Biełarusa, jaki doŭhi čas žyŭ u Rasii i handlavaŭ zapčastkami, asudzili za «sadziejničańnie ekstremisckaj dziejnaści»
Palityčny prysud Ramana Bułyhi, mierkavana, źviazany sa spravaj Hajuna.
Raman Bułyha naradziŭsia ŭ 1982 hodzie ŭ Baranavičach. Paśla škoły skončyŭ Biełaruski dziaržaŭny ŭniviersitet.
Viadoma, što doŭhi čas Bułyha žyŭ i pracavaŭ u Rasii, u Lubiercach i Paŭłaŭskim Pasadzie Maskoŭskaj vobłaści. Tam mužčyna budavaŭ karjeru ŭ śfiery B2B-prodažaŭ: jon pracavaŭ mieniedžaram i kiraŭnikom adździełaŭ u kampanijach, jakija handlujuć aŭtazapčastkami — «Aŭta-Aljans» i «Aŭta Majstar».
Pa-za pracaj Raman maje šmat intaresaŭ: sočyć za spabornictvami pa parapłanieryźmie, rali-rejdami.
U hetym hodzie mužčynu asudzili ŭ Bresckim abłasnym sudzie pa č. 1 i č. 2 art. 361‑4 — «sadziejničańnie ekstremisckaj dziejnaści».
Ramanu prysudzili chatniuju chimiju. Mierkavana, pieraśled źviazany sa spravaj Hajuna.
«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj.
Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyłasia ŭciečka infarmacyi, i abviaściŭ pra zakryćcio prajekta.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony 9594 ludziej, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu.
«Naša Niva» — bastyjon biełaruščyny
PADTRYMAĆ
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary