Ukraina zajaŭlaje, što ŭdaryła «Fłaminha» pa palihonie, adkul Rasija zapuskaje «Arešnik». Jaki vynik?

U paviedamleńni adznačana, što na praciahu studzienia Siły abarony Ukrainy vykanali sieryju paśpiachovych udaraŭ pa kompleksie budynkaŭ anharnaha typu na palihonie «Kapuścin Jar» u Astrachanskaj vobłaści Rasii. Jon raźmieščany prykładna za 600 kiłamientaŭ ad Ukrainy.

Rasija vykarystoŭvaje hetuju placoŭku dla vyprabavańniaŭ rakietnaj techniki, a taksama dla bajavych zapuskaŭ rakiet pa Ukrainie. U pryvatnaści, mienavita z hetaha palihona ŭ listapadzie 2024 hoda i ŭ studzieni 2026 hoda byli ździejśnienyja puski balistyčnych rakiet siaredniaj dalokaści «Arešnik» pa Dniapry i Lvovie.

Pavialičyć

Ukraina zajaŭlaje, što ŭdar pa «Kapuścinym Jary» byŭ naniesieny z vykarystańniem udarnych srodkaŭ dalokaha radyusa dziejańnia ŭkrainskaj vytvorčaści, u pryvatnaści FP-5 «Fłaminha».

Heta pieršaja paćvierdžanaja ŭkrainskim kamandavańniem infarmacyja pra prymianieńnie hetaj rakiety. Raniej danyja pra zapuski «Fłaminha» pa celach u RF źjaŭlalisia tolki sa spasyłkaj na krynicy i biez kankretyki.

U listapadzie 2025 hoda pradstaŭnik Hienštaba Dźmitryj Lichavy kazaŭ pra FP-5 jak pra «ekśpierymientalnuju zbroju», jakaja jašče patrabuje ŭdaskanaleńnia. Ciapier Hienštab padkreślivaje, što ŭdar pa palihonie ŭ RF pryvioŭ da «razbureńnia častki budynkaŭ».

«Pavodle najaŭnaj infarmacyi, na terytoryi palihona častka budynkaŭ atrymała paškodžańni roznaj stupieni, adzin z anharaŭ istotna paškodžany, častka asabovaha składu evakujavanaja z terytoryi», — havorycca ŭ paviedamleńni.

Što viadoma pra efiektyŭnaść udaru

Pavodle źviestak ukrainskich OSINT-analitykaŭ, udary «Fłaminha» pa «Kapuścinym Jary» adbylisia ŭ noč na 28 studzienia.

Telehram-kanał Exilnova+ paviedamiŭ, što ŭkrainskija rakiety parazili infrastrukturu palihona, u pryvatnaści 105‑iu puskavuju placoŭku. Cellu byli anhary pieradstartavaj padrychtoŭki rakiet.

Adnačasova jašče adzin OSINT-kanał «Dnipro Osint (Harbuz)» adznačaje, što vyniki hetaj rakietnaj ataki «nie ŭražvajuć».

Pavodle jaho źviestak, Siły bieśpiłotnych sistem USU na praciahu studzienia ździejśnili niekalki atak na palihon, a mienavita na placoŭki №105 i №28.

«U vyniku analizu spadarožnikavych zdymkaŭ zafiksavana traplańnie ŭ kacielniu placoŭki №105», — havorycca ŭ dopisie Dnipro Osint.

Na apublikavanych spadarožnikavych zdymkach sapraŭdy vidać čornaja plama na dachu asobnaha budynka na palihonie. Praŭda, nieviadoma, vyklikali hetaje paražeńnie drony, jakija zapuskali SBS, ci rakiety «Fłaminha», ci niešta inšaje.

Nieŭzabavie kanał Dnipro Osint abvierh ułasnaje paviedamleńnie pra paražeńnie kacielni. Pavodle jaho słoŭ, plama na dachu budynka — heta śnieh, jaki rastaŭ.

