Padarvany Krymski most: pralot u adzin bok abrynuŭsia, u druhi bok prasieŭ. Čyhunačny most nie paškodžany
Siońnia ŭ 4:21 ułady anieksavanaha Kryma paviedamili, što ruch pa Krymskim moście spynili praz zdareńnie ŭ rajonie 145-aj apory z boku Kubani. Što mienavita zdaryłasia, jany nie nazvali. Ukrainskija ŚMI sa spasyłkaju na svaje krynicy paviedamlajuć, što most moh być atakavany z dapamohaj nadvodnych dronaŭ.
Viadoma, što na moście zahinuła siamiejnaja para, jakaja jechała ŭ mašynie, ich dačka špitalizavanaja. Vidavočcy kažuć, što čuli vybuch.
Jak udakładniaje Baza, žančynie było 36 hadoŭ, mužčynu — 40. 14-hadovaja dziaŭčynka była dastaŭlena ŭ adnu z balnic Krasnadarskaha kraju.
Jak stała zrazumieła paźniej, pralot u adzin bok abrynuŭsia, u druhi bok prasieŭ. Čyhunačny most nie paškodžany.
Kiraŭnictva anieksavanaha Kryma zaklikała ludziej ustrymacca ad płanaŭ jechać pa moście. U Mintransie prapanavali vybirać suchaputny maršrut.
Praca paromnaj pierapravy pamiž Krymam i Krasnadarskim krajem taksama spynienaja. Pierad ujezdam na Krymski most utvaryŭsia šmatkiłamietrovy zator.
Čyhunačnaje pałatno Krymskaha mosta nie paciarpieła, paŭvostraŭ nie izalavany, zajavili ŭłady Kryma.
Ułady anieksavanaha Kryma paviedamili, što jon zabiaśpiečany ŭsimi nieabchodnymi charčovymi i pramysłovymi tavarami, a taksama palivam.
Administracyja zaklikaje turystaŭ u Krymie pa mahčymaści zastavacca ŭ haścinicach.
Što kaža ŭkrainski bok
Śpikier HUR Andrej Jusaŭ u kamientary «Suśpilnamu» zajaviŭ, što HUR nie kamientuje pryčyny padziej na Krymskim moście. «Možna tolki pracytavać słovy kiraŭnika HUR Kiryły Budanava pra toje, što «Krymski most — kanstrukcyja tam lišniaja», — dadaŭ jon.
Va USU ž zajavili, što paškodžanie Krymskaha mosta moža być rasijskaj pravakacyjaj, bo siońnia skančajecca dziejańnie zbožžavaj uhody.
«Pry tych biesprecedentnych mierach biaśpieki, jakija vykarystoŭvalisia doŭhi čas rasijanami vakoł Krymskaha mosta, jany, całkam imavierna, kantralavali ŭsiu hetuju situacyju, i dalej adbyvajecca jana pa zaprahramavanym imi ž scenaryi», — zajaviła kiraŭnica pres-centra Sił abarony poŭdnia Natalla Humieniuk.
Jakija viersii taho, što adbyłosia
Ukrainskija ŚMI paviedamlajuć, što načnaja ataka na Krymski most była śpiecapieracyjaj SBU i Vajskova-marskich sił USU.
Jak pišuć «Ukrainskaja praŭda» i «RBK-Ukraina», most byŭ atakavany z dapamohaj nadvodnych dronaŭ. Pavodle słoŭ krynic miedyja, dajści da mosta było składana, ale narešcie heta atrymałasia.
Rasijski bok pakul pryčyn zdareńnia nie nazyvaŭ.
- Papiaredni vybuch na Krymskim moście adbyŭsia 8 kastryčnika 2022 hoda: tam byŭ padarvany hruzavik z vybuchoŭkaj.
- Vybucham byŭ źniščany adzin z pralotaŭ aŭtamabilnaha mosta i paškodžany čyhunačny most.
- Aŭtamabilny ruch adnavili 6 śniežnia, ale całkam most zapracavaŭ tolki ŭ mai.
Za zabojstva čałavieka ŭ IČU Barysava aryštavali dvuch zekaŭ-recydyvistaŭ i 26‑hadovaha milicyjaniera Klaščonka7
Za zabojstva čałavieka ŭ IČU Barysava aryštavali dvuch zekaŭ-recydyvistaŭ i 26‑hadovaha milicyjaniera Klaščonka
«Vyzvalali niemcaŭ ad fašyzmu, a sami zastavalisia ŭ tym ža dziarmie». Apublikavana treciaja častka ŭspaminaŭ Ryhora Biarozkina pra savieckija represii2929
Kamientary