Новаабраны прэзідэнт ЗША Дональд Трамп жартам прапанаваў прэм'еру Джасціну Трудо зрабіць з Канады 51-ы амерыканскі штат, калі тая не можа не рашыць сваіх праблем сама. Пра якія праблемы ідзе гаворка і якой была рэакцыя Трудо?
Канадскі прэм'ер Джасцін Трудо ў мінулую пятніцу без абвяшчэння прыляцеў у ЗША для сустрэчы з Дональдам Трампам пасля таго, як апошні абвясціў пра свае намеры павялічыць пошліны на прадукцыю з Канады і Мексікі, паведамляе амерыканскі тэлеканал Fox News.
Паводле дзвюх крыніц тэлеканала, якія асабіста прысутнічалі на перамовах Трампа і Трудо, новаабраны прэзідэнт ЗША выказаў прэтэнзіі да канадскага боку ў сувязі з недастатковым кантролем над патокамі нелегальных імігрантаў і наркотыкаў, што праходзяць праз паўночную мяжу ў ЗША.
Акрамя таго, Трамп ацаніў гандлёвы дэфіцыт паміж двума краінамі ў больш чым $100 мільярдаў і прыгразіў, што «без пазітыўных зменаў у вышэйпералічаных праблемах увядзе 25% тарыфы на ўсе канадскія тавары з першага дня свайго знаходжання на пасадзе».
Трудо адказаў, што ўвядзенне такіх тарыфаў будзе катастрафічным для канадскай эканомікі. На гэта Трамп адрэагаваў пытаннем: «Ваша краіна не можа выжыць без таго, каб абдзіраць ЗША на $100 мільярдаў? Можа, Канадзе варта далучыцца да ЗША і стаць нашым 51-ым штатам?», — цытуюць крыніцы Fox News новага амерыканскага прэзідэнта.
Па іх словах, такая прапанова выклікала ў Трудо і некалькіх іншых прысутных «нервовы смех», аднак, як адзначаюць крыніцы, «Трамп быў у той момант досыць прамалінейны, нягледзячы на сваю гасціннасць і добразычлівасць падчас перамоваў».
Больш за тое, Трамп не спыніўся ў сваёй рыторыцы наконт магчымага далучэння Канады і нават прапанаваў Трудо ўзначаліць яе ў якасці аднаго з амерыканскіх губернатараў, адзначае Fox News. Суправадзіўся гэты няёмкі момант яшчэ і тым, што Трамп дапусціў падзяленне Канады пры яе далучэнні да ЗША.
«Звяртаючыся да Трудо, Трамп заявіў, што ягоны тытул «прэм'ер-міністр» хоць і гучыць лепш, але ён усё роўна мог бы стаць губернатарам 51-га штата. У гэты момант адзін з прысутных заўважыў, што Канада магла б стаць самым ліберальным з амерыканскіх штатаў. Трамп услед прапанаваў зрабіць з Канады адразу два штаты — ліберальны і кансерватыўны. Гэта выклікала яшчэ больш смеху», — распавядаюць крыніцы Fox News.
На гэты момант ні каманда Трампа, ні прадстаўнікі Трудо не давалі каментароў наконт вышэйапісанай размовы. Тым не менш заявы Трампа выклікалі шырокую дыскусію пра будучыню амерыканска-канадскіх адносін і пагрозу сур'ёзнага ціску ЗША на свайго паўночнага суседа, адзначае Fox News.
Трамп абмовіўся, што гатовы пайсці на трэці тэрмін. А ці магчыма такое ў ЗША ўвогуле?
Кепскі мір ці зацяжная вайна. Як Украіна рыхтуецца да таго, што Трамп паспрабуе адразу пасадзіць яе за стол перамоваў
Маск і Рамасвамі расказалі, як будуць скарачаць выдаткі. Вось чаму гэта можа моцна паўплываць і на Беларусь
Цяпер чытаюць
Легендарная журналістка Любоў Лунёва расказала пра Віктара Лукашэнку і аднакурснікаў, стварэнне «Вясны» і палітычны бамонд17
Каментары