Падарваны Крымскі мост: пралёт у адзін бок абрынуўся, у другі бок прасеў. Чыгуначны мост не пашкоджаны
Сёння ў 4:21 улады анексаванага Крыма паведамілі, што рух па Крымскім мосце спынілі праз здарэнне ў раёне 145-ай апоры з боку Кубані. Што менавіта здарылася, яны не назвалі. Украінскія СМІ са спасылкаю на свае крыніцы паведамляюць, што мост мог быць атакаваны з дапамогай надводных дронаў.
Вядома, што на мосце загінула сямейная пара, якая ехала ў машыне, іх дачка шпіталізаваная. Відавочцы кажуць, што чулі выбух.
Як удакладняе Baza, жанчыне было 36 гадоў, мужчыну — 40. 14-гадовая дзяўчынка была дастаўлена ў адну з бальніц Краснадарскага краю.
Як стала зразумела пазней, пралёт у адзін бок абрынуўся, у другі бок прасеў. Чыгуначны мост не пашкоджаны.
Кіраўніцтва анексаванага Крыма заклікала людзей устрымацца ад планаў ехаць па мосце. У Мінтрансе прапанавалі выбіраць сухапутны маршрут.
Праца паромнай пераправы паміж Крымам і Краснадарскім краем таксама спыненая. Перад уездам на Крымскі мост утварыўся шматкіламетровы затор.
Чыгуначнае палатно Крымскага моста не пацярпела, паўвостраў не ізаляваны, заявілі ўлады Крыма.
Улады анексаванага Крыма паведамілі, што ён забяспечаны ўсімі неабходнымі харчовымі і прамысловымі таварамі, а таксама палівам.
Адміністрацыя заклікае турыстаў у Крыме па магчымасці заставацца ў гасцініцах.
Што кажа ўкраінскі бок
Спікер ГУР Андрэй Юсаў у каментары «Суспільнаму» заявіў, што ГУР не каментуе прычыны падзей на Крымскім мосце. «Можна толькі працытаваць словы кіраўніка ГУР Кірылы Буданава пра тое, што «Крымскі мост — канструкцыя там лішняя», — дадаў ён.
Ва УСУ ж заявілі, што пашкоджане Крымскага моста можа быць расійскай правакацыяй, бо сёння сканчаецца дзеянне збожжавай угоды.
«Пры тых беспрэцэдэнтных мерах бяспекі, якія выкарыстоўваліся доўгі час расіянамі вакол Крымскага моста, яны, цалкам імаверна, кантралявалі ўсю гэтую сітуацыю, і далей адбываецца яна па запраграмаваным імі ж сцэнарыі», — заявіла кіраўніца прэс-цэнтра Сіл абароны поўдня Наталля Гуменюк.
Якія версіі таго, што адбылося
Украінскія СМІ паведамляюць, што начная атака на Крымскі мост была спецаперацыяй СБУ і Вайскова-марскіх сіл УСУ.
Як пішуць «Украінская праўда» і «РБК-Украіна», мост быў атакаваны з дапамогай надводных дронаў. Паводле слоў крыніц медыя, дайсці да моста было складана, але нарэшце гэта атрымалася.
Расійскі бок пакуль прычын здарэння не называў.
- Папярэдні выбух на Крымскім мосце адбыўся 8 кастрычніка 2022 года: там быў падарваны грузавік з выбухоўкай.
- Выбухам быў знішчаны адзін з пралётаў аўтамабільнага моста і пашкоджаны чыгуначны мост.
- Аўтамабільны рух аднавілі 6 снежня, але цалкам мост запрацаваў толькі ў маі.
Беларус паляцеў у Ніцу праз Стамбул — цяпер ён у коме ў французскай бальніцы. Мясцовыя медыкі раяць адключаць яго6
Беларус паляцеў у Ніцу праз Стамбул — цяпер ён у коме ў французскай бальніцы. Мясцовыя медыкі раяць адключаць яго
«У мяне толькі адна мара — вярнуць свайго Дзімку». Маці былога палітвязня Дзмітрыя Гопты расказвае пра новую бяду сына. І просіць замаўляць у яе больш тортаў, каб справіцца1010
Каментары