Ułady Hrodna paviedamili pra vychad z ładu liŭnioŭki pad udaram stychii
Hrodzienski harvykankam u suviazi z mocnaj zalevaj, jakaja abrynułasia ŭviečary 1 žniŭnia na Hrodna, zaklikaŭ žycharoŭ horada paciarpieć i być aściarožnymi.
Ułady Hrodna pryznajuć, što paśla mocnych i praciahłych apadkaŭ, jakija prajšli ŭ Hrodnie, u horadzie ŭźnikli surjoznyja prablemy z advodam daždžavoj vady. Śćviardžajecca, što praź vialikuju kolkaści apadkaŭ liŭnievaja kanalizacyja časova nie spraviłasia z nahruzkaj.
U vyniku byli padtoplenyja asobnyja ŭčastki daroh i tratuaraŭ, što ŭskładniła ruch transpartu. Taksama zafiksavanyja vypadki zatapleńnia padziemnych piešachodnych pierachodaŭ i aŭtamabilaŭ, pryparkavanych u nizinnych miescach.
Z fota i videa vidać, što mnohija vulicy zatoplenyja, a niekatoryja mašyny apynulisia ŭ vadzie amal całkam.
Pad udarami stychii apynuŭsia praktyčna ŭvieś horad, paviedamleńni pra zatapleńnie prychodziać z roznych rajonaŭ.
Papiaredniaja vialikaja zaleva ŭ hrodnie była 27 lipienia.
Ciapier kamunalnyja i avaryjnyja słužby pieraviedzienyja na ŭzmocnieny režym pracy. Idzie intensiŭnaja adpampoŭka vady ŭ najbolš prablemnych miescach, a taksama ačystka liŭniepryjomnych krataŭ ad śmiećcia, jakoje pieraškadžaje ścioku vady.
Paśla taho jak situacyja stabilizujecca i ŭzrovień vady źnizicca, śpiecyjalnaja kamisija pavinna abśledavać usie paciarpiełyja terytoryi. Pravierka zakranie nie tolki asnoŭnyja vulicy, ale i dvarovyja prajezdy, padziemnyja pierachody i techničnyja kałodziežy.
Žycharoŭ i haściej Hrodna prosiać z razumieńniem pastavicca da časovych niazručnaściaŭ. Pa mahčymaści rekamiendujecca admovicca ad pajezdak na asabistym aŭtatransparcie, a piešachodam — być vielmi ŭvažlivymi, abychodzić hłybokija łužyny, bo pad vadoj mohuć znachodzicca adkrytyja luki abo bardziury.
Pra vypadki mocnych padtapleńniaŭ kala žyłych damoŭ ci sacyjalnych abjektaŭ prosiać paviedamlać u dyśpietčarskuju słužbu pa telefonie 115.
Ciapier čytajuć
U Minsku pradajuć dom na vadzie. Kolki prosiać za niezvyčajny abjekt na Čyžoŭskim vadaschoviščy?3
Kamientary