Jeŭrakamisija pradstaviła prapanovy pa 20‑m pakiecie sankcyj suprać Rasii. Jaho majuć pryniać da hadaviny vajny

Jak zajaviła staršynia Jeŭrakamisii Ursuła fon der Lajen, novy pakiet taksama praduhledžvaje pašyreńnie śpisa tak zvanaha cieniavoha fłotu — u jaho dadali jašče 43 sudny, a ahulnaja ich kolkaść dasiahnuła 640. Akramia taho, dla Rasii płanujuć uskładnić nabyćcio tankieraŭ. Uvodziacca šyrokija abmiežavańni na techničnaje absłuhoŭvańnie i inšyja pasłuhi dla ZPH-tankieraŭ i ledakołaŭ, što pavinna źnizić mahčymaści rasijskich hazavych ekspartnych prajektaŭ.

Druhi błok sankcyj nakiravany na ŭzmacnieńnie cisku na bankaŭskuju sistemu Rasii. Pad abmiežavańni majuć trapić jašče 20 rehijanalnych bankaŭ, a taksama kryptavalutnyja struktury, kampanii i płatformy, jakija vykarystoŭvajucca dla abychodu sankcyj. Miery taksama zakranuć banki ŭ trecich krainach, što dapamahajuć niezakonna handlavać sankcyjnymi tavarami.

Treci błok praduhledžvaje dalejšaje ŭzmacnieńnie handlovych abmiežavańniaŭ. ES źbirajecca ŭvieści novyja zabarony na ekspart tavaraŭ i pasłuh — ad humy i traktaroŭ da pasłuh u śfiery kibierbiaśpieki — na sumu bolš za 360 miljonaŭ jeŭra. Adnačasova ŭvodziacca dadatkovyja impartnyja abmiežavańni na mietały, chimičnuju pradukcyju i krytyčna važnyja minierały na sumu zvyš 570 miljonaŭ jeŭra, a taksama novyja zabarony na pastaŭki tavaraŭ i technałohij vajskovaha pryznačeńnia, u tym liku materyjałaŭ dla vytvorčaści vybuchovych rečyvaŭ. Prapanujecca taksama vyznačyć kvotu na impart amijaku.

Upieršyniu Jeŭrasajuz płanuje zadziejničać śpiecyjalny miechanizm suprać abychodu sankcyj, zabaraniŭšy ekspart stankoŭ ź ličbavym prahramnym kiravańniem i radyjostancyj u krainy z vysokaj ryzykaj ich reekspartu ŭ Rasiju.

Akramia taho, Jeŭrakamisija prapanuje ŭzmacnić pravavuju abaronu kampanij ES ad parušeńniaŭ pravoŭ intelektualnaj ułasnaści i niespraviadlivaj eksprapryjacyi ŭ Rasii ŭ suviazi z sankcyjnaj palitykaj.

Asobna padkreślivajecca, što dla ŭviadzieńnia pakieta sankcyj nieabchodnaja zhoda ŭsich krain — členaŭ Jeŭrapiejskaha sajuza.

Važnym elemientam novaha pakieta moža stać zamiena cenavaj «stoli» na naftu poŭnaj zabaronaj marskich pasłuh. Z takoj inicyjatyvaj raniej vystupili Šviecyja i Finlandyja, prapanavaŭšy zabaranić strachavańnie, finansavańnie i brokierskija pasłuhi dla sudnaŭ, jakija pieravoziać rasijskija enierhanośbity. Pavodle ich acenak, heta istotna pavialičyć transpartnyja vydatki Rasii i vyklučyć udzieł jeŭrapiejskich kampanij u hetym handli.

Fon der Lajen prapanuje ŭvodzić hetyja miery ŭ kaardynacyi z krainami G7. U takim vypadku dziejny cenavy limit na naftu stracić klučavoje značeńnie, a hałoŭnym instrumientam kantrolu stanie mienavita zabarona na marskija pasłuhi.

Pavodle danych šviedskaha ŭrada, na kastryčnik 2025 hoda tolki kala 35% sudnaŭ, što pieravozili rasijskuju naftu, dziejničali ŭ miežach cenavaha abmiežavańnia, u toj čas jak astatnija 65% naležali da «cieniavoha fłotu».

Raniej Ursuła fon der Lajen zajaŭlała, što meta 20‑ha pakieta sankcyj — uzmacnić cisk na Maskvu, kab prymusić jaje sieści za stoł pieramoŭ z realnym namieram dasiahnuć miru.

• 5
• 0
• 0
• 0
• 0
• 0
• 0
• 0