21 červienia na stryminhavym servisie Paramount+ (a taksama na SkyShowtime) vyjšaŭ druhi siezon amierykanskaha špijonskaha sieryjała «Ahienctva» (The Agency), spradziusavanaha Džordžam Kłuni. U pieršym siezonie fihuravała Biełaruś — i ŭ praciahu nazva našaj krainy ŭspłyvaje znoŭ užo ŭ pieršym epizodzie, piša «Lusterka» sa spasyłkaj na Decider i El Periódico.
«Ahienctva» — amierykanski remiejk francuzskaha chita «Biuro lehiend» (Le Bureau des Légendes). Sieryjał stvaryli braty Džez i Džon-Hienry Batervart, jakija, siarod inšaha, byli scenarystami niekalkich filmaŭ franšyz «Džejms Bond» i «Indyjana Džons». Pradziusar «Ahienctva» — Džordž Kłuni. Asnoŭnyja roli vykonvajuć Majkł Faśbiender (franšyza «Ludzi Iks», «12 hadoŭ rabstva», «300 spartancaŭ», «Biezsłaŭnyja vybludki», «Čužy: Zapaviet»), uładalnik «Oskara» Džefry Rajt («Śviet Dzikaha Zachadu», niekalki apošnich filmaŭ pra Džejmsa Bonda, druhaja i treciaja častki «Hałodnych hulniaŭ», «Adny z nas», «Betmien»), kinalehienda Ryčard Hir.
U centry siužeta — aficer CRU Brendan Kołbi pa mianušcy Marsijanin. Pravioŭšy niekalki hadoŭ pad prykryćciom u Afrycy, jon vymušany viarnucca ŭ łondanskuju rezidenturu. Tam uspłyvaje žančyna ź jaho minułaha, i asabistaje žyćcio niepaźbiežna pieraplatajecca z pracaj. Adnačasova ŭ viedamstvie iduć pošuki «krata».
Biełaruś uzhadali ŭ sieryjale z samaha pačatku. Adzin ź piersanažaŭ — ahient CRU Piotr Rybak z pazyŭnym Kajot (jaho hraje Aleks Reźnik, ukrainski akcior, jaki naradziŭsia ŭ Adesie i žyvie ŭ ZŠA) — pracavaŭ u našaj krainie pad hłybokim prykryćciom. Finał siezona šmat u čym byŭ pryśviečany apieracyi CRU pa jaho vyratavańni.
Jak pišuć vydańni El Periódico i Decider, druhi siezon adkryvajecca mienavita z hetaha momantu: Kajot užo vyviezieny ź Biełarusi, i Marsijanin z kaleham dapytvajuć jaho — u pryvatnaści, vyśviatlajučy, ci nie skarystaŭsia toj stanoviščam dla nažyvy.
U pieršym siezonie, darečy, była i inšaja siužetnaja linija, źviazanaja z našym rehijonam: ahient pad prykryćciom dziejničaŭ na akupavanych terytoryjach Ukrainy, a dapamahali jamu ŭkrainskija vajskoŭcy, jakich syhrali ŭkrainskija ž akciory — Alaksandr Rudzinski i Siarhiej Anopka.
U novym siezonie paralelna raźvivajecca niekalki linij. Marsijanin, jak piša Decider, praciahvaje šukać sposab vyratavać svaju kachanuju, ryzykujučy pry hetym pravalić usiu misiju. Inšy ahient, Danieła pa mianušcy Hremlin, dziejničaje ŭ Tehieranie pad prykryćciom studentki i sprabuje vyjści na jadziernuju prahramu Irana. A palavańnie na «krata» ŭ łondanskaj rezidentury praciahvajecca.
Pieršy siezon sabraŭ bolš za piać miljonaŭ hledačoŭ na ŭsich płatformach u pieršyja ž vychadnyja, i Paramount+ jašče ŭ śniežni 2024 hoda abviaściŭ pra praciah. Druhi siezon byŭ vykładzieny 21 červienia całkam, adrazu ŭsie dziesiać sieryj, i ŭ pieršyja dni paśla vychadu ŭznačaliŭ čarty Paramount+ u Hiermanii i Italii. Pavodle danych Rotten Tomatoes, krytyki acanili jaho vyšej za pieršy: 90% adabreńnia suprać 66% u debiutnaha siezona. Hladacki rejtynh na tym ža sajcie za pieršy siezon skłaŭ 78%, ahulny rejtynh sieryjała na IMDb — 7,4 z 10.
Biełaruś u apošnija hady rehularna źjaŭlajecca ŭ zachodnim kino i na telebačańni — naprykład, u sieryjałach «Zvarotny adlik» (The Countdown), «Ranišniaje šou» (The Morning Show), filmie «Kiraŭniki dziaržaŭ» (Heads of State).
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Kamientary