ЮНЕСКА заклікае школы ўсяго свету забараніць выкарыстанне смартфонаў на ўроках
У арганізацыі сцвярджаюць, што з-за гаджэтаў у вучняў адцягваецца ўвага на занятках, што прыводзіць да зніжэння паспяховасці.
У сваім новым дакладзе ЮНЕСКА перасцерагае ад празмернага выкарыстання тэхналагічных прылад, галоўным чынам смартфонаў і камп'ютараў. Эксперты арганізацыі перакананыя: іх трэба ўжываць у меру, толькі па прызначэнні, і кіраваць працэсам павінен кваліфікаваны выкладчык, піша Euronews.
«Лічбавая рэвалюцыя мае невымерны патэнцыял. І сёння гучаць заклікі, што яна павінна рэгулявацца ў грамадстве. Сапраўды так, трэба быць уважлівым да таго, як яе тэхналогіі выкарыстоўваюцца ў сферы адукацыі», — заявіла генеральны дырэктар ЮНЕСКА Адры Азуле.
«Іх выкарыстанне павінна быць накіравана на павышэнне якасці навучання і на карысць навучэнцаў і выкладчыкаў, а не на шкоду ім».
Аўтары даклада прызнаюць, што новыя тэхналогіі могуць быць карысныя ў навучальным працэсе для асваення пэўных навук і атрымання ведаў у канкрэтных навуковых галінах. Але школам варта рэгламентаваць гэтую сферу, каб пазбегнуць згубнага ўздзеяння на дзяцей.
«Даныя буйнамаштабных міжнародных даследаванняў, напрыклад, PISA (Міжнародная праграма па ацэнцы адукацыйных дасягненняў навучэнцаў), сведчаць аб негатыўным уплыве празмернага выкарыстання смартфонаў і камп'ютараў на паспяховасць навучэнцаў», — гаворыцца ў справаздачы.
Нават простае знаходжанне побач з мабільнай прыладай адцягвае школьнікаў, лічаць у ЮНЕСКА. Адзначаецца, што ў кожнай чацвёртай краіне свету смартфоны ў школах забароненыя.
У спісе фігуруюць Францыя, якая ўвяла гэтую меру ў 2018 годзе, Італія, дзе настаўнікі забіраюць смартфоны вучняў у пачатку дня. У 2024 годзе да іх далучацца Фінляндыя і Нідэрланды.
У Беларусі ў многіх школах вучні перад урокамі здаюць смартфоны.
-
«Паліць нафтаперапрацоўчыя заводы». Кіт Келаг параіў, што трэба рабіць Украіне пасля папярэджанняў Трампа
-
У Францыі хакеры ўзламалі халадзільнікі ў сотнях супермаркетаў. Замест мінусавой тэмпературы яны сталі даваць плюсавую
-
У Германіі затрымалі падазраваных у падпале станцыі Starlink у Польшчы. Яны іншаземцы
Каментары