chimijaj zakupicca, tualetnaj papieraj, kavaj. Ale ž ciapier chimija pad sankcyjami, tamu i sensu časta jeździć nijakaha niama», — ličyć haradžanka.

U Polščy stała daražej, čym u Hiermanii?

Dalnabojščyk, jaki pracuje ŭ polskaj firmie, dzielicca nazirańniami: pajezdki pa zakupy, jak heta było raniej, pierastali być masavaj źjavaj.

«U čarzie bačna, što bolšaść ludziej — heta prafiesijnyja čaŭnaki ci tyja, chto jedzie z pracy ci na pracu. Vidavočnych «zakupnikoŭ», jak byvała raniej, asabliva pa vychodnych, ciapier nie ŭbačyš», — zapeŭnivaje mužčyna.

Dalnabojščyk adznačaje, što, pa jahonych nazirańniach, mnohija pazicyi, asabliva pradukty, u Polščy ciapier kaštujuć daražej, čym u Hiermanii.

«Raniej zaŭždy kiroŭcy staralisia pa maksimumie zakupicca ŭ Polščy, a ciapier u hetym asabliva niama sensu, bo toje samaje, a časam i tańniej možna nabyć u Hiermanii», — zapeŭnivaje jon.

Što da pajezdak na zakupy, to jon usio ž adnojčy hetaj viasnoj jeździŭ z žonkaj i dziećmi ŭ Biełastok.

Pavialičyć

«Vizy va ŭsich jość, na mašynu strachoŭka taksama, tamu, pakolki čerhaŭ na «Bruzhach», jak praviła, niama, my źjeździli na zakupy. Ale ci niešta sapraŭdy zekanomili — nie fakt.

Tak, było paru vyhadnych pakupak na rasprodažy, ale razam z tym kuplaješ i niešta nie zusim patrebnaje. U dadatak pajeści dvum darosłym i dvum dzieciam-padletkam taksama treba było, a heta ŭ Polščy, kali razmova idzie pra kafe, daŭno nie tanna», — adznačaje dalnabojščyk.

Mužčyna kaža, što, kab ad pajezdki była niejkaja adčuvalnaja ekanomija, treba kuplać adrazu šmat čaho ci niešta z techniki i abaviazkova afarmlać Tax Free. A praz sankcyi mnohaje niemahčyma, tamu, na jaho dumku, farmat pajezdak pa zakupy ciapier nie aktualny.

Viza jość — žadańnia jechać niama

Inšy surazmoŭca, jaki ŭ dakavidnyja časy byŭ vialikim amataram jeździć na zakupy, kaža, što navat niahledziačy na najaŭnaść vizy i adkryćcio miežaŭ na zakupy ŭ Biełastok bolš nie jeździć.

Pavialičyć

«Z takimi cenami na maršrutku asablivaj vyhady nie zastaniecca. Na mašynie jechać taksama doraha, bo treba apłacić pošlinu za vyjezd, za elektronnuju čarhu, strachoŭku i hetak dalej. Tamu bolš tudy nie jeździm, choć da 2020 hoda šopinh u Biełastoku byŭ dla nas zvyčajnaj spravaj», — pryznajecca mužčyna.

Tym nie mienš całkam ad tavaraŭ z Polščy siamja surazmoŭcy nie admoviłasia.

«My padličyli, što nam praściej niešta zamović praz bajeraŭ. Roźnica z ułasnaj pajezdkaj kali i budzie, to minimalnaja, zatoje jechać nikudy nie treba. A kali treba niejkuju bytavuju chimiju, to chapaje hrup u telehramie, dzie pradajuć usialakija tavary ci pryvoziać na zamovu. Tak vychodzić tańniej, čym za maršrutku płacić», — upeŭnieny mužčyna.

Pra toje, što pajezdki na zakupy ŭ Polšču bolš nie papularnyja, śviedčyć taksama amal poŭnaja adsutnaść čerhaŭ na miažy ŭ punktach «Kuźnica» («Bruzhi») i «Babroŭniki» («Bierastavica») i adsutnaść arhanizavanych šop-turaŭ. 

• 2
• 0
• 2
• 1
• 0
• 3
• 0
• 0