З пачатку поўнамаштабнага расійскага ваеннага ўварвання ва Украіну ў лютым 2022 года, з чаго прайшла амаль роўна тры гады, забіта больш за 12 654 цывільныя асобы, у тым ліку дзяцей. Яшчэ больш за 29 392 чалавекі з ліку мірнага насельніцтва атрымалі траўмы і пашкоджанні.
Гэтыя даныя абвясціла ў пятніцу, 21 лютага, Даніэль Бел — кіраўнік місіі ААН па маніторынгу правоў чалавека ва Украіне, створанай у 2014 годзе, піша Deutsche Welle.
Па яе словах, Расія нясе адказнасць за цяжкія злачынствы, звязаныя з парушэннем правоў чалавека ў вайне супраць Украіны. 84% ахвяр, зафіксаваных у яе статыстыцы, жылі на тэрыторыі, якая знаходзілася пад кантролем ўрада Украіны, а 16% — на акупаваных Расіяй тэрыторыях.
Аднак сапраўдная колькасць цывільных асоб, якія загінулі пасля пачатку ўварвання РФ ва Украіну, вышэй за афіцыйныя даныя, адзначыла Бел.
У 2024 годзе лік ахвяр сярод мірнага насельніцтва аказаўся на 30% вышэй, чым зафіксавана ў 2023 годзе, вынікае з даклада. У місіі ААН па маніторынгу правоў чалавека ва Украіне такую дынаміку звязваюць з узмацненнем баявых дзеянняў, больш актыўным выкарыстаннем Расіяй авіябомбаў, беспілотнікаў малой далёкасці і дальнабойных ракет.
Наземныя міні і рэшткі баявых снарядаў знаходзяцца на тэрыторыі Украіны плошчай 139 000 квадратных кіламетраў, падлічылі ў ААН. «Яны ўяўляюць сур'ёзную пагрозу для цывільнага насельніцтва», — папярэдзіла Даніэль Бел.
У сярэдзіне лютага прэзідэнт Украіны Уладзімір Зяленскі назваў колькасць украінскіх вайскоўцаў, якія загінулі на вайне.
«У нас ёсць зафіксаваная колькасць ахвяр — больш за 46 тысяч загінулых вайскоўцаў. Яшчэ ёсць дзясяткі тысяч тых, хто знік без вестак або знаходзіцца ў палоне. І вы дакладна не ведаеце, бо зніклыя без вестак могуць быць мёртвымі, а могуць знаходзіцца ў палоне», — сказаў ён.
Зяленскі таксама паведаміў, што каля 19,5 тысячы ўкраінскіх дзяцей былі дэпартаваныя ў Расію.
Цяпер чытаюць
Пасля паездкі за межы ЕС таямніча знік Анатоль Котаў, былая правая рука Паўла Латушкі45
Каментары