У Польшчы былому беларускаму памежніку далі шэсць гадоў за перавозку мігрантаў больш за 20 гадоў таму
Апеляцыйны суд Беластока прысудзіў шэсць гадоў турмы былому беларускаму памежніку, які ў 2000—2007 гадах дапамагаў мігрантам перасякаць мяжу. Мужчына знаходзіўся ў вышуку больш за дзесяць гадоў, але быў арыштаваны, калі прыехаў у Польшчу на працу, піша Most.
Памежнік дзейнічаў у складзе злачыннай групоўкі, якая дапамагала грамадзянам Кітая і В’етнама нелегальна трапляць у краіны Заходняй Еўропы. З беларускага боку ў злачынную схему ўваходзілі і іншыя памежнікі. Мужчына працаваў на мяжы з Польшчай — як з боку Падляскага, так і Люблінскага ваяводстваў.
Суд устанавіў, што беларус дапамагаў мігрантам дабрацца да пэўнага месца на мяжы. У прызначаны час іх забіралі польскія ўдзельнікі групоўкі і дастаўлялі ў ваколіцы Варшавы. Там мігрантаў перадавалі іншым удзельнікам сеткі, якія дастаўлялі іх далей у краіны Заходняй Еўропы.
Такім чынам у Еўропу маглі трапіць сотні замежнікаў.
Следства лічыць, што ўся гэтая дзейнасць каардынавалася з Масквы.
Асоба беларускага памежніка даўно была вядомая польскім следчым. Ён больш за 10 гадоў быў у вышуку, пакуль у 2022 годзе не прыехаў у Польшчу, нібыта на працу. Тады яго затрымалі і заключылі пад варту да суда.
«Не ў той час, не ў тым месцы і сярод не тых людзей»
Агульны разгляд справы адбыўся яшчэ ў ліпені 2024 года ў Акружным судзе Беластоку. Тады беларуса прысудзілі да 6,5 гадоў пазбаўлення волі і штрафу ў 72 тыс. злотых (17 тысяч еўра).
Аднак і абарона, і пракуратура абскардзілі прысуд. Пракуратура патрабавала 9 гадоў зняволення. Абарона настойвала на поўным апраўданні.
Адзін з адвакатаў, Рафал Юравец, заявіў, што ягоны кліент «апынуўся не ў той час, не ў тым месцы і сярод не тых людзей. Ён быў толькі кіроўцам і не ведаў пра ўсё, што адбываецца».
Аднак Апеляцыйны суд падтрымаў вердыкт суда першай інстанцыі па ўсіх эпізодах, акрамя аднаго, бо па ім мінуў тэрмін даўнасці.
У выніку тэрмін зняволення зменшылі да 6 гадоў. Прысуд уступіў у законную сілу.
-
Лукашэнка заявіў пра патрэбу паляпшэння адносін з Захадам «для разбору завалаў», якія «перашкаджаюць нашай працы на сусветных рынках»
-
У Мінску хочуць назваць вуліцу імем кадэбіста «Нірваны» Федасюка, які загінуў у перастрэлцы ў кватэры Зельцара
-
У Беларусі смяротнасць амаль удвая перавысіла нараджальнасць
Цяпер чытаюць
Ці выйдзе біяграфія Пазняка і ў чым галоўная праблема беларускай літаратуры? Янушкевіч — пра тыражы і канкурэнцыю з рускай кнігай15
Ці выйдзе біяграфія Пазняка і ў чым галоўная праблема беларускай літаратуры? Янушкевіч — пра тыражы і канкурэнцыю з рускай кнігай
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3939
Каментары