Вучоныя: празмернае спажыванне ультраапрацаваных прадуктаў можа выклікаць псіхічныя разлады
Ультраапрацаваныя прадукты харчавання вырабляюцца з рафінаваных і максімальна ачышчаных ад дамешкаў інгрэдыентаў. У спіс такіх прадуктаў уваходзяць чыпсы, шакаладныя батончыкі, печыва, курыныя нагетсы, мультыфруктовыя сокі і нават марожанае. Новыя даследаванні пацвярджаюць сувязь гэтых прадуктаў з рэцыдывамі дэпрэсіўных сіндромаў.
Ультраапрацаваныя прадукты могуць быць вельмі далёкія ад сыравіны, з якой яны вырабленыя. Іх атрыманне патрабуе значных фізічных, хімічных ці біялагічных пераўтварэнняў, а таксама такіх дадаткаў, як эмульгатары, узмацняльнікі смаку ці антыаксіданты. Усё гэта змяняе тэкстуру, смак і тэрмін прыдатнасці прадукту.
Навукоўцы даўно гавораць пра тое, што ультраапрацаваныя прадукты харчавання павышаюць рызыку развіцця цукровага дыябету 2 тыпу, сардэчна-сасудзістых захворванняў, атлусцення і нават раку. Новае даследаванне выявіла сувязь паміж празмерным спажываннем такіх прадуктаў і рызыкаю рэцыдываў дэпрэсіі.
Пра гэта паведамляе Нацыянальны інстытут здароўя і медыцынскіх даследаванняў Францыі. Каманда вучоных Цэнтра даследаванняў эпідэміялогіі і здароўя насельніцтва ў Парыжы вывучала сувязь паміж харчаваннем і псіхічным здароўем на працягу пятнаццаці гадоў.
Каманда выкарыстоўвала даныя брытанскіх дзяржаўных службоўцаў ва ўзросце ад 35 да 55 гадоў, якія пачалі сваю працу ў перыяд з 1985 па 1988 год. Дэпрэсіўныя сімптомы ўдзельнікаў даследавання і магчымае выкарыстанне імі антыдэпрэсантаў ацэньваліся чатыры разы з 2002 па 2016 год. Агулам былі прааналізаваныя даныя 4554 чалавек (у тым ліку 74% мужчын).
Ежа, якую спажывалі ўдзельнікі даследавання ў перыяд з 1991 па 2004 год, ацэньвалася на аснове анкеты, якая самастойна запаўнялася ўдзельнікамі і якая прадугледжвала класіфікацыю прадуктаў у залежнасці ад ступені іх апрацоўкі.
Для кожнага ўдзельніка даследчыкі разлічылі долю ультраапрацаваных прадуктаў у дзённым спажыванні. На падставе гэтых даных усе ўдзельнікі былі падзеленыя на пяць груп.
Даследчыкі выявілі значную сувязь паміж высокім спажываннем прадуктаў, якія прайшлі праз глыбокую апрацоўку, і рызыкай рэцыдыву дэпрэсіўных сімптомаў.
Удзельнікі даследавання, у рацыёне якіх ультраапрацаваныя прадукты складалі адну трэцюю частку рацыёну, былі на 30% больш схільныя да эпізодаў рэцыдыву дэпрэсіўных сімптомаў у параўнанні з удзельнікамі, у якіх доля такіх прадуктаў у штодзённым спажыванні складала менш за адну пятую.
Вучоныя адзначаюць, што такая ўзаемасувязь не залежыць ад сацыяльна-дэмаграфічных фактараў, ладу жыцця або агульнага стану здароўя людзей. Іх аналіз паказаў, што ўлік долі ультраапрацаваных прадуктаў у рацыёне харчавання прыводзіць да істотнага паслаблення сувязі паміж якасцю харчавання чалавека і рызыкай узнікнення ў яго дэпрэсіўных сімптомаў.
Вучоныя тлумачаць гэта тым, што ультраапрацаваныя прадукты садзейнічаюць акісляльнаму стрэсу, выклікаюць змены кішэчнай мікрабіёты і нават экспрэсію генаў. Усё гэта аказвае ўплыў на псіхічнае здароўе чалавека.
Вучоныя адзначаюць, што атрыманыя імі вынікі падкрэсліваюць, наколькі важна звяртаць увагу на спажыванне прадуктаў глыбокай апрацоўкі, і нагадваюць, што дактары настойліва раяць ужываць прадукты ў іх як мага больш натуральным выглядзе, сярод якіх абавязкова павінны прысутнічаць садавіна, мяса, рыба, мука грубага памолу і г. д.
Чытайце яшчэ:
Мухі і конікі. Як правільна харчавацца, каб пазбегнуць інсультаў і іншых распаўсюджаных захворванняў
Яркія цукеркі, марожанае і салодкія ёгурты. Калі вы іх ясце, вазьміцеся за галаву
Хто тая Аліна, з якой Лукашэнка танцаваў гэтым разам на навагоднім балі18
Каментары