Biełaruskija chirurhi praviali pieršuju apieracyju pry dapamozie kitajskaha robata
U Minskim navukova-praktyčnym centry chirurhii, transpłantałohii i hiematałohii ŭpieršyniu praviali apieracyju z vykarystańniem robata-chirurha kitajskaj vytvorčaści Medbot. Pra heta paviedamili ŭ Ministerstvie achovy zdaroŭja.
Pieršaj pacyjentkaj stała žančyna z zachvorvańniami žoŭcievaha puzyra i piečani. Apieracyju vykanaŭ dyrektar centra Aleh Rumo, jamu asistavaŭ zahadčyk adździaleńnia transpłantałohii i hiepatabilijarnaj chirurhii Siarhiej Karatkoŭ.
Kab asvoić pracu z novym abstalavańniem, niekalki bryhad biełaruskich śpiecyjalistaŭ prajšli stažyroŭku ŭ Kitai. Za pieršaj apieracyjaj taksama nazirali pradstaŭniki kitajskaj kampanii Shanghai MicroPort Medbot i pasolstva KNR. Akramia taho, u centry było padpisana pahadnieńnie ab supracoŭnictvie z kitajskimi partniorami ŭ śfiery rabatyzavanaj chirurhii.
Rabatyzavany kompleks Medbot staŭ pieršym takim aparatam u sistemie ŭstanoŭ achovy zdaroŭja Minzdrava Biełarusi. Jaho apieratyŭnuju pastaŭku z Kitaja arhanizavała pradpryjemstva «Biełmiedtechnika».
Raniej Aleh Rumo adznačaŭ, što hety robat źjaŭlajecca adnym z samych sučasnych u śviecie. Jaho nabyŭ sam centr za ŭłasnyja srodki — košt składaje niekalki miljonaŭ dalaraŭ. Padobnyja sistemy ŭžo paśpiachova vykarystoŭvajucca ŭ viadučych klinikach dla ankałahičnych apieracyj, u tym liku na piečani i padstraŭnikavaj załozie.
Kamientary