OSINT-supolnaść «KibierBorošno» zapeŭnivaje, što ŭdar usio ž taki byŭ naniesieny pa zbudavańniach na 105‑j placoŭcy, ale jon byŭ ździejśnieny nie rakietaj, a bieśpiłotnikami raniej.

«U vyniku atak BPŁA pa palihonie «Kapuścin Jar» byli paškodžanyja dva budynki kompleksu pieradstartavaj padrychtoŭki balistyčnych rakiet siaredniaj i mižkantynientalnaj dalokaści na placoŭcy №105», — skazana ŭ paviedamleńni.

U svaju čarhu, kanał Exilnova+ apublikavaŭ videa, na jakim nibyta pakazany pusk «Fłaminha» ŭ kancy studzienia pa palihonie «Kapuścin Jar».

Na videa pakazany zapusk z płatformy čatyroch rakiet FP-5. Danych, dzie i kali mienavita byŭ ździejśnieny pusk, niama. Nadvorje na fota pakazvaje, što heta było zroblena zimoj.

Bi-bi-si sprabuje vieryfikavać infarmacyju adnosna paražeńnia palihona «Kapuścin Jar».

Pavialičyć

Vydańnie Defense Express, praanalizavaŭšy spadarožnikavyja zdymki Sentinel, paviedamlaje, što, vierahodna, udar rakietaj «Fłaminha» pryjšoŭsia pa 28‑j placoŭcy palihona. Jana viadomaja jak kamplektavalna-vyprabavalnaja baza, jakaja ŭ časy SSSR vykarystoŭvałasia dla rabot nad balistyčnaj rakietaj siaredniaj dalokaści.

«Paraŭnańnie najaŭnych zdymkaŭ pamiž 23 studzienia i 2 lutaha paćviardžaje toje, što pa hetym abjekcie prylacieła niešta davoli mahutnaje, pakinuŭšy bačny śled», — paviedamlaje vydańnie.

Na fota vidać vialikuju čornuju plamu na miescy anharaŭ, vierahodna, paśla značnaha pažaru. Adnak spadarožnikavyja zdymki majuć nizkuju raździalalnuju zdolnaść, taksama nadvorje ŭ kancy studzienia nie davała dobraj bačnaści dla taho, kab dakładna identyfikavać abjom i pryčynu paražeńniaŭ na palihonie.

Pavialičyć

Rasijskija ŭłady pakul na infarmacyju pra ŭdar pa «Kapuścinym Jary» nie adreahavali. Adnak raniej Minabarony RF paviedamlała pra pierachop i źniščeńnie čatyroch ukrainskich bieśpiłotnych latalnych aparataŭ u noč na 28 studzienia nad Astrachanskaj vobłaściu, dzie i raźmieščany hety palihon.

Kryłataja rakieta FP-5 «Fłaminha» była publična pradstaŭlenaja ŭ žniŭni 2025 hoda. Jaje zajaŭlenyja charaktarystyki: dalokaść da 3 tys. km, vyšynia palotu — da 5 km, krejsierskaja chutkaść — 850‑900 km/h, maksimalnaja chutkaść — 950 km/h, maksimalny čas u pavietry — da 4 hadzin. Jana maje nadzvyčaj mahutnuju bajavuju častku vahoj kala 1,15 tony.

Pavodle słoŭ kiraŭnictva kampanii Fire Point, zaraz vyrablajecca kala 50 «Fłaminha» na miesiac, ale płanujecca pavialičyć abjomy da 200 rakiet na miesiac.

U intervju Ukrainskaj słužbie Bi-bi-si ŭ śniežni 2025 hoda hałoŭny kanstruktar FP Dzianis Štylerman kazaŭ, što rakieta «Fłaminha» ŭžo niekalki razoŭ prymianiałasia dla udaraŭ pa RF i maksimalnaja adlehłaść składała «bolš za 1 tysiaču kiłamietraŭ».

• 5
• 0
• 1
• 2
• 0
• 0
• 0
• 0